VOV4.K’ho-Pôs ling sền gàr tiah nhàr dà lơgar Lai Hoà, cau ling sền gàr tiah nhàr dà lơgar Sóc Trăng là dùl tàm ală pôs ling sền gàr tiah nhàr dà lơgar pơnrơ ngan tàm broă lơh jăt rài kis lơh broă sa mpồl bơtiàn ai làng bol in, tàm hơ̆ uă ngan là gơwèt mờ làng bol kòn cau kis tàm do. Mìng is broă lơh Hìu sơnơm ling klàng mờ làng bol pơgồp bal ờ mìng lơh niam broă sền gàr bơta pràn kơl dang să jan kuang bàng, cau ling sền gàr tiah nhàr dà lơgar in mờ gam lơh niam broă kham sơm kòp ai làng bol kis tàm do in.

Lai Hoà là xã gam uă kal ke bơh thị xã Vĩnh Châu dê, xã geh gal làng bol kòn cau Khmer, làng bol kis mìng mờ broă lơh sa suơn sre mờ lòt lơh ka tàm dà lềng. Den tàng, nàng kờñ lòt lơh broă, làng bol mờng tus kham kòp bơh gờñ ngan. Jăt Thiếu tá Thái Minh Phong, Kuang atbồ Hìu sơnơm Ling klàng mờ làng bol lơh bal tàm pôs ling sền gàr tiah nhàr dà lơgar Lai Hoà nàng kham kòp làng bol in di tŭ, di 6 jơ drim pah ngai là kuang bàng lơh sơnơm tàm hìu sơnơm neh gŏ măt nàng kham, sơm kòp làng bol in. Tàm hơ̆ uă ngan là làng bol tus hìu sơnơm kham kòp geh uă ngan bơdìh jơ lơh broă, den tàng, hìu sơnơm do tam pà kuang bàng lơh sơnơm lơh broă ngai kung bè mang nàng drơng niam broă sền gàr bơta pràn kơl dang să jan mờ lơh gơs kơnòl bơh cau lơh sơnơm dê gơwèt mờ cau kòp. “Kuang bàng, cau ling, cau lơh broă tàm hìu sơnơm do drơng broă lơh đềt mềr ngan, làng bol tus den he kham, sơm kòp, ờ lời làng bol kơ̆p jŏ. Kham mờ pà sơnơm di tŭ nàng làng bol gam lòt lơh broă tai. Làng bol đơs niam ngan hìu sơnơm do”.

Tài broă lơh jơh nùs mờ đềt mềr bơh cau lơh sơnơm kling klàng dê mờ jơh nùs mờ cau kòp den tàng neh ai geh nùs nhơm pin dờn ai làng bol in. Tŭ do, tàm 1 ngai, hìu sơnơm geh dờp kham mờ pà sơnơm rơlao 30 nă cau in. Y sĩ Kiên Na Riêl, kuang bàng lơh broă tàm hìu sơnơm do pà git, añ là cau Khmer den tàng wă loh làng bè rài kis bơh làng bol kis tàm ƀòn do, ờ hoan git đơs dà yoan. Tŭ gŏ cau lơh sơnơm tus gờñ nàng kham, đơs dà kòn cau Khmer mờ bơto sồr jơh nùs tàm broă sền gàr să jan den làng bol chờ hờp ngan. Do kung là bơta pràn nàng cau lơh sơnơm tàm hìu sơnơm ling klàng bal mờ làng bol lơh bal tàm pôs ling sền gàr tiah nhàr dà lơgar Lai Hoà lơh niam kơnòl să tờm dê. “Uă làng bol ờ wă dà yoan, tŭ he đơs dà kòn cau Khmer den chờ ngan. Tŭ he git đơs dà kòn cau Khmer den kung ƀuơn bơto sồr làng bol tàm broă ngui sơnơm, bơto sồr tàm broă sền gàr bơta pràn kơl dang să jan, broă rơcang sơndră mờ kòp... bè di lah gơtìp kòp sốt xuất huyết, gơguh huyết áp ha là kòp đồm sơdàng...”.

Tài ngài mờ tiah tàm gùt xã dê, den tàng geh uă làng bol kis tàm ờ uă ƀòn bơh xã Vĩnh Tân dê, ală ƀòn Prey Chóp, Prey Chóp A, Prey Chóp B gơwèt xã Lai Hoà ndrờm tus kham, sơm kòp tàm hìu sơnơm do. Thiếu tá Thái Minh Phong, Kuang atbồ hìu sơnơm ling klàng mờ làng bol lơh bal tàm pôs ling sền gàr tiah nhàr dà lơgar Lai Hoà pà git, làng bol kis tàm ală tiah jăt gah dà lềng bơh thị xã Vĩnh Châu, càr Sóc Trăng bal mờ làng bol kis tàm xã rềp bal mờ càr Bạc Liêu kung tus tàm do nàng kham mờ sơm kòp. Pah nam, Hìu sơnơm bơyai lơh kham, sơm kòp mờ pà sơnơm ai di pơgăp 10 rơbô nă cau kòp in. Bal mờ hơ̆, hìu sơnơm gam lam sồr làng bol bè broă sơndră mờ ờ uă bơta kòp bè: Sốt rét, kòp jơng tê bơr, kòp sốt xuất huyết... tàm hơ̆ uă ngan, kuang bàng lơh broă tàm hiù sơnơm geh tus tơl hìu nàng lam sồr bè broă rơcang sơndră mờ kòp Covid-19 nàng làng bol in wă. Bơh tŭ hơ̆, geh tus bal mờ gơnoar atbồ tàm broă rơcang sơndră mờ kòp Covid-19 geh cồng nha. “He kung lam sồr pah ngai, bè pà sră lam sồr bè kòp Covid-19, tàm tơngai do geh tơngŏ gơtìp wơl den hìu sơnơm kung lam sồr làng bol bañ tơrgùm gal cau, pơn chèo, lơh kloh să jan mờ sơƀong, pơs wàs kloh niam hìu đam. Lam sồr pah ngai, di lah làng bol geh tơngŏ duh să uă den lam sồr làng bol ơm tàm hìu, cau lơh broă bơh hìu sơnơm tus was bơta duh dùol ngai 2 dơ̆ nàng sền gròi”.

Tŭ do, Hìu sơnơm ling klàng bal mờ làng bol pôs ling sền gàr tiah nhàr dà lơgar Lai Hoà geh 5 nă kuang bàng lơh sơnơm nàng drơng tàm broă kham, sơm kòp. Bŭ lah ờ hềt geh bác sĩ mơya hìu sơnơm do kung neh geh nùs nhơm pin dờn làng bol dê tàm broă tus kham, sơm kòp. Gŏ làng bol ờ ngòt gùng ngài tus hờ hìu sơnơm nàng kham kòp, ală cau ling, bác sĩ sùm lơh ngan jơh nùs tàm broă sơm kòp, bŭ lah trồ ngai ha là trồ mang. Nùs nhơm chờ bơh làng bol tŭ geh bời kòp là dùl bơta pràn nàng ală cau lơh sơnơm lơh ngan broă, kis rềp mờ làng bol, lơh gơs kơnòl geh jào.

Neh mờr 20 nam do, Hìu sơnơm ling làng bal mờ làng bol tàm pôs ling sền gàr tiah nhàr dà lơgar Lai Hoà, cau ling sền gàr tiah nhàr dà lơgar càr Sóc Trăng neh gơs anih pin dờn, cèng geh nùs nhơm kơ̆p kờñ, chờ hờp ai cau kòp rơƀah in, tàm hơ̆ uă ngan là làng bol kòn cau Khmer kis tàm tiah nhàr dà lơgar rềp mờ dà lềng.

Cau cih VOV4- Cau mblàng Ndong Brawl