VOV4.K’ho- Pơn jat tai pơrjum dơ\ 3, Quốc hội kơnă XIV, drim do 7/6, ală kuang bàng Quốc hội cribơyai tàm hìu pơrjum bè rơndăp cih Nghị quyết bè bơsong dồs ờ niam bơh ală mpồl ai càn priă jền dê mờ Adat tam gơl, bơtơl bàr pe bơta bơh Adat ală mpồl ai càn priă jền dê. Lài hơ\ tàm ngai 26/5 pa do, cribơyai tàm mpồl bè rơndăp cih Nghị quyết bè bơsong dồs ờ niam bơh ală mpồl ai càn priă jền dê, ală kuang bàng đơs là: Dồs ờ niam geh sền là mhàm kơ\t gơkòl bơh rài lơh sa dê, kơryan bơta bơtàu tơnguh, pơhìn lơngăp lơngai priă jền dà lơgar, là jơnau ờ suk bơh cau te\ khà gùt lơgar dê.

Ală kuang bàng đơs là: broă ai ngui Nghị quyết kờn lơh tơrlòng lài bàr pe gùng dà broă lơh pa nàng dong kờl bơsong dồs ờ niam jat jơnau cih tàm Nghị quyết Dà lơgar 5 kơnă XII là kờn ngan mờ dipal. Ală kuang bàng sồr kờn pal geh sră nggal yal lơh loh bơh tài dồs ờ niam gơguh uă, khà dồs ờ niam tu\ do là nđờ, jơnau bơh tài gơlik geh dồs ờ niam gơguh mhar, mơkung pal tam cah rơndăp tăp sèng dồs ờ niam. Mơkung đơs uă kơrnoat pal jat ờ go\ di ngui kes priă dà lơgar dê nàng bơsong dồs ờ niam.

                                                      Cau cih mờ yal tơngi\t- Lơ Mu K’Yến