VOV4.K’ho- Ngai 13/07, Mpồl lơh broă bơh Ƀộ Y tế bơh ồng Bùi Khánh Toàn, Phó Kwang atbồ Viện Vệ sinh dịc tễ Tây Nguyên lơh kwang atbồ mpồl neh lòt sền broă lơh rcang sơndră kòp sốt xuất huyết tàm Dăk Lăk. Mpồl neh lòt sền tàm ƀòn lơgar, lòt sền broă lơh rcang sơndră kòp sốt xuất huyết tàm kơnhoàl Lăk, tiah gam là tiah geh uă bè ală cau bơtờp kòp sốt xuất huyết tàm càr dê mờ lòt sền broă lơh dờp mờ sơm kòp cau kòp sốt xuất huyết in tàm Hìu sơnơm dờng Tiah Tây Nguyên dê.

Ƀộ Y tế lòt sền kòp sốt xuất huyết tàm kơnhoàl Lăk

Jat ồng Bùi Khánh Toàn tŭ do kòp sốt xuất huyết tàm ù tiah càr Dăk Lăk dê gam gơlik geh kal ke, bơta digơlan bơtờp kòp tàm uă tiah tàm tơngai tus, den tàng bè hơ̆, bơdìh mờ broă lơh mblàng yal làng bol in lơh jat ală broă lơh rcang sơndră kòp, broă dờp mờ sơm kòp ai cau kòp sốt xuất huyết in kung dờng màng ngan rlau jơh. Kờp tus tŭ do, càr Dăk Lăk neh geh mờr 1 rơbô 300 nă cau kòp sốt xuất huyết, mờ 76 tiah kòp, gơguh uă rlau 4 dơ̆ pơndrờm dùl tŭ bal mờ nam lài. Kòp sốt xuất huyết geh tàm jơh ală kơnhoàl, thị xã, ƀòn dờng càr dê.

Cau mblàng K’Hạnh