VOV4.K’ho- Bal mờ ală càr tàm tiah Tây Nguyên, kòp sốt xuất huyết tàm càr Gia Lai kung gam gơlik geh kal ke. Tềng đap bơta do, gah lơh sơnơm càr dê neh lam lơh uă rơndap broă nàng kờñ rơcang sơndră mờ kơryan kòp. Tŭ do, kòp sốt xuất huyết  neh bơtờp uă tàm 16 bơh 17 kơnhoàl, thị xã, ƀòn dờng bơh càr Gia Lai dê mờ 308 nă cau bơtờp kòp, gơguh 57% pơndrờm mờ bal dùl tŭ nam lài.

Ƀak sĩ tàm Hìu sơnơm ƀòn dờng Pleiku gam kham mờ sơm dùl nă cau kòp sốt xuất huyết in

Ală kơnhoàl geh khà cau kòp sốt xuất huyết uă là Ia Grai, Ia Pa, Chư Prông, Krông Pa, Chư Pưh, Đăk Đoa mờ ƀòn dờng Pleiku bal mờ 112 tiah geh kòp. Ồng Đinh Hà Nam, Phó Kwang atbồ Sở Y tế càr Gia Lai pà git, kòp sốt xuất huyết digơlan gơlik geh kal ke tàm tơngai tus, gah lơh sơnơm càr gam pơn jat tai tơnguh uă broă gơ sơt sơmăc tàm ală tiah geh kòp, lam lơh niam broă dờp, sơm cau kòp nàng tơrmù ƀà khà cau gơbàn kòp sốt xuất huyết tàm mpồl bơtiàn.

Cau mblàng K’Duẩn