VOV4.K’ho- Ngai 27/02, khà cau bơtờp kòp Kovid-19 tàm càr Gia Lai dơ̆ sơn rờp sơrlèt rlau 1 rbô nă cau tàm dùl ngai. Gơnoar atbồ càr neh lơh nền ai kơnòm bơsram mầm non mờ kấp 1 tàm ƀòn dờng Pleiku ơm ing broă lòt bơsram tơn tàm hìu bơsram, rê wơl broă bơsram pờ tơlik tàm internet bơh ngai do, 28/02. 2 tiah geh khà cau bơtờp kòp uă ngan rlau jơh tàm ngai 27/02 là ƀòn dờng Pleiku (356 nă) mờ kơnhoàl Đăk Đoa (198 nă).

Mpồl đơng lam rơcang sơndră kòp Kovid-19 càr Gia Lai pà git, tŭ do, uă cau bơtờp kòp Kovid-19 tàm mpồl bơtiàn tàm càr ờ hềt git loh bơh lơi bơtờp kòp, neh geh tềl tơnggŏ sền ờ sơp bơh làng bol dê, bơta do ƀuơn ngan gơlik geh bơta bơtờp uă kòp. Bè hơ̆ den tàng, mpồl đơng lam sồr làng bol pal sùm tơnguh jơnau rơcang ngac mơya ờ gŏ di rơngòt, kơlôi rơcang ir, lơh jat is ală broă lơh rơcang sơndră kòp Kovid-19.

Cau mblàng K’Duẩn