Jat lùp sền jat sền bơh gah lơh sơnơm dê, kih dà deh rơ̆ rài jơh bal ală phan ngui mờ he ờ kơlôi tus bè gri ơn dà bơh chi puh lơh pơnring bơta duh mrềt dê, lơh kòp sốt xuất huyết bơtờp uă bơh nggùl kàl duh dê. Tàm 5 nhai bồ nam 2024, jơh gùt càr Dăk Nông geh 463 nă cau bơtờp kòp sốt xuất huyết Dengue, gơguh uă nggùl dơ̆ pơndrờm dùl tŭ bal mờ nam 2023.

Kòp tơrgùm uă ngan rlau jơh tàm ală kơnhoàl tiah đah jum càr Dăk Nông dê là Dăk Song, Dăk R’lấp mờ ƀòn dờng Gia Nghĩa. Is ồn ngan là tàm ƀòn dờng Gia Nghĩa, jat sền bơh gah lơh sơnơm dê, tŭ do khà cau bơtờp kòp sốt xuất huyết neh rlau 330 nă cau tàm 100 rơbô nă làng bol, uă rlau 2,2 dơ̆ broă jàu rcang lài kòp. Ồng Êban Thanh Sơn, Phó Kwang atbồ Anih tờm gròi sền kòp tê jê să càr Dăk Nông yal, tơngŏ bơta kơ lôi sơnơng ngan kòp sốt xuất huyết rơ̆p bơtờp uă tàm ală nhai kàl mìu do. Gah lơh sơnơm gam jat sền tơl ngai nàng sền gĭt bơta cau kòp, rcang lài mpồl cau lơh broă, rơndeh rơndồ măi mok, phan bơna, dà sơnơm rcang lài bơsong ală tiah kòp.