VOV4.K’ho - Tàm càr Dăk Lăk ală ngai lồi nam do, ală mpồl lơh broă, ală tiah gam mhar bơ̆t bơtàu lơh gơs git nđờ rơhiang nơm hìu dong kờl ală hìu rơƀah ring niam rài kis. Tàm tơngai kal ke tài bơh kòp gơtờp, ală hìu tam klăc neh lơh ram ală cau rơƀah tềng đăp mờ kàl mrềt.

                                    Ală mpồl lơh broă dong kờl pà hìu lŏ H' Nuyn Êban in

Ơm tàm hìu gam ƀô dà sơng pa, kòn klao dềt bơh lŏ H’ Nuyn Êban, kis tàm ƀòn Jung A, xã Ea Ktur, kơnhoàl Cư̆ Kuiñ ntoăt nhơl gùt dar hìu. Săp ñŏ chờ bơh kòn dềt bè gơlơh tơn jơh bơta mrềt bơh trồ tiah dê. Lŏ H’ Nuyn ngoh rơngăc đơs: “Añ chờ hờp ngan tài bơh tŭ do neh geh hìu pa nàng ơm. Lài do hìu nhă añ ơm kis tàm hìu sèt, tŭ do neh ờ ngòt tai tŭ trồ mìu ha là trồ tơngai tai. Añ ưn ngài ală cấp uă ngan neh lơh hìu pà hìu nhă añ in”.

Kung geh Kông ty điện lực Dăk Lăk dong kờl 60 tơlăk đong nàng lơh hìu tàm dơ̆ do sơl, lŏ H’ Blinh Niê, kis tàm ƀòn K’Niêt, xã Ea Ktur chờ hờp, 2 nă ùr bơklao, 4 nă kòn tŭ do ờ gam ngòt tai pah tŭ trồ mìu, càl dờng. “Ùr bơklao añ kal ke ngan, tŭ do geh điện lực dong kờl lơh hìu pa den chờ ngan. Ùr bơklao añ tam jà bal lơh ngan tàm broă lơh sa nàng klàs mờ rơƀah”.

                                               Hìu pa bơh hìu nhă lŏ H' Blinh dê

Mò H’ Kim Hoa Byă, Chủ tịch Ủy ban Mặt trận dà lơgar Việt Nam càr Dăk Lăk pà git, tơnơ̆ mờ tơngai lơh jăt broă tam cah ngài mpồl bơtiàn tài bơh kòp Covid-19, ală ngai lồi nam do, ală mpồl lơh broă, ală tiah tàm càr Dăk Lăk gam lơh ngan chồl mhar broă lơh gơs git nđờ rơhiang nơm hìu dong kờl ală hìu rơƀah ring niam rài kis. Jăt mờ hơ̆, tơl hìu geh dong kờl bơh 50 tus 60 tơlăk đong, cau tàm hìu nhă bal mờ ală gah, mpồl lơh broă tàm càr tă pơgồp tai bơta pràn bal mờ priă nàng lơh hìu niam rơlao. “Mìng is tàm nam do den Ủy ban Mặt trận dà lơgar càr neh geh dong kờl bơh ală cau geh nùs nhơm niam mờ kờp khà là 9 tơmàn đong, den neh tam pà tus ală kơnhoàl, ƀòn dờng mờ tus tàm tŭ do den neh lơh geh rơlao 165 nơm hìu. Hơ̆ là jăt khà priă geh tam pà, gam pơn jăt tai den đah Mặt trận geh ală broă dong kờl jăt mờ ală khà is ndai, kung bè ală cau geh nùs nhơm niam, ală mpồl lơh broă geh dong kờl den kung dong kờl tơn ai ală cau rơƀah tàm ală tiah in”.

Cau cih Minh Huệ-Cau mblàng Ndong Brawl