VOV4.K’ho- Ngai 17/3, tàm Hà Nội, Quân ủy Dà lơgar, Bộ Quốc phòng bơyai lơh tìp mat cau krơh niam kơnòm să pơn rơ jak, cau krơh niam kơnòm să gơn kơnờm bơtàu tơnguh gùt ling klàng nam 2020. Đại tướng ồng Ngô Xuân Lịch, Phó bí thư Quân ủy Dà lơgar, Bộ trưởng Bộ Quốc phòng tus bal mờ đơng lam dơ̆ tìp mat.

Nam 2020, broă lơh mpồl mờ srơh ơruh pơnu geh lam lơh tơl làm tàm mpồl ling klàng mờ uă ngan tơngume, broă lơh uă, lila, bơceh pa. Rơnàng kơnòm să ling klàng neh lơh ngan bơsong tơl bơta kal ke, kòl yan, lơh ngan tàm pơr lòng, lơh lài lơh jat geh cồng nha kơnòl broă chính trị bơh anih lơh broă, mpồl lơh broă dê. Nam 2020, kấp hơ đang atbồ tơn kấp hơ đơm neh jờng rơ mờr 2 rơbô nă cau krơh niam kơnòm să pơn rơ jak; kấp gơwèt Quân ủy dà lơgar- Bộ Quốc phòng jờng rơ 313 nă cau krơh niam kơnòm să pơn rơ jak; Mpồl duh broă kấp gùt ling klàng neh sac rơwah 10 nă cau krơh niam kơnòm să pơn rơ jak mờ 18 nă cau krơh niam kơnòm să gơn kơnờm bơtàu tơnguh.

Tàm dơ̆ tìp mat, Đại tướng ồng Ngô Xuân Lịch, neh jàu kơrnoat tơnguh griăt sĩ quan lài mờ tơngai pơr gon mờ  ai mut lơh brooă ling geh griăt mờng chài gơ wèt mờ 4 nă cau geh sră jờng rơ cau krơh niam kơnòm să pơn rơ jak gùt ling klàng nam 2020.

Cau mblàng K’ Hạnh