VOV4.K’ho - Bơh ngai 04 tus ngai 07 nhai 10, tàm Anih tờm yal broă lơh càr Gia Lai, Sở Lao động-Thương ƀiñ mờ Xã hội càr pơgồp bal mờ Hìu sơnơm Hoàn Mỹ Đà Nẵng bơyai lơh kham rơwah plai nùs ờ sa priă ai kơnòm dềt in.

                                                 Ală ƀák sĩ kham rơwah ai  kơnòm dềt in

Tàm dơ̆ kham sơnrờp ngan, ală ƀák sĩ neh kham rơwah, pơlam ai mờr 200 nă kơnòm dềt geh tơngŏ kòp plai nùs bơh dềt bè: sùm bơsiă, ntas khòk khèk gơtìp sùm uă dơ̆, tă nhơm sơbăc, ntơh gơmù tŭ rơhồp nhơm, as klờm soh, jê sồt rơnồng dờ... Gơwèt mờ kơnòm dềt neh geh reh den jà tus kham wơl nàng sền bơta pràn kơl dang să jan. Kờp dŭ, tus jơh ngai 07 nhai 10, ală ƀák sĩ geh kham rơwah ai di pơgăp 3 rơbô nă kơnòm dềt tàm gùt càr do in. Tơnơ̆ mờ tŭ ală kơnòm dềt neh geh kham rơwah mờ geh sồr reh, geh dong kờl priă reh jăt mờ kơrnoăt neh geh ai. Do là dùl tàm ală broă lơh pah nam bơh Sở Lao động-Thương ƀiñ mờ Xã hội càr Gia Lai dê tàm broă sền gròi, drơng gàr tus mờ kơnòm dềt ờ bơtoah gơtìp kòp plai nùs bơh dềt.

VOV Tây Nguyên-Cau mblàng Ndong Brawl