VOV4.K’ho – Cồng nha bơh nùs nhơm lam lài, bơceh pa bơh cau kơnòm să dê, hơ\ là bơta ngan ngồn geh đơs tờm bơh 5 nam mut lơh rơndap broă tơr lòng lài sac rơwah 600 nă cau geh bồ tơngoh bơsram sră kơnòm să jak ngan jơh bơsram đại học ai lơh Phó Chủ tịch UBND xã tàm càr Kontum. Tơnơ\ 5 nam geh lòng, jơh ală 18 nă cau geh bồ tơngoh bơsram sră kơnòm să lơh Phó Chủ tịch ală xã r[ah tàm càr neh brồ guh bơta pràn jak he dê, pơgồp bơnah bơtàu tơnguh lơh sa mpồl bơtiàn, chồl pràn broă tơn jơh jơgloh tơmù r[ah, hời rơ hời bơtàu tơnguh rài kis phan bơna mờ nùs nhơm ai làng bol tàm [òn lơgar in. Tàm dùl bơnah ndai, rơndap broă neh dong ală cau geh bồ tơngoh bơsram sră kơnòm să tàm [òn lơgar pin dờn rlau, tă pơgồp bơta pràn tàm ală gah broă lơh kuơ màng:

Jơh bơsram gah nông lâm nghiệp, Đại học Tây Nguyên nam 2011, A Dũng, kòn cau Sơdàng rê wơl [òn tờm he dê tàm xã Đak Na, kơnhoàl Tu Mơ Rông, càr Kontum tàm gơnoar broă là Phó Chủ tịch UBND xã. A Dũng pà git, să tờm bi go\ bơtuah ngan tu\ geh sac rơwah tus bal rơndap broă tơr lòng lài rơwah 18 nă cau jak chài kơnòm să ai rê lơh Phó Chủ tịch 18 xã r[ah tàm kơnhoàl Kon Plông mờ Tu Mơ Rông bơh càr Kontum dê. Geh tă pơgồp, geh ai go\ pràn jak tàm [òn tờm he dê, 5 nam sơr lèt gan mhar ngan. A Dũng kung gam kah bè ờs ngai sơn rờp ờ quèng dờp kơnòl broă, geh Đảng uỷ xã sồr drơng gah lơh sa xã dê mờ git nđờ bơta kal ke pal sơr lèt gan. Bi đơs: “Pah ngai, pah jiơ lơh broă, a` sùm jòi git, bơsram mờng chài, mơkung sùm tus tàm ală [òn nàng git bơta kơp kờ` bơh tơl [òn dê, tơnơ\ hơ\ den bơt bơtàu rơndap broă dong kờl bơtàu tơnguh lơh sa làng bol in. Tàm xã geh ală rơndap broă dong kờl bè broă lơh 135, broă lơh 30a, broă lơh 102, bơt bơtàu [òn lơgar pa bơh Chính phủ dê. Do là bơta pràn dong làng bol tơn jơh jơgloh tơmù r[ah kơ\ kơljap. Bơh nùs nhơm hơ\, a` kung neh mut ngui ală bơta git wă mờ he neh geh bơsram, neh geh bơto pơlam nàng dan bè broă ngui cau lơh broă, priă bơcri hơ\ bè lơi gơ in geh cồng nha. Hơ\ là broă atbồ bè priă bơcri. Dơ\ 2 là broă lam sồr làng bol ngui priă bơcri hơ\ tàm broă bơtàu tơnguh lơh sa mờ priă lơh geh jơnhua rlau.”

Bơta [uơn go\ ngan rlau jơh tàm ală xã r[ah geh ai Phó Chủ tịch xã di rơndap broă 600 tàm càr Kontum là nùs nhơm lơh broă, đơng pơlam bơh gơnoar atbồ xã dê bè geh tai bơta pràn pa. Gam kah tàm nhai 7 nam 2013, tu\ xã Đak Nên, kơnhoàl Kon Plông nisơna pal bơyai lơh ntrờn rlau 1 rbô nă cau lik bơh tiah tơnau dơng dà hìu mai\ pờ tơlik ồs đèng Đak Đrinh pleh pơhìn gơtìp dà ko\ dà cò ngơr bam, Phó Chủ tịch xã Bùi Thị Việt ờ ngòt ngai mang mìu càl tơngai duh tus tơl [òn, tìp tơl nă cau, mblàng yal, lam sồr nàng làng bol in ntrờn. Halà Phó Chủ tịch xã Đak Tăng Trần Bảo Vân Đài drơng broă chài rơgơi mpồl bơtìan neh bal mờ gơnoar atbồ xã, lam sồr geh yă bơta bơcri priă ai broă lơh bơto bơsram in. Nam 2015, xã Đak Tăng geh dờp lơh jơh broă bơto bơtê wơl kai mầm non 5 sơnam mờ gàr niam cồng nha bơto bơtê wơl cấp 1, cấp 2… Mùl màl ai go\, sơr lèt gan kal ke ờ geh mờng chài kung bè uă bơta lòng tu\ tus lơh broă tàm ală xã uă kal ke, bal mờ uă ngan làng bol là cau kòn cau, 16 nă Phó Chủ tịch xã geh mat tàm ngai tơn jơh rơndap broă 600 bơh càr Kontum dê ndrờm lời wơl bơta kah kir, lời wơl uă nùs nhơm niam mờ gơnoar atbồ kung bè làng bol tàm [òn lơgar tiah mờ khi lơh broă. Đơs bè cau dong broă he in là Phó Chủ tịch xã Đinh Thị Hạnh, ồng Châu Văn Lâm, Chủ tịch UBND xã Pờ Ê, kơnhoàl Kon Plông đơs bè do: “Mìng is mờ bi ùr Đinh Thị Hạnh di rơndap broă 600 bè pràn jak den là cau geh bơta do, nhap nhar, ngac ngar, broă mờ UBND jàu den lơh jơh niam. Tàm broă bơt bơtàu [òn lơgar pa, Phó Chủ tịch xã do kung ơm tàm Mpồl đơng lam bơt bơtàu [òn lơgar pa xã dê. Xã sồr bi ùr Hạnh drơng broă lơh sồ 17 bè tiah ơm kis. Nam 2012, tu\ bi ùr Hạnh dờp broă lơh, den broă lơh bè tiah ơm kis ờ hềt lơh geh khà tơl, bơta chài git wă làng bol dê ờ uă den tàng rài kis pah ngai kung bè kloh niam [òn lơgar tung lơtang ngan. Tus tu\ do, mờ bơta lơh broă bal bơh cấp uỷ, gơ noar atbồ tàm [òn lơgar kung bè să tờm bi ùr Hạnh den tu\ do broă lơh sồ 17 neh lơh jơh.”

Bơta kuơ màng nàng rơndap broă tơr lòng lài 600 nă cau jak chài kơnòm să jơh bơsram Đại học ai rê lơh Phó Chủ tịch UBND xã tàm 62 kơnhoàl r[ah gùt lơgar geh cồng nha tàm Kontum, jat jơnau đơs bơh càr dê là kơnờm geh bơta sền gròi, đơng lam krà` cê bơh Chính phủ bal mờ ală gah sơnah lơh broă dà lơgar. Bal mờ hơ\, ală đội viên geh sac rơwah tus bal rơndap broă là ală cau geh mờng chài lơh broă, geh Mpồl atbồ rơndap broă bơyai lơh bơto pơlam chài git wă atbồ dà lơgar kung bè ờ uă pràn jak kuơ màng lài mờ tu\ rê lơh broă tàm xã. Gơnoar atbồ ală xã ai geh bơta [uơn nàng lơh broă, tu\ tơngai nàng ală đội viên lòt sền bơta geh ngan, git loh bè [òn lơgar mờ rơcang tơl niam nùs nhơm lài mờ tu\ mut lơh kơnòl geh jàu. Jat ồng Lê Viết Nam, Phó kuang atbồ Sở Nội vụ càr Kontum, bơta kuơ màng tai là ală đội viên tus bal rơndap broă neh brồ guh nùs nhơm lam lài, bơceh pa cau kơnòm să dê nàng lơh geh cồng nha: “Sền bal ală oh neh lơh niam kơnòl geh jàu. Tàm tu\ mut lơh kơnòl, ală oh neh lơh niam kơnòl geh jàu, brồ guh bơta pràn jak să tờm dê. Jơh ală oh ndrờm geh bơto bơtê tơl niam. Bè nùs nhơm chính trị, rài kis là niam ngan, rềp mềl mờ làng bol, geh gơnoar atbồ tàm [òn lơgar đơs niam ngan. Gơnoar atbồ tàm [òn lơgar, ngan là UBND xã đơs niam ngan bơta tus bal ală oh dê tàm bơta bơtàu tơnguh lơh sa mpồl bơtiàn [òn lơgar dê, ngan là bơta tus bal tàm broă lơh bơt bơtàu [òn lơgar pa kung bè broă lơh tơn jơh jơgloh tơmù r[ah.”

Sơr lèt gan 5 nam tă pơ gồp, ală broă lơh ngan bơh ală đôị viện lơh Phó Chủ tịch xã tàm 2 kơnhoàl r[ah là Kon Plông mờ Tu Mơ Rông, càr Kontum dê neh geh cih dờp. Geh 13 nă đội viên 5 nam sùm geh ală tiah đơs là lơh jak ngan kơ nòl geh jàu, 15 tàm khà 18 nă đội viên geh rơndap lài at ală gơ noar broă Ủy viên Ban chấp hành Đảng bộ, Ủy viên Ban Thường vụ Đảng uỷ kơnă xã, Bí thư, Phó Bí thư Đảng uỷ xã, Chủ tịch UBND, HĐND xã tơngai bơh nam 2015 tus nam 2020, 14 nă đội viên geh tơmut Đảng tàm tơngai tus bal rơndap broă, 6 đội viên jơh bơsram Trung cấp Lý luận Chính trị. Bơta chờ hờp rlau là 16 tàm khà 18 nă đội viên geh mat tàm ngai tơn jơh rơndap broă ndrờm geh rơndap at ală gơnoar broă kuang bàng, cau lơh broă sa priă nhai dà lơgar kơnă xã tơnơ\ mờ tu\ rơndap broă tơn jơh.

                                                   Cau cih mờ yal tơnggit K’Duẩn