VOV4.K’ho - Ntum Cư\ Pơng, kơnhoàl Krông Buk la ntum tiah kac màng bơh càr Dak Lak. Geh Đảng, Gơnoar atbồ lơgar sền gròi, ntum Cư\ Pơng tu\ do neh gơ gơs la anih  àng ngan bè bơtàu tơngguh lơh sa, mpồl bơtìan, rài kis bơh làng bol sùm  bơtàu tơngguh, ngap lơngai ờ do ờ da\  gùng dra\ bal –mpồl bơtìan [òn lơgar sùm geh sền gàr niam.

            Tàm dơ\ tam lơh  mờ Mỹ tơng klàs dà lơgar, làng bol ala\ kòn cau ntum Cư\ Pơng, kơnhoàl Krông Buk, càr Daklak tam klac dùl nùs jat  Đảng, ntàu tam lơh nàng ting bơtrơh cau sò tơm tus sơ gràm phà. Làng bol ntum Cư\ Pơng neh khin cha jak chài ngan gàr kơljap anih lơh broa\, geh pơnjat tai dong ai pà phan git nđờ rbô tấn phan sa ai cau ling in.

            Rlau 10 nam  tus tu\ do,  Cư\ Pơng neh geh tam gơl dờng. Khà hìu nha\ làng bol gơguh ua\ pơndrờm mờ rlau 2.100 hìu nha\ làng bol, 10  rbô na\ làng bol. Làng bol, gam gàr niam bơhìan kac màng,  neh lơh broa\ bal,  lơh sa, ai ntum Cư\ Pơng gơ gơs la anih  àng bè bơtàu tơngguh lơh sa, mpồl bơtìan, sền gàr ngap lơngai gùng dra\ bal. Mpờl  go\ ngan la ala\ broa\ lơh geh mut lơh bal bè broa\ lơh,  broa\ lơh Gơnoar atbồ lơgar  bơh hơ\ geh dong kờl lài jơh khà  broa\ lơh bơcri phan bơna, sang sơbì jơgloh tơmù rbah, làng bol geh tơl bơta  nàng brồ guh lơh pas di pal.

            Dilah pơgap mờ do 5 nam, gùt ntum geh rlau 700 hìu nha\ rbah, den tu\ do mìng gam rlau 100 hìu rbah. Jat jơnau yal pa ngan,  rlau 90% khà hìu tàm ntum  lơh sa pria\ geh bơh 100 tơlak pria\ ua\ rlau, tàm hơ\,  geh 20% khà hìu nha\ pas, pria\ geh bơh 500 tơlak pria\ ua\ rlau tus pria\ tơmàn pah nam. Hìu nha\ ồng bèp H’Lip kis tàm [òn Tlan la dùl tàm ala\ hìu nha\ tàm ntum Cư\ Pơng geh pria\ lơh geh 300-400 tơlak pria\ tàm dùl nam bơh kơphe, điều, ai git:“Geh bơh hìu nha\ a` bơh kơphe, bơh điều rlau 400 tơlak pria\ dùl nam. Nam 2015,  ờ geh tơnhàu, hìu nha\ a` tơnhàu geh 10 tấn tàm ba\ ù 4 lồ kơphe. A` drơng tơl tus oh kòn in geh lòt bơsram, a` neh tam pà ù tiah kòn ur, kòn klau  neh bau, dùl na\ kòn ùr lơh pơgru mờ dùl na\ kòn ùr gam bơsram sư phạm mầm non tàm Hìu bơsram dờng Tây Nguyên”.

            Tàm Cư\ Pơng, ua\ ngan kơnòm dềt tàm  sơnam lòt bơsram dtờm geh lòt bơsram,  làng bol tu\ kòp tê jê sa\ geh ala\ y bác sỹ tàm Hìu sơnơm ntum kham sơm kòp nền nòn ngan. Ồng Aê Hao kis tàm [òn Drơng Điêt, ntum Cư\ Pơng neh mờr 80 sơnam, la dùl na\ cau ling yau lài do geh lòt tam lơh mờ Mỹ dong klàs [òn lơgar, tu\ do geh sền go\ bơta tam gơl pa bơh [òn lơgar Cư\ Pơng, chờ hờp đơs:“Lài do, tàm rài tam lơh dan bòl glar kal ke ngan,  lơh  gơbàn chơt jê, chơt roh tàm [òn in. Mơya tu\ do, neh geh tam gơl pa, geh ồs đèng dà lơgar, gùng [òn lơh mờ bê tông, geh hìu bơsram, kòp jê den  geh hìu sơnơm  bloh…A` go\ gơ lơh chờ ngan tài bơh bơta hơ\”.

            Ồng Y Blưn Mlô kuang jat jơng atbồ ntum Cư\ Pơng đơs tờm, tu\ do  Cư\  Pơng  geh rlau 3.500 lồ kơphe neh tơnhàu,  git nđờ  rhiang lồ cao su, tiêu, điều, mờ blàng  sre dà lơh kòi… Làng bol nhap nhar  attê bal bơt bơtàu [òn lơgar pa, rài kis làng bol slơ ngai slơ bơtàu tơngguh. Ồng Y Blưn Mlô ai git:“Bơh nam 1986 tus tu\ do, làng bol dờp git ngan bè bơta bơtàu tơngguh lơh sa  sền gàr ngap lơngai tàm [òn lơgar, làng bol geh lơh lài ròng tam ờ ua\ chi tam phan ròng ndai. Tu\ do, làng bol neh rhời bơtàu tơngguh drơng gàr tus rài kis phan bơna tus mờ nùs nhơm làng bol tàm [òn lơgar. Pơndrờm mờ  bơta kờp bal lài do den tu\ do rài kis bơh làng bol neh niam ngan rlau jơh”.

            Ala\ tềl, pơ nời sồt bơh  dơ\ tam lơh neh ờ gam tai. Cư\ Pơng tu\ do neh soh tềng sa\ he tơlir crư  ua\ ngan kơphe,  plai chi, ala\ hìu sơmang  lơh dờng niam ngan, kơljap ngan. Làng bol neh  dùl nùs bal bơt bơtàu [òn  lơgar pa Cư\ Pơng, di pal la ù tiah khin cha jak chài kac màng dê.

                   Cau cih mờ yal tơnggit K’ Brọp