VOV4.K’ho- Ngai 08/08, ồng  Lê Văn Trì- Kwang atbồ Hìu sơnơm kơnhoàl Chư Prông, càr Gia Lai yal, tàm ù tiah kơnhoàl dê pa geh dùl nă cau chơ̆t tài kòp sơn rang tàm thị trấn Chư Prông.

Tŭ gơtìp so, mèo kăp làng bol pal sơr băc mhar tus hìu sơnơm rềp ngan rlau jơh nàng cĭt sơnơm rcang sơndră kòp sơn răng

Cau chơ̆t là ồng Nguyễn Văn Trịnh, deh nam 1970, ơm tàm sơnah ƀòn 6, thị trấn Chư Phông. Ồng Trịnh sơnđờm gơbàn kòp sơnrang tàm ngai 18/07 mờ ală bơta tềl tơngŏ rơngòt dà, rơngòt càl, rơngòt àng sòl mờ rơpơ̆t să. Ngai 19/07, ồng Trịnh mut sơm kòp tàm Hìu sơnơm dờng càr Gia Lai den hơ̆ sồng geh jun tus Hìu sơnơm Kòp Nhiệt đới dà lơgar mờ chơ̆t bàr pe ngai tơnơ̆ hơ̆. Jat jơnau yal bơh Anih tờm gròi sền kòp tê jê să càr Gia Lai, tàm pơgap 1 nam do, cau kòp ờ gơbàn so, mèo kăp. Mơya, lài mờ tŭ gơbàn kòp sơn rang 15 ngai, ồng Trịnh at mèo chơ̆t tàm tê cèng lòt tơ̆p (mèo chơ̆t ờ hềt gĭt là kòp sơn rang halà ờ). Tơnơ̆ tŭ tơ̆p jơh, ồng Trịnh ờ lòt cĭt huyết thanh sơndră kòp sơn rang mờ sơnơm vaccine kòp sơn răng tài ờ gĭt he geh bơta digơlan bơtờp kòp sơn răng. Do là cau chơ̆t dơ̆ 4 tài bơh kòp sơn rang tàm ù tiah càr Gia Lai dê kờp bơh bồ nam 2022 tus tŭ do.

Cau mblàng K’Hạnh