Cau gơtìp chơ̆t tài bơh bơtờp kòp sơnrang pa ngan rlau jơh là mò Đ.T.C (deh nam 1956, ơm tàm thôn Đà Bắc, xã Ia Lâu, kơnhoàl Chư Prông). Jăt mờ hơ̆, tàm nhai 10 nam 2022, mò C gơtìp so hìu kăp tềng jơng. Tơnơ̆ hơ̆, so gơtìp cau hìu bơnhă pờng chơ̆t. Mò C ràu is sồt mờ dà, ờ gŏ rơcăng lòt tus hờ hìu sơnơm nàng cĭt vaccine rơcăng sơndră kòp.

Bơh bồ nam 2023 tus tŭ do, tàm càr Gia Lai neh geh 05 nă cau chơ̆t tài bơtờp kòp sơnrang. Jăt tơrgùm kờp, tơngai bơh nam 2015- 2022, càr Gia Lai gŏ 33 nă cau chơ̆t tài bơh bơtờp kòp sơnrang. Jăt Anih tờm gròi sền kòp tê jê să càr Gia Lai dê yal, kòp sơnrang kung gam lơh bơtờp sùm tàm càr là tài bơh broă lơh sa gam kal ke, làng bol ờ hềt gĭt wă broă cĭt vaccine rơcăng sơndră kòp tơnơ̆ tŭ gơtìp phan puan jơng kăp. Bơhiàn mờng kwèng ròng so mèu tơngklàs lềng kung lơh broă kơryan lài mờ gròi sền kòp bơtờp kal ke sơl.