VOV4.K’ho- Drim ngai 10/3, ală hìu sơnơm dờng Tâm Anh pà git, kháng thể đơn zòng Evusheld bơh AstraZenaca dê- là kháng thể đơn zòng sơn rờp tàm dunia nàng rơcang sơndră kòp Kovid-19 neh geh Ƀộ Y tế ngan ngồn ai gơnoar ngui tàm lơgar Việt Nam. Ală hìu sơnơm do geh ai kháng thể đơn zòng Evusheld nàng cit ai mpồl cau geh jơnau pơhìn uă bơtờp kòp Kovid-19 kơn jơ̆ in. Mùl màl, kháng thể đơn zòng Evusheld bơh AstraZenaca dê geh cit ai ală cau geh kòp tàm să bè ờ pràn klờm, ờ pràn leh, gùng mhàm plai nùs, ơră, ntìng, kồ ntìng, đồm sơdàng, kòp klờm soh gơ kòl jŏ nam- COPD...

Kuơmàng là cau gơtìp gơmù bơta pràn ờ bơtờp kòp dimơ mờ kơn jơ̆ (tài bơh HIV, gam sơm kòp ung thư, bơkiar klờm, leh...) halà gơbàn ală kòp bè lupus toh pơrhê, as sồt kồ ntìng, ờ niam kồ ntìng... Krơi mờ sơnơm vaccine, mìng 2, 3 jơ tơnơ̆ tŭ cit Evusheld , să jan neh geh tơl khà kháng thể pal geh nàng sền gàr ờ bơtờp kòp Kovid-19 mờ cồng nha gơguh tus 83% mờ ờ geh cau lơi kòp kơn jơ̆ halà chơt să tàm sùm 6 nhai jat sền, jat cồng nha kơlôi sơnơng PROVENT bơh AstraZeneca dê.

Cau mblàng K’Duẩn