VOV4.K’ho- Ngai 24/07, Ƀộ Y tế pơrjum pờ tơn tàm internet mờ ală cau jak chài gah broă lơh tàm lơgar mờ lơgar ndai bè bơta kòp rang dồ. Dơ̆ pơrjum neh ring bal đơs tus ngai 24/07/2022, Việt Nam ờ hềt gŏ cau lơi bơtờp kòp rang dồ. Bulah bè hơ̆, pơhìn kòp rang dồ digơlan mŭt tàm lơgar mờ lơh bơtờp kòp tàm lơgar he là gơtùi lơm, tài bơh kòp do neh gŏ tàm uă dà lơgar, bơta lòt rê tìp măt ƀươn ƀoài mờ ngai sơlơ gơguh uă đah Việt Nam mờ ală lơgar tàm dunia, tàm tiah do.

Ƀộ Y tế neh geh sră pơyua Ủy ƀan Ñân zân ală càr, ƀòn dờng in bè sơlơ jăt sền kòp rang dồ; rơcăng lài siñ phẩm xét nghiệm drơng kham mờ gĭt cau bơtờp kòp, ală Sở Y tế sơlơ jăt sền ală cau pin bơtờp tàm mpồng nhàr lơgar tơn, tàm ală hìu sơnơm mờ bơyai lơh mblàng yal tơnguh uă bơta gĭt wă ai làng bol in bè bơta kòp rang dồ mờ ală broă lơh rơcăng sơndră kòp ing.

Cau mblàng Lơ Mu K’Yến