VOV4.K’ho- Rcang is priă jền là broă lơh nàng kờñ tơnguh bơta rcang lài ai ală hìu sơnơm dà lơgar in, pơgồp bơnah tơnguh bơta niam kham, sơm kòp. Mơya, bơta geh ngan tàm càr Gia Lai, broă rcang is priă jền ờ hoan geh cồng nha, gam lơh uă Hìu sơnơm dà lơgar gơ ơm tàm bơta ngai sơlơ kal ke rlau tai. Bơta gơ lời wơl là bơta pơhìn ờ tơl mpồl cau lơh broă jak chài mờ gơrềng tus bơta niam kham, sơm kòp tàm tơngai jŏ jòng.

Hìu sơnơm Y dược Kổ truyền mờ Lơh pràn wơl să jan càr Gia Lai dê lơh jat broă rcang is priă jền bơh nam 2018 tus tŭ do. Mơya kung bơh tŭ hơ̆ sơl, bơta lơh geh priă jền ờ tơl tàm broă tă priă ngui, nam tơnơ̆ ờ tơl rlau mờ nam lài sùm gơlik geh. 

Ală ƀak sĩ tus bal rcang sơndră kòp Kovid-19 tàm Gia Lai

Ồng Nguyễn Thanh Hùng, Kwang atbồ Hìu sơnơm pà gĭt jơnau gơbàn là mpồl lơh broă là Hìu sơnơm chuyên khoa, ờ geh kấp kứu mờ ală bơta kòp jŏ ngai. Khà priă lơh geh uă ngan là geh bơh kham sơm kòp bơh mờr 1 rơbô nă cau cih mat kham sơm kòp bơh thể bảo hiểm y tế dê. Bulah geh 150 jơnờng piam kòp, mơya mìng nggùl khà jơnờng do geh ngui sùm. Den tàng bè hơ̆, uă tŭ, kwang bàng lơh sơnơm hìu sơnơm dê gơtìp gơkòl dồs priă nhai tàm uă nhai sùm. Kung bè tŭ lơh jat broă lơh rcang is priă jền, broă kwang bàng ờ geh priă pà tàm ală ngai chờ dờng, dơ̆ sa tềp dà lơgar neh gơ gơs là jơnau ờ gơtùi pleh klàs.

Ồng Nguyễn Thanh Hùng đơs: 1 nam ngui jơh 12 tơmàn đong, mờ tŭ do hìu sơnơm pa geh 6 tơmàn đong lơm. 1 qúy, bảo hiểm y tế hơ̆ sồng pơyoa priă 1 dơ̆, ai lài 80%. Pơn yơu bè 1 tơmàn đong den ai lài 800 tơlak đong. Ai lài den lơh mbè lơi geh priă jền nàng tơm kwang bàng, kông cứk in. Den tàng dà lơgar pal “ai tai” priă jền. Tơngai sa tềp ờ geh priă 1 đong lơi sơl, geh priă lơi nàng pà taih?

Ƀak sĩ H’Ni (Khoa Ưng ƀứu- Hìu sơnơm dờng Gia Lai) kham cau kòp tàm khoa in

Tàm Hìu sơnơm dờng càr Gia Lai, Hìu sơnơm khà 2, geh bơta ơnàng dờng ngan rlau jơh càr dê, broă rcang is priă jền kung ờ hoan ƀuơn ngan sơl. Tàm 2 nam geh kòp Kovid-19 (hơ̆ là bơh nam 2020-2021), khà priă geh bơh priă kham, sơm kòp hìu sơnơm dê gơmù 60%, lơh hìu sơnơm pal dan kes priă pà bơtơl 44 tơmàn 700 tơlak đong nàng tă tơm  broă lơh ai kwang bàng lơh sơnơm in. Ồng Phạm Bá Mỹ, Kwang atbồ hìu sơnơm pà gĭt, ờ tơl priă tă, broă lơh bơto bơtê mpồl cau lơh broă mờ blơi phan bơna măy mok, sơnơm tơm ba rcang lam lơh ală broă lơh pa jat broă rơndap lơh bơh hìu sơnơm dê kung gơtìp gơrềng bal sơl. Ồng Mỹ yal jơnau ai lơh pơn yơu ngan ngồn, tŭ do, nàng lơh geh jơnau kờñ bơtàu tơnguh, jơnau kờñ ai kwang bàng, ƀác sĩ in lòt bơsram bơh hìu sơnơm dê là pơgap 30 nă. Mơya ờ geh priă tă, tŭ do mìng geh 11 nă ƀác sĩ lòt bơsram mờ priă jền là rcang is. Ờ geh priă jền den bơcri lơh jŏ tơngai ờ hoan geh bơyai lơh, gơlam tus kal ke lam lơh broă lơh pa, kal ke tơnguh khà priă lơh geh; ờ geh khà priă lơh geh den ờ gơtùi bơcri lơh. Do là jơnau gơbàn wih gơbàn wơl ờ mìng is tàm Hìu sơnơm dờng Gia Lai dê tŭ do lơm ờ.

Ồng Phạm Bá Mỹ đơs: Dilah jơng kah priă jền den lơh broă ờs mờng jài mờ lòt bơsram jài. Lòt bơsram den hơ̆ sồng geh bơta gĭt wă rlau, gĭt bơta chài ngui măi mok pa, tơnguh bơta gĭt wă să jan dê, rê wơl den pơn jat tai drơng broă cau kòp in. Ai tŭ do, mpồl lơh broă mìng lòt 1 jơng lơm, ờ geh lòt bơsram, ờ lòt bơsram, rơnàng kwang bàng neh kra ơm rơlô là ờ geh cau lơh broă tai, roh jơh broă lơh. Gơ geh logic mờ jơnau gơ jat bal jơh lơm. Mìng là tŭ do là pơnđơl lơh ngan đau gơ dê.

Bơh nam 2018 tus tŭ do, 27 hìu sơnơm tàm càr Gia Lai lơh jat broă lơh rcang is priă jền. Tàm hơ̆, geh 4 mpồl lơh broă kấp càr lơh jat broă rcang is priă jền jơh ală priă tă ngui sùm, 21 mpồl lơh broă lơh jat broă rcang is 1 bơnah. Mơya, jat jơnau đơs bơh Sở Y tế Gia Lai dê, tŭ do pa mìng geh 3 mpồl lơh broă lơh gơtùi broă rcang is priă jền. Bơh nam 2019 tus tŭ do, kờp jơh khà priă càr Gia Lai tă ngui nàng ai bơtơl priă nhai, priă dong kờl jat broă lơh ai kwang bàng lơh sơnơm tàm ală mpồl lơh broă ờ jai lơh rcang is priă jền là rlau 158 tơmàn đong.

Ồng Lý Minh Thái- Phó Kwang atbồ Sở Y tế càr Gia Lai pà gĭt, geh uă jơnau gơbàn lơh broă rcang is priă jền bơh ală hìu sơnơm dà lơgar dê ờ geh cồng nha. Bè jơnau gơtùi rcang lài là, atbồ bơh uă hìu sơnơm dê ờ hềt di pal mờ jơnau kờñ geh ai. Bơta geh ngan là tàm càr Gia Lai tŭ do geh 90% khà priă lơh geh bơh ală mpồl lơh broă rcang is priă jền bơh broă lơh kham, sơm kòp bơh cau kòp geh sră bảo hiểm y tế dê. Bè jơnau ờ gơ tùi gĭt lài den tŭ do giă drơng broă kham sơm kòp gơtìp sồr jat tàm ală giă jat jơnau ai bơh Ƀộ Y tế dê. Tàm tŭ, giă do kung gam ờ hềt lơh sir, tài bơh ờ tơl ală priă tă bè ngui phan bơna măy mok hìu đam mờ priă tă bơto bơtê. Den tàng, jat ồng Lý Minh Thái, nàng lơh broă rcang is priă jền hìu sơnơm dà lơgar dê lơh tàm càr in geh cồng nha rlau, kờñ pal geh bal bơta pơn đơl pràn lơh ngan bơh ală mpồl lơh broă mờ bơta tă bơsong bơh kơrnoat dê.

Ồng Lý Minh Thái đơs: Ờ hoan drơng broă lơh là bơta tờm bơh ờ hoan lơh geh priă jền dê, bơta hơ̆ uă tŭ lơh gơrềng pràn rlau mờ giă. Gơtùi rcang lài là broă atbồ đơng lam bơh kwang đơng lam bồ, ală anih lơh broă hơ̆ dê. Ai bơcri priă lơh bè phan bơna, cau lơh broă là pal geh broă lơh kwơ màng jŏ jòng. Ờ gơtùi dùl nă să bơsong broă bè hơ̆ ờ. Kờñ lam lơh broă drơng niam den pal geh phan bơna niam, mpồl cau lơh broă jak đau, phan bơna măy mok sơnơm tơm ba niam. Bơta hơ̆ gơ jat bal tàm bơcri priă jền bơh dà lơgar dê.

Rcang is priă jền hìu sơnơm dà lơgar dê lơh là broă lơh tờm tă bơsong ai uă broă lơh bơh gah lơh sơnơm tŭ do dê. Mơya, bơta geh ngan ờ geh cồng nha tàm Gia Lai dê gam pà gŏ ală bơta pơhìn digơlan gơlik geh. Dilah ờ geh bơsong di tŭ digơlan kal ke ngan kơryan bơta mpồl cau lơh broă jak chài sang tĕ broă, gơrềng tus bơta kơ̆ kơljap bơh ală anih lơh broă lơh sơnơm dà lơgar dê tàm broă sền gròi pràn kơl dang să jan làng bol in.

Cau cih Nguyễn Thảo- Cau mblàng K’Hạnh