VOV4.K’ho- Tŭ do, ală tiah tàm gùt lơgar neh ai kơnòm bơsram in tus hờ hìu bơsram nàng bơsram tơn, geh bal kơnòm bơsram tàm sơnam neh geh cĭt vaccine kòp Kovid-19 mờ sơnam ờ hềt geh cĭt vaccine. Tàm tơngai kòp Kovid-19 pơn jăt tai gơbàn kal ke, anih lơh broă geh gơnoar neh geh ală broă lơh sơndră wơl loh làng ai jơh tơl ală jơnau digơlan sền gŏ cau F0 tàm hìu bơsram mờ pal rơcăng lài gùng dà broă lơh sơm kòp ai kơnòm bơsram bơtờp kòp Kovid-19 in.

Bulah khà kơnòm dềt bơtờp kòp Kovid-19, khà cau kòp gơbàn kơn jơ̆ dùl êt mơya kung gam geh sơl cau chơ̆t tŭ khà cau bơtờp kòp uă ir. Tŭ kơnòm bơsram lòt bơsram wơl, yal lài khà cau bơtờp kòp Kovid-19 tàm kơnòm dềt digơlan geh gơguh. Den tàng bè hơ̆, ală cau jak chài đơs sùm uă ngan jơnau rơcăng sơndră kòp mờ ờ lời uă ir kơnòm dềt bơtờp kòp tàm dùl tŭ bal, tài bơh tŭ do ală bơta sơnơm sơm kòp Kovid-19 ờ gŏ sồr ai ngui ai kơnòm dềt in. Kwang ătbồ Hìu sơnơm Kòp kơnòm dềt dà lơgar ồng Trần Minh Điển đơs là, broă lơh bè lơi nàng sền gàr ờdo ờdă ai kơnòm bơsram in tus hờ hìu bơsram geh uă bơta, tàm hơ̆ ală hìu bơsram, gơnoar ătbồ mờ gah lơh sơnơm tàm tiah hơ̆ lơh geh broă rơndăp lơh sơndră wơl ờdo ờdă ngan rlau jơh ai hìu bơsram in. Bal mờ hơ̆, ală mè bèp kờñ pal rơcăng lài nùs nhơm ai kòn in mờ bal mờ hìu bơsram pơlam kòn lơh jăt ală broă lơh rơcăng sơndră kòp, ngan là lơh jăt niam jơnau sồr 5K. Tŭ geh cau pin bơtờp kòp halà neh bơtờp virus Sars KoV-2 tàm ơdŭ bơsram, hìu bơsram pal kơ̆ dơn, pơgồp bal mờ hìu sơnơm tàm tiah hơ̆ nàng yal tus ală hìu bơnhă in nàng kờñ gĭt tiah lòt rê bơh kơnòm bơsram do dê. Ồng Trần Minh Điển, đơs: Bol he pal jòi kơrhia ngan tàm ơdŭ bơsram hơ̆ lơm mơkung gơtùi mìng bàr pe kơƀàng oh hơ̆ dê nggui lơm, bàr pe anih tiah oh hơ̆ nhơl lơm mờ bol he ờ gŏ di pal là til jơh mpồng dùl hìu bơsram halà til jơh mpồng dùl ơdŭ bơsram ờ. Jơnau đơs hìu bơsram ờdo ờdă geh tŭ ờ gŏ di là “ờ geh kòp Kovid” mờ jơnau đơs hìu bơsram ờdo ờdă là bol he pal lơh geh broă rơndăp lơh, bol he pal jòi mhar, bol he pal căng geh tiah tàm ală ù tiah hơ̆ den sền gàr geh ai hìu bơsram hơ̆ in ờdo ờdă.

 Tàm tŭ dilah kơnòm bơsram ờ bơtuah gơtìp bơtờp kòp Kovid-19 den ală mè bèp pal kơ̆ nùs, bañ rơngòt ir mờ kơlôi rơcăng ir. Tŭ kòn ơm tàm hìu, ală mè bèp pal jăt sền ală bơta gơ tơngŏ bơh kòp dê, bơta gơbàn ală bơta gơ tơngŏ kòp nàng dong kờl mờ yal mờ hìu sơnơm nàng kòn geh sơm kòp niam ngan rlau jơh. Kwang ătbồ Hìu sơnơm Kòp kơnòm dềt dà lơgar ồng Trần Minh Điển bơto sồr: Do là dùl bơta kòp bơtờp, den tàng bè hơ̆ broă ơm yah ngài kung là kwơmàng ngan. Dilah bol he ờ ai sau ơm yah ngài den ƀươn ngan digơlan lơh bơtờp ală oh dềt rlau in, hơ̆ sồng mè bèp, ồng mò tai, ngan là ală cau mè gam geh bun đơs pơnyơu bè hơ̆. Den tàng bè hơ̆, tàm tơl jơnau digơlan gơlik geh, tơl hìu bơnhă pal kơ̆ nùs bañ rơngòt mờ pal sền swì jăt jơnau bơto pơlam bơh gah lơh sơnơm dê bè broă sơm kòp tàm hìu bè lơi mờ tềl tơngŏ lơi là tềl tơngŏ kòp gơbàn kơn jơ̆, hơ̆ là kòp gơbàn kơn jơ̆ tus khà mờ pal lòt kham tàm ală hìu sơnơm halà kờñ pal mŭt piam kòp tàm hìu sơnơm, nàng sền gàr ờdo ờdă ngan rlau jơh ai ală sau in.

 Tàm dơ̆ pơrjum pa do bè broă lơh sơm kòp ai kơnòm dềt bơtờp kòp Kovid-19 in, Phó Thủ tướng Cíñ phủ ồng Vũ Đức Đam neh jàu Ƀộ Y tế in đơng lam, pơgồp bal mờ Ƀộ Giáo zụk mờ Đào tạo mờ ală anih lơh broă geh gơrềng geh broă rơndăp lơh gơwèt mờ ală jơnau digơlan gơlik geh tŭ kơnòm bơsram lòt tus wơl hờ hìu bơsram, geh kơnòm dềt bơtờp kòp Kovid-19. Mơkung mhar lơh sir, ai lơh jăt sră nggal bơto pơlam bè broă lơh ờs mờng mờ broă pơlam sơm kòp Kovid-19 gơwèt mờ cau hơđơm 18 sơnam, ngan là kơnòm dềt hơđơm 12 sơnam.

            Cau cih VOV1- Cau mblàng Lơ Mu K’Yến