VOV4.K’ho- Mho ngai 17/3, wă cau gơnoar cih Mpồl duh broă sền gàr lơngap lơngai dà lơgar Nga, Đại tướng Patrushev Nikolai Platonovich, Thủ tướng Nguyễn Xuân Phúc ai tơnggŏ bơta chờ hờp bè broă Nga neh kơlôi sơnơng geh cồng nha, lơh gơlik sơnơm sơm mờ sơnơm vaccine rơcang sơndră kòp Covid-19, pin dờn pràn kơldang là, Nga geh mhar sơrlèt gan kòp dờng.

Dơ̆ lòt còp lơgar Nga dơ̆ do bơh cau gơnoar cih Mpồl duh broă sền gàr lơngap lơngai dà lơgar Nga dê geh kuơ dờng màng ngan, tàm pơn jat ală broă lơh tơngkah 70 nam ngai crơng gơs git gơp lơh broă bal Nga mờ Việt Nam, Thủ tướng jờng rơ cồng nha lơh broă bơh Mpồl dê mờ Bộ Kuang àng, Bộ Quốc phòng Việt Nam. Bơta do sơlơ ai gŏ git gơp lơh broă bal sền gàr lơngap lơngai, sền gàr dà lơgar là tơngume tờm bơh git gơp lơh broă bal kuơmàng jŏ jòng đah 2 lơgar. Thủ tướng sồr đah Nga pơn jat tai tơnguh lơh broă bal tàm gah sền gàr dà lơgar; rơcang sơndră cau tìs, tài bơta kuơ bơh làng bol 2 lơgar, tài ring lơngai, kơ̆ kơljap mờ bơtàu tơnguh.

Cau mblàng K’Duẩn