VOV4.K’ho - Đah sền gàr brê gơwèt Bộ Nông nghiệp mờ Phát triển Nông thôn yal lài, broă di gơlan gơtìp ồs sa brê tàm Tây Nguyên gam tàm khà uă ngan. Đah sền gàr brê yal lài làng bol bañ ngui ồs tŭ mŭt tàm brê mờ tiah rềp mờ brê, tài di lah ờ rocang nền den di gơlan lơh gơtìp ồs sa brê tơn. Tèng đăp mờ bơta do, gah lơh broă geh gơnoar tàm ală càr tiah Tây Nguyên neh lơh jăt broă rocang sơndră mờ ồs sa brê.

Atbồ sền gàr rơlao 13 rơbô lồ brê, pah dơ̆ mŭt tàm kàl prang, Mpồl atbồ brê rocanggàr lài Hra, kơnhòal Mang Yang, càr Gia Lai geh pơgồp bal mờ làng bol chu lơh gùng sơndră ồs jăt gah brê.

                        Càr Gia Lai bơyai lơh pơs wàs jăt gah brê ală tiah di gơlan gơtìp ồs sa uă

Ồng Nguyễn Văn Chín, Kuang atbồ mpồl atbồ pà gĭt, kàl prang nam do, 1 rơbô lồ brê di gơlan gơtìp ồs sa uă ngan, neh geh chu chi che lơh gùng kơrian ồs jăt gah brê niam. Mpồl sền gàr bal mờ ală hìu làng bol dờp sền gàr neh mus 13 kơi sồ gùng kơrian ồs, mờ tơnguh broă lòt sền gròi rơcang sơndră mờ ồs sa brê: “Bol añ lam sồr làng bol mờ kĭ hơ bal mờ ală hìu làng bol kis rềp mờ brê lơh jăt ală broă sơndră mờ ồs sa brê, gàr niam di mờ broă kờñ lơh. Bơyai lơh lòt sền gròi tàm ală tiah di gơlan gơtìp uă mờ gùng dà broă lơh là rơcang lài, crùh ồs pal di tŭ.

Kơnhoàl Mang Yang tŭ do geh rơlao 53 rơbô lồ brê, tàm hơ̆ geh mờr 6 rơbô lồ brê gơwèt ală tiah di gơlan gơtìp ồs sa uă, hơ̆ là: AYun, H’Ra, Đê Ar, Đăk Trôi, Đăk Djăng.

                                                   Lam sồr làng bol in gĭt wă bè broă sền gàr brê

Ồng Trần Tất Đắc, Phó kuang atbồ mpồl sền gàr brê kơnhoàl Mang Yang pà gĭt: Kờñ rơcang sơndră mờ ồs sa brê, kơnhoàl Mang Yang neh lơh tơl Mpồl đơng lam sơndră mờ ồs sa brê cấp xã, bơ̆t bơtàu gùng dà broă lơh 4 tơn tàm tiah hơ̆, mờ crơng gơs ală mpồl rơcang sơndră mờ ồs sa brê mờ mpồl cau tus gĭt nđờ rơhiang nă, mpồl tòm là làng bol kis tàm do nàng sơndră mờ ồs sa brê tơn bơh tàm tŭ sơnrờp gơbàn. “Sền gàr brê sùm là broă pal geh lơh mờ kuơ màng là broă rơcang sơndră mờ ồs sa brê pal ai broă rơcang sơndră là broă lơh tờm. Tŭ gơbàn ồs sa brê den gơtùi ngui uă bơta phan, geh bal phan pa ngan bè ală lơgar jăk chài dê, mơya kung gam ai lài broă rơcang sơndră mờ ồs sa pal geh ai lài ngan”.

Tàm càr Lâm Đồng, bơh lài mờ satềp tus tŭ do, tiah brê nho ƀuơn gơtìp ồs sa geh jăt bal tàm gùng 27C lòt gan ală xã Dà Sar, Dà Nhim, Dà Chais kơnhoàl Lạc Dương sùm geh Mpồl atbồ brê rơcang sơndră lài Dà Nhim mờ ală hìu dờp atbồ sền gàr brê  ai cau sền gàr tàm ală tiah sền gàr, bơyai lơh lòt sền gròi sùm nàng gŏ di tŭ di lah gơbàn ồs sa brê.

                                          Càr Lâm Đồng bơyai lơh bơsram tàp rơcang sơndră mờ ồs sa brê

Ồng Ha Dinh, kòn cau K’ Ho, là cau dờp atbồ, sền gàr brê tàm xã Dà Sar pà gĭt: “Anih sền gàr geh rơndăp broă là lơh mpồl nàng tam pà bal ală cau lòt sền gàr. Di lah gŏ gơtìp ồs sa den bol añ yal mơ tus mờ anih sền gàr, anih sền gàr mhar yal mờ Mpồl đơng lam nàng tơrgùm mpồl cau tus gơsơ̆t ồs di tŭ”.

Ồng Nguyễn Khang Thiên, Kuang atbồ đah sền gàr brê càr Lâm Đồng pà gĭt, mờ gùng dà broă lơh là bañ sền ờ sơ̆p, ờ sền gròi den tàng ală gùng dà broă lơh nàng rơcang sơndră mờ ồs sa brê neh geh ală mpồl lơh broă lơh jăt bơh bồ kàl prang. “Bol añ neh tơnguh broă đơng lam ală mpồl sền gàr brê, mpồl cau lòt sền gàr, ală anih lơh broă tờm, ală cau tờm brê chồl pràn broă atbồ, sền gàr brê, rơcang sơndră mờ ồs sa brê. Tàm hơ̆, sền kuơ broă lam sồr, tơrgùm tàm ală tiah ƀuơn gơtìp ồs sa nàng lơh geh cồng nha broă rơcang sơndră mờ ồs sa brê uă”.

Tàm ală tiah ƀuơn gơtìp ồs sa brê tàm càr Kon Tum, bè kơnhoàl Đăk Tô, Kon Rẫy, Ngọc Hồi, Ia H’ Drai, brê dà lơgar Chư Mom Ray… ală mpồl tờnm brê, gah sền gàr brê mờ gơnoar atbồ ală tiah neh hòi jà uă ngan mpồl tus sền gàr ngai kung bè mang.

Là kơnhoàl tiah nhàr dà lơgar geh rơlao 88 rơbô lồ brê mờ ù brê, jơh ală bă ù gam tàm tơngai geh yal lài ồs sa brê ngòt rơngơ̆t ngan, ồng Nguyễn Quốc Tuấn, kuang atbồ mpồl sền gàr brê kơnhoàl Ia H’ Drai pà gĭt: “Trồ tơngai duh jŏ, prang uă den tàng broă di gơlan gơtìp ồs sa brê là uă ngan. Bol añ kung ai ală tiah gơtìp uă ồs sa brê nàng sồr sền gàr ngai kung bè mang. Ală cau tờm brê geh mpồl cau lơh broă sền gàr brê.

Mpồl do sền gàr brê mờ tàm broă rơcang sơndră mờ ồs sa brê. Bơdìh hơ̆ tai, kơrnoăt pơgồp bal mờ ală mpồl lơh broă, mờ Uỷ ban xã hơ̆ sồng ală mpồl ling ơm tàm do. Sền gròi ală cau tờm brê pal lơh jăt di mờ gùng dà broă lơh neh geh kĭ di jăt mờ gùng dà broă lơh 4 tàm tiah hơ̆ tơn nàng tŭ lơi kung rơcang lài tŭ gơtìp ồs sa”.

Nàng rơcang sơndră mờ ồs sa rơlao 610 rơbô lồ brê, ală mpồl cau tờm brê tàm càr Kon Tum neh lơh gĭt nđờ rơbô kơi sồ gùng kơrian ồs, crơng gơs gĭt nđờ rơhiang anih sền gàr, nàng atbồ, sền gàr cau mŭt tàm brê; mus, chu chi che jăt gah brê nàng tơmù broă di gơlan gơtìp ồs sa brê, bơyai lơh kĭ hơ bal tus mờ tơl hìu làng bol nàng sền gròi broă  mus, chu mìr, pleh mờ broă di gơlan gơtìp ồs sa rề mŭt tàm brê.

Cau mblàng Ndong Brawl