Do là dơ̆ sơn rờp Dơ̆ jờng rơ cau ùr geh bồ tơngoh bơsram sră gah lơh sơnơm geh bơyai lơh nàng kờñ cih dờp ală tă pơgồp jơh nùs mờ geh cồng nha bơh ală cau dùl nă să geh pơn rơ jak dê tàm broă lơh bơtàu tơnguh lơh sa- mpồl bơtiàn mờ broă lơh rơcang sơndră kòp Kovid-19. Tàm khà 51 nă cau ùr geh bồ tơngoh bơsram sră pơn rơ jak gah lơh sơnơm geh pơn jờng dơ̆ do, geh 1 nă Giáo sư, 15 nă Phó Giáo sư, 17 nă Tiến sỹ, 9 nă Thạk sỹ, 1 nă điều zưỡng viên.

Đơs tàm dơ̆ bơyai lơh, Phó Thủ tướng ồng Trần Hồng Hà đơs niam ală tă pơgồp tàm broă lơh gròi sền, sền gàr pràn kơldang să jan làng bol bơh mpồl cau ùr geh bồ tơngoh bơsram sră gah lơh sơnơm dê đơs bal mờ 51 nă cau geh pơn rơ gơguh jak geh jờng rơ dơ̆ do đơs is. Kuơmàng, tàm rlau 3 nam do rơcang sơndră kòp Kovid-19, uă cau ùr geh bồ tơngoh bơsram sră neh ngai sơlơ tă pơgồp, kơlôi sơnơng khoa họk, geh tŭ ờ ngòt kal ke, ngòt rơngơt, mut tàm tiah tờm geh kòp nàng dong kờl, ai tơlik ală jơnau bơceh ngan ngồn, bơh hơ̆ rơcang sơndră geh cồng nha mờ kòp bơtờp.