VOV4.K’ho- Càr Gia Lai gam lam lơh uă broă lơh nàng pơn jăt tai tơnguh uă khà cĭt vaccine kòp Kovid-19 ai kơnòm dềt bơh 5 sơnam tus hơđơm 12 sơnam in. Nàng tơnguh khà cĭt vaccine, càr neh lơh ală anih cĭt ntrờn làm bă tiah tus tơn tàm ală ƀòn lơgar. Ồng Đinh Hà Nam, Phó Kwang ătbồ Sở Y tế càr Gia Lai pà gĭt, kờp jơh khà kơnòm dềt tàm mpồl cau bơh 5 sơnam tus hơđơm 12 sơnam tàm càr tơl bơta nàng cĭt vaccine kòp Kovid-19 là rlau 212 rbô nă oh.

Anih cĭt vaccine kòp Kovid-19 tàm ƀòn dờng Pleiku

Kờp tus drim ngai 10/08, càr Gia Lai neh cĭt geh rlau 170 rbô 700 ding vaccine ding dơ̆ dùl mờ rlau 83 rbô 700 ding dơ̆ 2 ai mpồl sơnam do in, lơh geh khà cit ding dơ̆ dùl là rlau 80,46%, ding dơ̆ 2 là 39, 46%. Jăt ồng Nam yal, mờ khà cĭt bè tŭ do, càr Gia Lai ơm dơ̆ 27 tàm jơh gùt lơgar tàm broă cĭt vaccine ai kơnòm dềt bơh 5 sơnam tus hơđơm 12 sơnam in. Nàng pơn jăt tai tơnguh uă khà cĭt vaccine kòp Kovid-19 ai mpồl sơnam do in, càr Gia Lai neh mờ gam lơh ngan lam lơh uă broă lơh, bè: Pơgồp bal niam mờ gah yal tơngĭt mờ mblàng yal jơnau, gah bơto bơtê tàm mblàng yal, hòi jà mè bèp kơnòm bơsram; sơlơ lòt sền, jăt sền, sồr ngan lam cĭt vaccine bơh kơnă hơđơm tơn.

Cau mblàng Lơ Mu K’Yến