VOV4.K’ho- Mho ngai 06/09, Mpồl lơh broă bơh Ƀộ Y tế dê bơh Thứ trưởng Ƀộ Y tế ồng Đỗ Xuân Tuyên lơh Kwang ătbồ mpồl neh geh dơ̆ lơh broă mờ Ủy ƀan Ñân zân càr Dăk Nông bè broă lơh bơtàu tơnguh gah lơh sơnơm yau mờ tŭ tơngai lơh jăt ală rơndăp broă lơh lơh sơnơm ƀòn lơgar ngui priă ODA.

Tàm dơ̆ lơh broă, Thứ trưởng ồng Đỗ Xuân Tuyên sồr càr Dăk Nông pal sền gròi bơtàu tơnguh mpồl cau lơh broă gah lơh sơnơm yau, pồ tơl Mpồl duh broă lơh sơnơm tiah đah mat tơngai lik gơ jăt bal mờ Hìu sơnơm ală kơnhoàl, rề ơnàng sươn chi sơnơm yau tàm ală hìu sơnơm xã; mơkung gờñ geh rơndăp ù tiah rề ơnàng bă ù tam tờm chi lơh sơnơm, ngan là tờm chi lơh sơnơm tam tềng hơđơm mƀur chi brê; sền gròi gơhòi gơ jà bơcri priă tam tờm chi lơh sơnơm gơ jăt bal mờ nhơl chờ.

Gơrềng tus cĭt vaccine kòp Kovid-19, Thứ trưởng sồr càr pal tơnguh mhar tŭ tơngai cĭt vaccine tơl jơh rlau tai mờ nùs nhơm ờ tŭ lơi tam gơl là cĭt rơcăng sơndră kòp bơtờp. Gơwèt mờ broă blơi phan ngui lơh sơnơm, sơnơm tơm ba, jòi cau blơi sơnơm, Thứ trưởng sồr càr Dăk Nông kờp sền wơl ală kơrnoăt, jơnau bơto pơlam nàng dan tă bơsong ală kal ke, kòl yan, tam gơl ală tơngume gam ờ dipal tai.

Cau mblàng Lơ Mu K’Yến