Tàm sơnam rơlao 70, pah drim, mò Nguyễn Thị Hoàng Minh, tàm Mpồl ƀòn 12, sơnah ƀòn Buôn Ma Thuột, càr Dăk Lăk kung gam tus sùm tàm anih tàp gym rềp tềng hìu nàng tàp pràn să jan. Mò Minh pà git, lài do mò neh geh tŭ kơlôi broă tàp gym là roh uă ngan priă mờ ờ di pal mờ cau dờng sơnam dê. Mơya tŭ bơta pràn kơl dang să jan gơmù, sùm jê tàm kồ jơng kồ tê, mò lơh ngan tus tàp gym mờ ală jơnau tàp di pal. Mờ bơh tŭ hơ̆, anih tàp gym gơs anih dong kờl mò tàp pràn să jan, ndrờm bal nùs nhơm, mờ geh pơgồp bal tai mờ oh kòn mờ ală bơyô dê. “Añ tus tàm anih tàp gym do neh rơlao 1 nam bloh. Lài ngan den ală oh bơto lơh ngan dong kờl mờ bơto añ ală broă ơwañ să di mơ. tơnơ̆ mờ tŭ tàp rê den añ gŏ să jan pràn niam, mhar, nùs nhơm tŭ lơi kung chờ hờp mờ gơboh kờñ tàm rài kis”.

Gam gơwèt mờ ồng Vũ Ngọc Dũng, tàm sơnah ƀòn Tuy Hoà, càr Dăk Lăk, môn plai tơnò là bơta chờ mờ kung là broă nàng ồng tàp pràn să jan tơnơ̆ mờ tŭ neh jơh sơnam lơh broă. Rơlao 10 nam đềt mềr mờ chi pah, ồng neh geh ờ uă khà jờng rơ tàm ală kấp, mơya bơta lơh ồng chờ ngan là geh pơ-ùr sùm lòt bal mờ ồng tàm ƀlàng tàp. “Lài do den añ nhơl plai kơƀàng, nhơl bơlai mờ coh plai. Mơya bơh tŭ broă pal tơnò gơguh pràn den rơlao 50 sơnam añ sơn đờm bơsram môn do. Bơh tŭ hơ̆ tus tŭ do kung tus bal uă ngan dơ̆ pơrlòng. Tàm hìu den geh pơ-ùr kung tus bal sơl mờ môn do, mìng là tài kờñ bơta pràn kơl dang să jan in mơ”.

Di lah bè tàp gym ha là plai tơnò geh ƀlàng nhơl, anih tàp mờ phan tàp den ală môn bè tàm pràn dưỡng siñ geh gal ngan cau dờng sơnam rơwah tài bơta geh uă mờ ƀuơn tàp. Ờ pal geh phan dong kờl, ală jơnau tàp ƀuơn niam, pơgồp bal tê jơng mờ sền gròi nhơm tă dong kờl cau tàp bic niam mờ lơhă rơlao, tơrmù jê kồ jơng kồ tê, tơnguh bơta pràn plai nùs, gùng mhàm, nhơm tă, tơrdih phan sa. Tŭ do, tàm càr Dăk Lăk geh uă mpồl tàp pràn să jan dưỡng sinh geh lơh mờ geh bơyai lơh sùm ndrờm bal, ai geh ƀlàng nhơl geh kwơ cau dờng sơnam in.

Ờ mìng tơnguh uă bơta pràn kơl dang să jan, bơh broă tàp tàm mpồl, ală cau gam geh dơ̆ nàng tìp bal, tam pà bal broă lơh mờng chài sền gàr bơta pràn kơl dang să jan tŭ sơnam neh kra, ai geh nùs nhơm chờ mờ nùs nhơm niam. Do kung là bơta niam dong kờl môn tàp pràn să jan do lơh geh uă bơh tiah drà tus tàm tiah ƀòn lơgar. Mò Huỳnh Thị Ba Lan, Mpồl tàp dưỡng siñ sơnah ƀòn Buôn Hồ pà git: “Mpồl dưỡng siñ bol añ geh 37 nă cau, lài ngan den tàp tơrgùm nàng chờ, tơnguh uă bơta pràn să jan. Tơnơ̆ mờ hơ̆ sơnah ƀòn geh crơng gơs mpồl mờ hòi jà jơh ală oh mi cau ùr tus bal, cèng geh bơta chờ bè nùs nhơm bal mờ pràn kơl dang să jan. Tŭ tàm sơnah ƀòn geh broă lơh den oh mi cau ùr tus bal mờ kung sùm lòt tìp bal mờ ală mpồl tàp pràn să jan càr Dăk Lăk dê”.

Mờ gùng dà broă lơh “Kis chờ, kis pràn, kis geh kwơ”, ală mpồl cau dờng sơnam tàm càr neh lơh geh broă rơndăp lơh nàng pơrjum, bơyai lơh ală jơnau tàp di pal mờ bơta pràn kơl dang să jan, nùs nhơm kờñ gơboh mờ bơta geh bơh tơl nă cau dê. Bơh tŭ hơ̆, broă tàp pràn să jan cau dờng sơnam ngai sơlơ bơtàu tơnguh, pơgồp bal tàm broă tơnguh uă bơta pràn kơl dang mờ pơgồp bal mpồl bơtiàn.

Jăt mò Triệu Thị Ngoan, Củ tịc Mpồl cau dờng sơnam càr Dăk Lăk pà git, tơnơ̆ mờ tơrgtùm bal càr, bŭ lah ờ hềt kơl jăp niam bè broă lơh, mơya tàm ală mpồl tàm ală ƀòn lài do, ală broă lơh bơh cau dờng sơnam kung gam geh lơh sùm. “Bŭ lah tŭ do Mpồl cau dờng sơnam ờ hềt geh crơng gơs tàm 102 sàh, sơnah ƀòn pa, mơya tàm uă mpồl tàm ală ƀòn lài do den ală mò ồng kung gam geh sùm broă lơh mờ bơyai lơh uă broă geh kwơ bè tìp bal niam chài, đơs crih tamya, tàp pràn să jan, tàp dưỡng siñ, tìp bal nhơl bơlai plai dờng,… nàng hòi jà cau dờng sơnam tus bal. Bơh tŭ hơ̆, cau dờng sơnam geh bơram tàp pràn kơl dang să jan, kis chờ, kis pràn, kis gơboh gơbài”.

Tŭ do, càr Dăk Lăk geh mờr 290 rơbô nă cau dờng sơnam. Bal mờ broă bơtàu tơnguh pràn bơh ală mpồl tàp pràn să jan mờ ală bơta kwơ mùl màl cèng geh, ngai sơlơ geh uă cau dờng sơnam tus bal tàp pràn să jan. Ală ƀlàng nhơl hơ̆ ờ mìng dong kờl cau dờng sơnam pràn kơl dang, kờñ gơboh tàm rài kis mờ gam lơh geh uă nùs nhơm kis niam, kis chờ - kis pràn– kis geh kwơ.