Càr Dăk Lăk gam lam lơh ring bal uă broă lơh nàng kờñ gròi sền mờ kơryan kòp mprơm gơlik mhàm, tŭ ală cau bơtờp kòp gơguh mhar mờ neh geh cau chơ̆t. Tus tŭ do, jơh gùt càr Dăk Lăk cih rờp rlau 2 rơbô 660 nă cau bơtờp kòp mprơm gơlik mhàm, kờp bal pah ngai geh bơh 30 tus 100 nă cau bơtờp kòp pa. Jơh ală sàh, sơnah ƀòn ndrờm geh cau kòp, tàm hơ̆ tơrgùm uă tàm sơnah ƀòn Buôn Ma Thuột, ală tiah bè Krông Păc, Cư M’gar, Sơn Hòa, Tây Hòa mờ Sông Hinh. Dùl nă cau chơ̆t neh geh cih dờp.

Anih duh broă Làng bol càr Dăk Lăk neh ai lơh jat sră nggal mhar, sồr ală tiah lam lơh broă gơ sơ̆t kih dà, lơh sàng goh tiah ơm kis jat tŭ tơngai; sơlơ tơnguh tai mblàng yal yờ tơnguh uă bơta gĭt wă ai làng bol in. Gah lơh sơnơm kung lam lơh broă lơh mblàng yal, tơngkah làng bol rcang lài pơs wàs sàng goh hìu đam, gơ sơ̆t sơrmăc, pleh gơtìp sơrmăc sồc mờ ală broă lơh di pal. Mơkung mut lơh bal ală broă lơh jat sền, lùp sền, bơsong tiah kòp mờ bơyai lơh tơrgùm phan kòp sơm kòp.