VOV4.K’ho - Tàm càr Kon Tum bơh uă nam do neh gơtìp bơta y, ƀák sĩ tàm ală hìu sơnơm dà lơgar lơh dan lơh broă tàm tiah ndai mờ ơm lơh broă. Mờ càr tiah kơh bơnơm gam uă kal ke bè càr Kon Tum, broă ờ tơl cau lơh broă, tàm hơ̆ uă ngan là cau lơh broă geh bơta mờng chài, bơta ngăc ngar uă gah lơh sơnơm gam là nùs nhơm ờ sŭk tàm broă sền gàr bơta pràn kơl dang să jan làng bol dê. Tềng đăp mờ bơta mùl màl do, càr Kon Tum kung neh geh ală broă lơh nàng gàr geh cau lơh broă gah lơh sơnơm.

                        Ƀák sĩ hìu sơnơm càr Kon Tum tàm broă kham sơm kòp cau kòp in

Kờp bơh nam 2018 tus tŭ do, neh geh 59 nă ƀák sĩ, dược sĩ neh bơsram jơh đại họk lơh broă tàm ală hìu sơnơm dà lơgar lơh tàm càr Kon Tum dan tam gơl broă lơh mờ ơm ờ lơh broă. Mìng is 6 nhai do tàm càr do kung neh geh 3 nă ƀák sĩ mờ 1 nă dược sĩ dan tơn jơh lơh broă mờ hìu sơnơm dà lơgar lơh. Mò Huỳnh Thị Hồng, kwang bàng HĐÑZ càr Kon Tum tơlik nùs nhơm ờ sŭk tềng đăp mờ bơta cau lơh broă geh bơta mờng chài, bơta ngăc ngar uă bơh gah lơh sơnơm dan lik ờ lơh broă: “Hìu sơnơm càr Kon Tum bơh khà II guh khà I mờ 750 nơm jơnờng piam kòp den pal geh tơl cau lơh broă. Ƀák sĩ mờ cau lơh sơnơm dan tơn jơh lơh broă ha là tam gơl tiah lơh broă ƀuơn nàng broă lơh jŏ jòng geh lơh gơtìp tus mờ broă ờ tơl cau lơh broă gah sơnơm geh bơta niam uă, tàm hơ̆ uă ngan là tàm hìu sơnơm dà lơgar lơh”.

                            Cau lơh sơnơm càr Kon Tum tàm ală ngai kal ke tài bơh kòp kovid-19

Jăt ồng Lê Ngọc Tuấn, Củ tịc UɃÑZ càr Kon Tum đơs, jơnau tờm lơh gơlik bơta pah nam càr geh rơlao 14 nă ƀák sĩ, dược sĩ dan tam gơl tiah lơh broă, ơm ờ lơh broă là broă priă nhai mờ bơta niam lơh broă. Mùl màl pà gŏ, priă geh, bơta niam lơh broă tàm ală hìu sơnơm dà lơgar lơh tàm càr ờ uă rơlao mờ priă geh, bơta niam lơh broă tàm ală hìu sơnơm cau dùl nă să lơh is kung bè uă càr, ƀòn dờng ndai. Tài bè hơ̆, jăt ồng Lê Ngọc Tuấn đơs, kờñ gàr geh cau lơh broă gah lơh sơnơm pal geh broă bơsong ai gah lơh sơnơm dà lơgar lơh in: “Nàng gàr geh mpồl y ƀák sĩ pal tơnguh uă priă ai mpồl y ƀák sĩ gam lơh broă tàm hìu sơnơm dà lơgar lơh. Bơcri priă blơi phan bơna, phan lơh broă nàng ai geh anih lơh broă mpồl cau do in lơh broă niam rơlao. Geh broă dong kờl, broă bơto mờ pal tơnguh gơnoar lơh tờm uă rơlao ai ală hìu sơnơm dà lơgar lơh in nàng ai tơl bơta niam tơnguh priă geh ai mpồl y ƀák sĩ gam lơh broă tàm gah lơh sơnơm in”.

Kung jăt ồng Lê Ngọc Tuấn, Củ tịc UɃÑZ càr Kon Tum đơs, tềng đăp mờ bơta mùl màl y ƀák sĩ tàm ală hìu sơnơm dà lơgar lơh dan tam gơl lơh broă mờ ơm ờ lơh broă, nam 2020, Ƀan Thường vụ Tỉñ ủy Kon Tum neh geh gùng dà ai lài gơwèt mờ kwang bàng kông cứk gah lơh sơnơm tŭ lòt bơsram chuyên khoa I, chuyên khoa II geh dờp broă dong kờl bơto bơh kes priă. UɃÑZ càr Kon Tum kung neh ai geh rơndăp broă tơnguh bơtàu cau lơh broă càr dê tus nam 2030, wèt tus nam 2050, tàm hơ̆, ai geh ală broă lơh nàng tơnguh bơtàu cau lơh broă gah lơh sơnơm. Mơya tàm mùl màl pà gŏ, ală gùng dà broă lơh nàng gàr geh cau lơh broă gah lơh sơnơm càr Kon Tum kung gam ờ hềt lơh geh cồng nha mờ ờ ndrờm bal den tàng gam gơtìp broă kwang bàng, cau lơh broă gah lơh sơnơm dan tam gơl anih lơh broă, ơm ờ lơh broă bơh hìu sơnơm dà lơgar lơh.

Cau cih Khoa Điềm-Cau mblàng Ndong Brawl