VOV4.K’ho- Ngai 12/03, tàm xã Hòa An, kơnhoàl Phụng Hiệp, càr Hậu Giang, Công ty Cổ phần Halcom Việt Nam mờ Tập đoàn Shizen Energy (Nhờk) bơyai lơh dơ̆ sơn đờm mut ngui Hìu măy đèng mat tơngai Hậu Giang. Ồng Trần Thanh Mẫn, Chủ tịch Ủy ban Mặt trận dà lơgar Việt Nam tus bal.

                                              Bơhiàn koh biài sơn đờm mut ngui hìu măy

Do là rơndap lơh đèng mat tơngai sơn rờp geh sơn đờm mut ngui, lơh gơlik đèng tàm bơr lŭ bal tàm che ồs đèng dà lơgar tàm tiah ring dà dờng Cửu Long. Hìu măy đèng mat tơngai Hậu Giang kờp jơh priă bơcri lơh là 700 tơmàn đong. Priă lơh geh kờp dŭ bơh Hìu măy dê pơgap 80 tơmàn đong dùl nam. Do là rơndap broă lơh Hìu măy đèng mat tơngai sơn rờp mut lơh broă tàm càr Hậu Giang, pơgồp bơnah ngui geh cồng nha bơta pràn bức xạ đèng mat tơngai tàm Hậu Giang dê mờ di pal mờ broă lơh jŏ jòng bơtàu tơnguh ồs đèng lơh gơlik wơl tàm Việt Nam jat nùs nhơm Nghi quyết sồ 55 bơh Bộ Chính trị dê kung bè broă rơndap lơh bal bè đèng mat tơngai tàm càr Hậu Giang dê.

Cau mblàng K’ Hạnh