VOV4.K’ho- Nam 2020, bulah gơtìp gơrềng dơ\ le\ bal tài bơh kòp Covid-19 mờ kòp bạch hầu, gơtìp trồ tiah lơh aniai tàm uă tiah, mơya ală càr tàm Tây Nguyên kung gam lơh gơs sơl ală broă jàu lơh sa- mpồl bơtiàn kuơmàng. Cồng nha bơh Pơrjum dờng Đảng ală kấp dê, tơngai lơh broă bơh nam 2020- 2025 mờ Pơrjum dờng cau ala măt gùt lơgar dơ\ XIII bơh Đảng dê bal mờ bơta lơh nền ală gùng dà broă lơh kuơmàng, bal mờ bơta bơtàu tơnguh wơl uă ngan bơh drà phan lơh geh bơh sươn sre dê, gam là ală tềl tơngo\ chờ hờp, là bơta gơn kơnờm dờng nàng Tây Nguyên lơh jăt ngan ngồn bơta gơn kơnờm tam gơl sơrbac mhar, ờ mìng ai nam 2021 in mờ ai jơh bal ală nam pơn jăt tai in sơl.

Ală ngai lồi nam Canh Tý 2020, jơh ală anih lơh broă chính trị tàm xã Tân Bình, kơnhoàl Đăk Đoa, càr Gia Lai lơh broă jơh bơta pràn. Kuang đơng lam bồ Đảng ủy, Ủy ban Nhân dân xã ngui tu\ jiơ ru rê hờ anih duh broă ki\ ală sră pơ àr, sră nggal kuơmàng, tơnơ\ hơ\ lòt tus hờ ală [òn, bal mờ mpồl lơh broă geh gơnoar tus tơl hìu, sồr tơl nă làng bol lòt ci\t sơnơm vaccine rơcăng sơndră kòp bạch hầu, bơta kòp sơbơng roh ngan lơh chơ\t cau neh pơhìn uă xã tàm kơnhoàl jơh gùt tu\ tơngai nggùl nam lài. Ồng Phạm Minh Thắng, Chủ tịch Ủy ban Nhân dân xã Tân Bình pà gi\t, mờ bơta tus lơh bal bềng nùs nhơm geh kơnòl, mìng tàm rlau 2 ngai lơ\p, broă ci\t sơnơm vaccine rơcăng sơndră kòp bạch hầu tàm xã neh lơh geh. Ồng Phạm Minh Thắng, đơs: Bol a` neh tam pà tơl tu\ jiơ nàng pơgồp bal mờ hìu sơnơm, den tus tơl hìu làng bol, yal tus tu\ jiơ hơ\ den geh lòt tus bal dùl anih; jàu kơnòl loh làng kuang bàng bơto pơlam làng bol tàm tiah ơm kơ\p mờ tiah ci\t sơnơm rơcăng sơndră kòp. Den tàng bè hơ\, broă lơh ci\t sơnơm vaccine kung niam đau sơl. Sền bal là tus tu\ tơngai do den broă ci\t sơnơm vaccine neh jơh lơh.

Bè hơ\, kòp dơ\ le\ bal là bạch hầu mờ Covid-19 là pơhìn uă ngan rlau jơh gơ wèt mờ bơta bơtàu tơnguh bơh Tây Nguyên dê tàm nam 2020 neh geh kơryan geh cồng nha. Bạch hầu neh ờ lơh bơtờp tai ală cau bơtờp kòp pa; broă ci\t sơnơm vaccine rơcăng sơndră kòp bạch hầu ai jơh gùt làng bol in neh geh lơh jơh tàm uă kơnhoàl, xã, lơh gơlik bơta [ươn ai broă lơh gơs broă ci\t rlau 8 tơlak ding sơnơm vaccine rơcăng sơndră kòp gam wơl tàm gùl nam pa 2021 do. Bal mờ bơta kơryan geh cồng nha kòp bạch hầu, ală càr Tây Nguyên kung gàr niam ờdo ờdă rơcăng sơndră kòp Covid-19. Ală cau bơtờp tus tàm tiah he dê neh geh ai ơm yah ngài di tu\, ờ geh khat dùl nă cau bơtờp lơi bơtờp tàm mpồl bơtiàn gơlik geh. Ală nhai tam dră mờ kòp, ală ngai sơrlèt gan kal ke ờ mìng gàr niam lơh sa Tây Nguyên pơn jăt tai bơtàu tơnguh, mờ gam lơh gơ rề pràn ngan nùs nhơm tam klăc, tàm dong tàm kờ` bal, dong kờl bal mờ gơ\p brồ guh. Bi Nguyễn Thị Thái Thanh, Kuang ătbồ Công ty Trách nhiệm hữu hạn Ban Mê Green Farm, càr Dăk Lăk dê yal bè tu\ tơngai lòt lơh broă niam dong kờl is, dong làng bol gơtìp kal ke tàm jơh gùt nam 2020 lơh bi in gi\t go\ loh rlau bè ală bơta niam bơne\ gam lơh gơ rề tàm mpồl bơtiàn. Bi Nguyễn Thị Thái Thanh, đơs: Uă tu\ gơlơh ngoh rơngăc ngan bờh, go\ geh là nùs nhơm tàm dong tàm kờ` bal mờ tam klăc bơh jơi bơtiàn he dê. Tu\ mờ geh bơta bòl glar kal ke là jơh tơl nă cau tơrgùm bal pràn, dong kờl jơh nùs ngan. 

Sơlơ kal ke, mpồl tam klăc dờng tàm Tây Nguyên sơlơ tơngo\ loh. Bal mờ bơta kuơmàng hơ\, ală tềl tơngo\ niam ngan bè lơh sa kung neh gơ rê wơl mờ Tây Nguyên. Prao nhai lồi nam 2020 geh mìu uă, lơh mờr 50 rbô lồ tàu tàm tiah do gơguh uă bè cồng nha. Mu\t tàm kàl koh tàu, priă tăc tàu gơguh tai tus mờr 40%, geh 1 tơlak 150 rbô đong dùl tấn. Mờ bơta [ươn dơ\ le\ bal bè cồng nha lơh geh bal mờ priă tăc, cau tam tàu tàm Tây Nguyên digơlan gơguh tai priă lơh geh rlau 1 rbô tơmàn đong tàm nam pa 2021 do.

Kung ndrờm bè tờm tàu sơl, kau su là tờm chi tam jo\ nam kuơmàng tàm Tây Nguyên kung geh ală bơta bơtàu tơnguh wơl bè priă jền. Priă tăc bơ sơ\t kau su ơm tàm khà bơh 32 tus 37 tơlak đong tàm dùl tấn bơh nam 2020 dê, neh dong mpồl lơh sa kă bro kau su sơrlèt gan kal ke, dong cau lơh kau su [ươn ngan lơh geh priă jền bơh 10 tus 17 tơlak đong dùl nhai. Ồng Rơ Ma Nhót, là cau lơh broă sa tam kau su tàm [òn Ngo Leh 1, xã tiah nhàr lơgar Ia Krêl, kơnhoàl Đức Cơ, càr Gia Lai chờ hờp đơs: Tàm [òn, priă lơh geh pah nhai bơh hìu bơnhă uă bơh 3 lồ dê lơh geh priă jền tu\ do là bơh 20 tus 30 tơlak đong. Ală hìu geh bơh 1 lồ 2 tus 1 lồ 3, digơlan lơh geh 15 tơlak đong, ai hìu bơnhă lơi tam rlau 600 tờm kung sùm lơh geh sơl bơh 17 tơlak đong gơ jăt tàm kàl lơh geh bơ sơ\t dùl êt halà uă.

Nam 2021 neh gơ rê tus mờ Tây Nguyên bal mờ uă mpồl lơh sa kă bro dờng lơh sră dan lơh uă rơndăp broă lơh dờng gi\t nđờ rbô tơmàn đong. Bồ sơnam pa Tân Sửu sơlơ gơklo\ gơ crà rlau tài bơh cồng nha lơh geh bơh Pơrjum dờng ală kấp mờ Pơrjum dờng cau ala măt gùt lơgar dơ\ XIII bơh Đảng dê. Pơrjum dờng dơ\ do đơs nền, mờ nùs nhơm tam klăc bal jơh gùt làng bol, “bal mờ dùl đảng tam gơl bơta yau gơ gơs bơta pa song dơ pă sàng goh, pràn kơldang kơ\ kơl jăp, geh tơl bơngă pin dờn, bơta kơ\ nùs, pràn jak đơng lam mờ mờng chài bè Đảng he dê, geh làng bol jơh nùs pin dờn kờ` gơboh, dùl nùs bal, bol he geh bơta pràn dờng ngan, sơrlèt gan jơh ală kal ke, bơta lòng; ờ geh mpồl cau gơjra` kơuềng lơi rơgơi kơryan jai jơi bơtiàn he lòt guh, lơh geh ală cồng nha crih crài pa tàm broă lơh bơ\t bơtàu mờ bơtàu tơnguh dà lơgar”.

Chờ hờp bal mờ nùs nhơm brồ guh mờ Pơrjum dờng dơ\ XIII neh lơh tơngkah wơl, ală càr Tây Nguyên kung gam bềng bơta pin dờn mờ bơta jơh nùs brồ guh. Ồng Phạm S, Phó Chủ tịch Ủy ban Nhân dân càr Lâm Đồng pà gi\t, bal mờ lơh pràn lơh sa sươn sre mờ măy mok, ai phan lơh geh bơh sươn sre Lâm Đồng dê tus drà châu Âu jăt Hiệp định kă bro khăt gơboh đah Việt Nam mờ châu Âu pa geh ai ngui, càr gam lơh dùl broă rơndăp lơh bơtàu tơnguh mhar, gơ wèt mờ nhơl chờ lơh broă sa sươn sre. Ồng Phạm S, đơs: Nhơl chờ lơh broă sa sươn sre là bơta pràn bơh Lâm Đồng dê, mờ tu\ do càr Lâm Đồng gam geh gùng dà kơrnoat boh lam nàng bơtàu tơnguh nhơl chờ lơh broă sa sươn sre tàm tơngai tus niam rlau, gàr niam bơngă bơh pal mờ dà lơgar mờ dunia dê, ngui bơta pràn mờ bơta [ươn bơh gah nhơl chờ Lâm Đồng dê.

Ai jăt ồng Phạm Minh Tấn, Phó Bí thư Thường trực Tỉnh ủy Dăk Lăk den đơs, cồng nha bơh Pơrjum dờng cau ala măt gùt lơgar dơ\ XIII bơh Đảng dê ngan là bơta pin dờn, là bơta gơn kơnờm ai Dăk Lăk in geh bơta bơtàu tơnguh pràn kơldang rlau tai. Ồng Phạm Minh Tấn, đơs: Tơnơ\ cồng nha Pơrjum dờng dơ\ XIII bơh Đảng dê den Dăk Lăk gel dùl bơta pin dờn dùl nhơm pràn kis pa nàng lam lơh jăt Kơrnoat Pơrjum dờng dơ\ XIII bơh Đảng dê gơ jăt bal mờ broă lam lơh jăt Kơrnoat Pơrjum dờng cau ala măt Đảng bộ càr dơ\ XVII tơngai lơh broă bơh nam 2020- 2025 là bơ\t bơtàu Dăk Lăk ngai sơlơ pas sơm niam bơne\ jak chài, tàm hơ\ geh bơ\t bơtàu Buôn Ma Thuột gơ gơs là tiah drà tờm bơh tiah Tây Nguyên dê.

Nam yau Canh Tý neh ơm tàm ală tu\ tơngai du\t ndơl, nam pa Tân Sửu gam tus bal mờ ală bơta lơh ngan jơh nùs dờng ngan bơh ală kấp ủy Đảng, gơnoar ătbồ mờ làng bol ală jơi bơtiàn tàm Tây Nguyên, nàng kờ` sơrlèt gan bơta lòng, gi\t jăt ală tu\ tơngai dờng gam pờ tơlik. Bơta gơ tòm bal niam ngan là bol he gam ơm tàm đah 2 nam Canh- Tân. Canh Tân gơtha là tam gơl pa. Làng bol tam klăc dùl nùs, Đảng he, bơh dà lơgar tus ală tiah ndrờm jơh nùs lơh ngan tam gơl pa, lơh pràn bơ\t bơtàu mờ lơh niam wơl Đảng…do là bơnàng jă nàng jơh gùt làng bol kơ\ kơl jăp bơta pin dờn tàm ală bơta lơi niam bơne\ geh lơh geh tàm nam 2021 do mờ jơh bal jơh gùt tu\ tơngai nam 2020- 2025.

Cau cih Dương Đình Tuấn- Cau mblàng Lơ Mu K’Yến