VOV4.K’ho- Tàm rlau 1 nhai do, Hìu sơnơm kơnòm dềt càr Gia Lai neh dờp sơm kòp ai rlau 800 nă kơnòm dềt gơbàn ală bơta kòp bè gùng tă nhơm, geh mờr 1/3 kờp jơh khà cau gơbàn kòp bơh bồ nam tus tŭ do.

Tàm Khoa nội tổng hợp- y họk kổ truyền (Hìu sơnơm kơnòm dềt càr Gia Lai) geh 163 nơm jơ nờng kòp. Bulah bè hơ̆, tŭ do, Khoa neh mờ gam dờp sơm kòp piam wơl hìu sơnơm ai rlau 200 nă kơnòm dềt kòp in den tàng pal ơn tai jơ nờng kòp. Tàm khà do geh mờr 80% kơnòm dềt gơbàn ală kòp gùng tă nhơm bè nggụ, as sồt muh, rơ nồng dờ, as sồt klờm soh… jơh ală kơnòm dềt gơbàn kòp hơ đơm 5 sơnam. Ƀak sĩ Từ Thị Mai Linh, Phó Kwang atbồ Hìu sơnơm kơnòm dềt càr Gia Lai pà git: Kàl do, trồ tiah mìu tơngai nisơna, ƀuơn ngan ai ală bơta virus, vi khuẩn lơh gơbàn kòp gơguh uă. Bè đah hìu sơnơm den neh rơcang lài rơndap tap sèng wơl cau lơh broă, jơ nờng nàng ală oh dềt in piam mờ sơm kòp dipal mờ ƀă tàm. Mờ kung rơcang lài sơnơm tơmba, phan bơna gơ rềng tus sơm kòp gùng tă nhơm.

Cau mblàng K’Duẩn