VOV4.K’ho - Tŭ do, gah lơh sơnơm gùt lơgar gam mhar cit sơnơm vaccine rơcang sơndră mờ kòp jơh nàng wèt tus mờ broă ờ geh gơtờp tàm mpồl bơtiàn gơwèt mờ kòp Kovid-19. Mờ broă sơm kòp cau F0 tàm hìu gơwèt mờ ală cau kòp ờ tơngŏ jroă geh cồng nha, gam rơhời ai rài kis rê wơl bè ờs.

Tềng đăp mờ khà cau gơtìp kòp Kovid-19 tàm mpồl bơtiàn gơguh uă, ƀòn dờng Đà Nẵng neh đơng lam chồl pràn broă lơh jăt hìu sơnơm ntrờn tàm ƀòn dờng nàng di tŭ sền gàr, sơm kòp geh cồng nha cau F0 tàm hìu.

                 Cau lơh sơnơm tàm hìu sơnơm ntrờn sơnah ƀòn Thanh Khê Tây tus kham cau F0 tàm hìu

Bơh tŭ hơ̆, tơmù bơta kal ke ai ală hìu sơnơm tàm broă sơm kòp mờ sền gàr bơta pràn kơl dang să jan cau kòp in. Sơnah ƀòn Thanh Khê Tây, quận Thanh Khê là dùl tàm uă tiah tàm ƀòn dờng Đà Nẵng lơh jăt broă lơh hìu sơnơm ntrờn nàng sơm kòp cau F0 tàm hìu in. Hìu sơnơm sơnah ƀòn gam dong kờl sơm kòp 147 nă cau kòp F0 tàm hìu, tus tŭ do mờr 50 nă cau neh bời kòp. Bác sĩ Đỗ Văn Đô, Kwang atbồ hìu sơnơm ntrờn sơnah ƀòn Thanh Khê Tây pà git, broă lơh pah ngai bơh cau lơh sơnơm tàm Hìu sơnơm là atbồ khà cau F0 jăt tơl mpồl cau kòp. Kwang bàng lơh sơnơm sùm lùp cau gơtìp kòp Kovid-19 bơh tàm điện thoại nàng git bè bơta pràn kơl dang să jan mờ bơto tàm broă sơm kòp tŭ geh jơnau kờñ: “Geh ờ uă cau kòp là geh tơngŏ gơsăp ntơh ha là jê ndul ha là ală bơta lơi den añ geh tus kham ală cau gơtìp kòp bè hơ̆ in. Lồi ƀùi mho, añ geh tơrgùm khà măt jơh ală cau kòp lơi mờ añ ờ hềt kham nàng sền geh broă pal bơsong tai lah ờ”.

Tàm quận Sơn Trà, ƀòn dờng Dà Nẵng pah ngai geh gŏ mờr 200 nă cau F0. Ală hìu sơnơm ntrờn bơh 7 sơnah ƀòn tàm quận do neh lơh broă, dong kờl Mpồl đơng lam rơcang sơndră mờ kòp quận atbồ, sền gròi broă sơm kòp cau F0 tàm hìu geh bơyai lơh niam rơlao.Tơl hìu sơnơm ntrờn geh rơcang 2 nơm jơnờng, geh tủ sơnơm, chèo, măi was huyết áp,... mờ ală phan drơng tàm broă xét nghiệm. Ồng Huỳnh Văn Hùng, Phó Củ tịc UɃÑZ quận Sơn Trà pà git, tài mpồl cau lơh broă lơh sơnơm ờ gal, den tàng quận pal hòi jà mpồl cau lơh sơnơm neh jơh sơnam lơh broă, cau lơh broă nùs nhơm dong kờl tus bal lơh broă mờ ală Hìu sơnơm ntrờn: “UɃÑZ ală sơnah ƀòn neh jà ală cau lơh broă bal kung bè ală cau lơh broă nùs nhơm dong kờl do tus bal lơh broă. Tus tŭ do, mờ khà cau sơm kòp F0 tàm hìu tàm quận là rơlao 1 rơbô 600 nă. Cồng nha tus tŭ do, bơta kòp kung gam geh sền gròi. Ală broă bơto pơlam kung geh bơsong ală jơnau dan, còp să cau kòp di tŭ”.

                                      Ồng Nguyễn Thanh Long, Ƀộ trưởng Ƀộ Y tế

Tŭ do, ƀòn dờng Đà Nẵng geh mờr 30 hìu sơnơm ntrờn geh lơh mờ gam lơh broă. Jăt jơnau yal, ală hìu sơnơm ntrờn do lài ngan neh tơnguh cồng nha broă lơh, dong kờl lơh gơmù kal ke tus tàm ală hìu sơnơm, sền gàr mờ sơm kòp geh cồng nha cau kòp F0 geh tơngŏ ờ jroă.

Jăt Ƀộ trưởng Ƀộ Y tế ồng Nguyễn Thanh Long yal, broă sơm kòp ai ală cau kòp Kovid-19 tàm lơgar he gam geh cồng nha ngan. Khà cau gơtìp chơ̆t ngai sơlơ gơmù. Lơh jăt Nghị quyết sồ 128 bơh Cíñ phủ bè broă gơdờp ờ do ờ dă, ndrờm bal, sền gròi geh cồng nha kòp Kovid-19, Ƀộ Y tế neh tam gơl tus mờ broă atbồ rềs àr di pal mờ broă lơh bal bơh broă tam dră mờ kòp gơtờp tàm dunia. Tàm hơ̆ uă ngan là tơnơ̆ mờ tŭ geh kơrnoăt lời cau F0 ờ jroă geh sơm kòp tàm hìu, broă kham sơm kòp geh gơmù kal ke, geh tơl bơta niam nàng tơmù cau gơtìp chơ̆t tài bơh kòp Kovid-19. “Kwơ màng ngan tŭ do là he neh cit tơl sơnơm vaccine tàm khà uă ngan, là 1 tàm ală lơgar geh tàm mpồl lài ngan bơh dunia dê bè broă cit tơl sơnơm vaccine. Mơya, bol añ kung gam ai, sơnơm vaccine là bơta tờm nàng ai rài kis rê bè ờs wơl, bal mờ ală broă lơh sơnơm tai. Den tàng, Ƀộ Y tế neh yal mờ Cíñ phủ, Thủ tướng Cíñ phủ lơh jăt broă cih sơnơm vaccine tàm nam pa mờ cit sùm tàm satềp, ờ geh ngai ơm rơlô mờ cit jơh ală cau tŭ tus tơngai cit. Gơwèt mờ ală làng bol rê satềp hờ ƀòn lơgar tờm den di gơlan dan cih măt cit tơn tàm ală ƀòn hơ̆”.

Ƀộ Y tế gàr tơl sơnơm vaccine rơcang sơndră mờ kòp Kovid-19 nàng cit làng bol in. Broă cit sơnơm vaccine ờ di là pal geh cit, mơya pal bơto sồr tus jơh aloă làng bol nàng git loh bơta kwơ, geh cồng nha bơh broă cit sơnơm. Mùl màl neh ai gŏ geh tus rơlao 80% ală cau gơtìp kòp Kovid-19 chơ̆t tàm tơngai pa do ndrờm ờ cit sơnơm vaccine mờ jơh ală cau do ndrờm là cau dờng sơnam, cau geh kòp lài. Ƀộ trưởng ồng Nguyễn Thanh Long đơs, broă cit sơnơm tàm nam pa geh pơgồp bal gờñ ai rài kis rê wơl bè ờs. “He neh glar bòl mờr 2 nam do mờ cồng nha he neh lơh geh là dờng màng ngan. Bol añ kung dan ưn ngài jơh ală hìu nhă bơh kwang bàng cau lơh sơnơm neh sền gròi, là anih kơl dìng nàng kwang bàng lơh sơnơm iang nùs lơh broă. Bol añ kung dan ưn ngài làng bol neh geh ală broă pơgồp bal, dong kờl bal, lơh broă bal mờ gah lơh sơnơm tàm broă sền gròi kòp gơtờp. Di tàm nam pa, dan pơyoa bơr chờ gờm tus mờ gùt mpồl cau lơh sơnơm dùl nam pa pràn kơl dang, gơboh gơbài mờ pơn jăt tai lơh geh cồng nha uă mờ kwơ màng ngan là gờñ gròi sền kòp gơtờp, gờñ ai rài kis bè ờs wơl nàng tơrgùm tàm broă tơnguh bơtàu lơh sa mpồl bơtiàn”.

Cau mblàng Ndong Brawl