Sùm tus hìu sơnơm dờng tiah Tây Nguyên, ồng Mai Thanh Nhàn ơm tàm xã Hòa Thắng, ƀòn dờng Buôn Ma Thuột, càr Dăk Lăk yal, ồng niam nùs ngan bè bơta tam gơl tàm ală sră pơ àr cih mat kham sơm kòp tàm hìu sơnơm: “Tŭ do cih mat kham sơm kòp ƀuơn ngan mờ ờ huan roh tŭ jơ. Lài do là pal ai sồ, hơ̆ sồng prap sră ƀảo hiểm, tơnơ̆ tŭ geh ƀák sĩ kham jơh den hơ̆ sồng lòt tơm priă mờ ai wơl sră ƀảo hiểm den tàng roh ngan tŭ jơ. Tŭ do ngui jat broă lơh do den mhar ngan”.

Lơh gơlik bơta ƀuơn ngan rlau jơh ai cau kòp in, broă lơh tam gơl sồ neh geh Hìu sơnơm dờng tiah Tây Nguyên lam lơh tàm uă broă bè: cih mat kham sơm kòp ƀảo hiểm y tế mờ kăn kước làng bol crăp cip, lơh sră tơm priă điện tử, tơm priă ờ ngui priă mat, dan cih lài tơngai kham tàm ứng zụng. Jat ồng Nguyễn Trí Dũng, Kwang atbồ Cơldŭ măi mok yal tơnggit jơnau đơs, tơl sră pơ àr gơnoar atbồ dà lơgar, giă priă kham sơm kòp mờ ngui măi mok yal tơnggit jơnau ndrờm lir loh làng lơm: “Phần mềm atbồ pa ƀuơn ngan ai cau kòp in lòt kham mờ sơm kòp, tài dong tơrmù broă pal cèng sră pơ àr lòt bal. Bơh hơ̆, hìu sơnơm kung ngui uă bơta bè khà di ngan, jơnau yal ƀảo hiểm y tế dipal”.

Tŭ do, kờp bal pah ngai, Hìu sơnơm dờng tiah Tây Nguyên dờp mờr 1 rbô 500 dơ̆ cau kòp lòt kham bal mờ rlau 1 rbô 600 dơ̆ cau kòp sơm piam tàm hìu sơnơm. Ƀák sĩ Trịnh Hồng Nhựt – Phó Kwang atbồ Hìu sơnơm pà git, tam gơl sồ neh cèng wơl ală tam gơl loh làng ngan tàm ală broă lơh: “Hìu sơnơm dờng tiah Tây Nguyên neh ngui dồ ròt uă phần mềm mờ ngui tàm broă kham sơm kòp kung bè atbồ ală phan bơna, măi mok nàng cèng wơl cồng nha kung bè tơrmù ƀà sră pơ àr lơh broă, lơh gơlik bơta ƀuơn ai cau kòp in mờ lơh gơlik bơta niam bè tŭ jơ ai ƀák sĩ in uă rlau tai nàng drơng cau kòp in”.

Ồng Nguyễn Hữu Vũ Quang, Phó Kwang atbồ Sở Y tế càr Dăk Lăk pà git, ờ mìng is gơ wèt mờ hìu sơnơm càr, mờ broă lơh tam gơl sồ gam lam lơh tàm gùt gah lơh sơnơm tàm càr. Jơh ală hìu sơnơm neh ngui phần mềm drơng broă lơh atbồ, kham sơm kòp, broă lơh cit sơnơm vaccine. Phần mềm atbồ lơh sơnơm kâp hơ đơm neh geh lam lơh tus 185 hìu sơnơm xã, sơnah ƀòn, thị trấn. Tŭ do neh geh 21 hìu sơnơm neh geh rơcang măi kham, pơlam kham, sơm kòp bơh ngài. Gah lơh sơnơm kung ngui phần mềm “Ƀák sĩ ai tơl hìu in” nàng tơnguh rlau tai broă geh dờp broă drơng ala kham sơm kòp ai làng bol in mờ tơnguh prap jak, bơta niam broă kham sơm kòp tàm ală hìu sơnơm.

Ồng Nguyễn Hữu Vũ Quang yal, tơngai tus, gah lơh sơnơm Dăk Lăk pơn jat tai tam gơl mờng kwèng lơh broă, tơnguh cồng nha atbồ mờ kung pơn jat tai tơnguh mhar tam gơl sồ: “Lài ngan là lơh anih prap jơnau yal sồ bơh sră cih kòp điện tử bơh làng bol dê nàng tam pà ală jơnau tơnggit do tàm ală anih tờm yal jơnau dà lơgar halà ală anih kham sơm kòp; dơ̆ 2 là ngui bơnàng jă sồ tàm broă lơh sơnơm, làng bol ngui hòi mat điệnt ử VNEID tơrgùm bơnàng jă sồ lơh sơnơm mờ anih prap jơnau dà lơgar; dơ̆ 3 là lam lơh broă drơng ala pờ tơlik tàm internet ai làng bol mờ mpồl lơh sa kă bro in, lơh ngan 100% broă drơng ala dà lơgar gùt kâp geh tơl sră pơ àr gơnoar atbồ”.