VOV4.K’ho - Bơsram mờ lơh jăt ơnà jăk Bác Hồ, rơlao 10 nam do, Ủy ban Mặt trận Dà lơgar xã Quảng Hiệp, kơnhoàl Cư̆ Mgar, càr Dăk Lăk neh lơh jăt broă lơh tềm pềr “ròng sur ù”. Broă lơh dềt mờ mùl màl den tàng neh hòi jà geh gal làng bol tus bal, tềm pềr geh git nđờ tơmàn đong dong kờl cau rơƀah, làng bol kòn cau lơh hìu ơm, tơnguh bơtàu broă ròng phan brồ guh klàs mờ rơƀah.

Ngai dờp hìu Tam klăc geh Ủy ban Mặt trận Dà lơgar xã Quảng Hiệp dong kờl, lŏ Nguyễn Thị Ngoan kis tàm ƀòn Hiệp Thịnh, xã Quảng Hiệp, kơnhoàl Cư̆ Mgar, càr Dăk Lăk ngoh rơngăc ngan tŭ kơ̆p kờñ geh hìu lơh kơl jăp neh gơs mùl màl: “Añ gơtìp koĕt kơl te bơh dềt tus tŭ do broă lơh sa gơtìp kal ke. Kơnờm mờ gơnoar atbồ xã tàm do neh dong kờl ờ uă priă hơ̆ sồng añ càn tai nàng lơh gơs dùl nơm hìu. Tŭ do, añ lơh ngan nàng tơm jơh dồs, geh priă ròng kòn bơsram. Hìu nhă chờ hờp ngan, ưn ngài Dà lơgar, ală cau geh nùs nhơm niam, đah mặt trận neh dong kờl hìu nhă añ”.

Broă dong kờl bơh Ủy ban Mặt trận dà lơgar xã Quảng Hiệp neh pơgồp bal tàm broă ai hìu nhă ồng Lô Hoàng Thuận klàs mờ rơƀah

Hìu nhă lŏ Ngoan là dùl tàm git nđờ jơ̆t hìu kis tàm xã Quảng Hiệp geh dong kờl lơh hìu ơm bơh ală “sur ù” geh tềm pềr bơh đah Mặt trận Dà lơgar xã lam sồr. Ờ mìng dong kờl bè hìu ơm, ală “sur ù” tàm xã Quảng Hiệp gam dong kờl phan tam, phan ròng, ai geh bơnàng jă ală hìu nhă rơƀah in tơnguh bơtàu lơh sa. Ồng Lô Hoàng Thuận, kis tàm ƀòn Hiệp Tiến yal, nam 2018 ồng gơtìp rềs àr mờ gơtìp lơng dùl đah să, hìu nhă gơtìp kal ke. Mặt trận Dà lơgar xã neh blơi pà hìu nhă ồng in 2 nơm be deh kòn. Tus tŭ do, be neh deh tus rơlao jơ̆t nơm. Rài kis hìu nhă rơhời ring niam. “Hìu nhă añ geh Ủy ban Mặt trận Dà lơgar xã Quảng Hiệp neh sền gròi, dong kờl pà hìu nhă añ ih 2 nơm be ròng kung neh 2 nam, tŭ do mpồl be hìu nhă añ neh tus 13 nơm, nàng hìu nhă lơh ngan lơh broă sa, brồ guh klàs mờ rơƀah”.

Xã Quảng Hiệp tŭ do geh rơlao 15 rơbô nă làng bol, mờ 13 jơi bơtiàn kòn cau ơm kis bal, rài kis bơh làng bol gam uă kal ke, tàm hơ̆ uă ngan là tàm ală ƀòn geh gal làng bol kòn cau. Bơh nam 2011, ủy ban Mặt trận Dà lơgar xã Quảng Hiệp neh lam sồr ròng sur ù, ai geh kes priă nàng dong kờl cau rơƀah geh tơl bơta pràn nàng sơrlèt. Ồng Hoà Mạnh Quân, Chủ tịch Ủy ban Mặt trận Dà lơgar xã Quảng Hiệp pà git, tus tŭ do, kờp jơh khà priă sur ù tềm pềr geh rơlao 2 tơmàn đong, pơgồp bal tàm broă dong kờl git nđờ jơ̆t hìu klàs mờ rơƀah. “Tàm ală nam do, broă lơh do geh lơh uă ngan, bơh ală cau dờng sơnam hơ̆ sồng uă ngan là ală nam pa do geh uă ală kơnòm dềt tus bal broă ròng sur ù. Tàm 11 nam do, bol añ neh lơh geh 27 nơm hìu ai hìu cau rơƀah in, dong kờl lơh niam wơl 12 hìu, di tŭ dong kờl rơlao 60 hìu nhă, cau dùl nă să gơtìp rềs àr, kòp tê jê să bơh sur ù do. Bơh nam 2017, bol añ lơh jăt broă dong kờl sơntìl phan ròng, phan tam ai hìu rơƀah in, tus tŭ do kờp jơh mpồl be neh geh rơlao 700 nơm”.

“Ròng sur ù”, dùl broă lơh bŭ lah dềt, mơya mùl màl ngan neh gơs broă lơh dờng, hòi jà geh gal ală làng bol kis tàm xã Quảng Hiệp, kơnhoàl Cư̆ Mgar, càr Dăk Lăk tus bal. Do kung là broă lơh di pal ngan nàng pơgồp bal tàm broă bơ̆t bơtàu rài kis pa tàm ƀòn lơgar.

Cau mblàng Ndong Brawl