Bơh dùl mpồl dềt mờ phan bơna ờ geh uă, tus tŭ do, Anih kơlôi sơnơng neh gơ gơs là anih tờm lơh sơnơm rơcang gàr lam lài bơh tiah Tây Nguyên dê. Tàm 50 nam do, anih kơlôi sơnơng neh pơgồp bơnah kuơmàng ngan tàm ală broă lơh sơnơm tơmba dờng bè tơn jơh kòp lơng, tơn jơh uốn ván pa deh, kơryan ală kòp bơtờp sơbơng roh bè jê ndul gơ jroh, kòp rang, kòp mprơm gơlik mhàm, jơng tê bơr.

Đơs tàm dơ̆ bơyai lơh, Thứ trưởng Ƀộ Lơh sơnơm mò Nguyễn Thị Liên Hương cih dờp mờ jờng rơ ală bơta lơh ngan, bơta tă pơgồp bơh mpồl anih kơlôi sơnơng dê tàm 50 nam bơt bơtàu mờ dờng pràn. Mờ kung sồr, anih kơlôi sơnơng pal sền gròi tus broă lơh rơcang lài kơryan kòp, sơlơ tơnguh tai mblàng yal jơnau, bơto bơtê ală broă lơh sền gàr is pràn kơldang să jan tàm làng bol, rơcang lài kơryan kòp ờ bơ tờp, rơcang lài cau lơh broă nàng kơryan kòp bơtờp mờ ală broă lơh sơnơm mpồl bơtiàn jal mhar.