VOV4.K’ho - Bơh ngai 12 tus 17/8,  kes pria\ dong kờl kơnòm dềt càr Daklak geh lơh bal mờ Hìu sơnơm  càr, mpồl Operation Smile, mpồl bác sĩ Hìu sơnơm Y Dược  [òn dờng Hồ Chí Minh, hìu sơnơm Hữu Nghị Việt Nam-Cuba bơyai lơh broa\ lơh reh pơh mbùng ờ sa pria\ ai tus ala\ cau kòp gơbàn pơh mbùng tàm càr. Tàm ala\ ngai do, broa\ lơh neh kham tus 105 na\ cau geh bal cau dờng mờ kơnòm dềt gơbàn pơh mpùng, gơbàn as sồt tàm bơr, tàm  muh mat, tàm hơ\ geh 83 na\  cau neh geh reh ờ sa pria\.

           Tơl na\ cau gam geh dong kờl 100 rbô pria\ lòt rê, ala\ cau geh reh geh pà phan mờ dong kờl 400 rbô pria\ sa. Geh git,  bơh nam 2014 tus tu\ do,  kes pria\ dong kờl kơnòm dềt càr Daklak neh bal mờ mpồl Operation Smile neh reh kơnòm  gơbàn pơh mbùng ờ sa pria\ ai tus mờr 300 na\ làng bol tàm [òn lơgar.

Cau cih mờ yal tơnggit K’ Brọp