Jăt tiến sĩ Fahad Razak, là dùl nă cau mờng chài lơgar Canada dê bè kòp Kovid-19 pà gĭt, ală jơi tam gơl să bơh virus Corona dê sùm gŏ tàm jơh gùt tŭ tơngai nhai hàm mờ nhai mrềt, gơlam tus bơta gơguh tai khà cau bơtờp mờ chơ̆t. Mờ jơnau do digơlan gơlik geh dùl dơ̆ tai tàm nam do. Tiến sĩ Fahad Razak đơs sùm, dilah bol he ờ gŏ dùl dơ̆ bơtờp pa tàm tơngai kòp Kovid-19 lơh bơtờp uă, den ală cau mờng chài gah broă do gơtùi yal bơr tơn jơh kòp dờng tàm kàl prang bồ sơnam pa.

Nàng kờñ pơn jăt tai ală broă lơh ngan nàng tơnguh mhar dơ̆ tam dră mờ kòp Kovid-19 gam ơm tàm tơngai “jal mhar ngan”, WHO geh jơnau sồr 6 broă lơh ai ală dà lơgar tàm mpồl in. Lài ngan là bơcri priă cĭt vaccine wil tơl ai 100% mpồl cau pơhìn bơtờp kòp uă ngan rlau jơh in. Bàr là pơn jăt tai xét nghiệm mờ sền swì rơndăp tăp sèng is gen virus nàng jăt sền ală jơi tam gơl să, tàm tơrgùm bal drơng broă jăt sền mờ xét nghiệm virus Sars KoV-2 mờ ală kòp gùng tă nhơm ndai, tàm hơ̆ geh kòp nggụ. Pe là pal geh dùl ròt ală broă sền gàr rơcăng lài cau kòp Kovid-19 in, tàm tơrgùm bal tàm ală broă sền gàr pràn kơldang să jan bơh sơnrờp; geh broă rơndăp lơh ai ală dơ̆ lơh bơtờp pa in bal mờ bơta rơcăng lài bè phan bơna, măy mok mờ cau lơh broă. Puan là lơh sùm ală broă lơh rơcăng kơryan lài mờ gròi sền bơtờp khuẩn tàm hìu sơnơm. Pơn jăt tai là ală Cíñ phủ pal tàm lùp loh làng mờ mpồl bơtiàn bè khăt dùl bơta tam gơl lơi tàm broă lơh rơcăng sơndră kòp Kovid-19.

Jơnau sồr rơcăng sơndră kòp Kovid-19 tàm bơta pa

Tàm Việt Nam, tơrgùm kờp bơh Ƀộ Y tế dê pà gŏ, bơh bồ nhai 10 tus ngai 24 nhai 10 do, Việt Nam gŏ mờr 22 rbô nă cau bơtờp pa kòp Kovid-19, kờp ờ hềt tus 1 rbô nă cau bơtờp pa pah ngai, gơmù rlau nggùl dơ̆ pơndrờm mờ nhai 9. Kờp tus ngai 23 nhai 10, jơh gùt lơgar neh cĭt geh mờr 262 tơlak ding vaccine kòp Kovid-19.

Đơs sồr lơh tàm Pơrjum sơlơ rơcăng sơndră kòp mờ broă lơh cĭt vaccine kòp Kovid-19 geh lơh tàm ngai 20 nhai 10 pa do, Thứ trưởng Ƀộ Y tế mò Nguyễn Thị Liên Hương sồr ală tiah pơn jăt tai sền gròi lam lơh jăt ală broă lơh rơcăng sơndră kòp bơtờp jăt jơnau sồr bơh Cíñ phủ dê, Thủ tướng Cíñ phủ dê mờ jăt jơnau bơto pơlam bơh Ƀộ Y tế dê, ală ƀộ, ngàñ geh gơrềng. Lơh jăt niam, kràñ cê jơh nùs, dùl ròt bal ală broă lơh rơcăng sơndră kòp bơtờp; kwơmàng pơn jăt tai lơh mhar cĭt vaccine kòp Kovid-19, cih yal wil tơl cồng nha cĭt tàm ală anih cĭt vaccine mờ mblàng yal jơnau tơnguh uă kơnòl mờ bơta gĭt wă bơh làng bol dê, mpồl bơtiàn dê...ngan là tŭ kàl mrềt prang mờr tus rềp geh pơgìn lơh gơguh tai ală cau bơtờp mờ mŭt piam kòp tàm hìu sơnơm.

Cau kòp Kovid-19 gam sơm kòp tàm hìu sơnơm

Tàm càr Dăk Lăk, bơta kòp Kovid-19 tàm nhai 10 ngai sơlơ gơmù bè khà cau bơtờp kòp. Kờp tus ngai 24 nhai 10, càr Dăk Lăk gŏ mờr 200 nă cau bơtờp kòp, gơmù rlau nggùl dơ̆ pơndrờm mờ nhai 9. Pal sền ngăc là geh bàr pe ngai tàm nhai 10, càr Dăk Lăk ờ gŏ cau bơtờp pa kòp Kovid-19. Mơya, nhai 10 càr kung geh 2 nă cau chơ̆t tài bơh kòp Kovid-19, jơh bal 2 nă cau kòp do ndrờm dờng sơnam, geh uă kòp tàm să mờ ờ hềt cĭt vaccine kòp Kovid-19.

Broă lơh cĭt vaccine kòp Kovid-19 kung gam geh sơl gah lơh sơnơm càr Dăk Lăk kràñ cê jơh nùs lam lơh tàm nhai 10. Kờp tus ngai 20 nhai 10 pa do, Dăk Lăk neh cĭt tơl ding dơ̆ dùl mờ ding dơ̆ bàr ai mpồl cau bơh 12 sơnam rlau hơđang in. Ding dơ̆ pe ai mpồl cau bơh 18 sơnam rlau hơđang in geh rlau 87,2% mờ ding dơ̆ 4 geh rlau 70%. Ding dơ̆ pe ai mpồl cau bơh 12 sơnam rlau hơđang in lơh geh mờr 75%. Dăk Lăk kung neh cĭt tơl ding dơ̆ dùl ai kơnòm dềt bơh 5 tus 11 sơnam in mờ ding dơ̆ 2 ai mpồl cau do in kung lơh geh mờr 56% sơl. Càr pơn jăt tai lơh sùm ală broă lơh rơcăng sơndră lài kòp Kovid-19 mờ 3 broă lơh tờm, là: xét nghiệm- ơm yah ngài mờ sơm kòp. Mơkung sồr jơh ală ƀan, ngàñ, mpồl cau, anih lơh broă, mpồl lơh broă bal mờ làng bol bal mờ gơ̆p lơh broă, pơn jăt tai lơh jăt niam jơnau sồr 2K mờ lơh jăt niam ală jơnau bơto sồr bè rơcăng sơndră kòp Kovid-19 tàm bơta pa bơh anih lơh broă Lơh sơnơm ală kâp dê sồr.