VOV4.K’ho - Drim òr (17/03), Thủ tướng ồng Nguyễn Xuân Phúc đơng lam dơ̆ pơrjum pờ tơlĭt tàm internet bơh Thường trực Chính phủ mờ Mpồl đơng lam dà lơgar rơcang sơndră mờ kòp Covid-19 mờ 63 càr, ƀòn dờng bè broă sền wơl cồng nha broă rơcang sơndră mờ kòp gơtờp tàm tơngai do, cri bơyai ală broă lơh gùng dà broă lơh dờng nàng rơcang sơndră mờ kòp geh cồng nha tàm tơngai tus.

Đơs tàm pơrjum, Thủ tướng ồng Nguyễn Xuân Phúc đơs loh, he neh kơrian geh cồng nha ală dơ̆ gơtờp tàm mpồl bơtiàn tàm 1 nam do, ngan là 14 nhai do. Broă kơrian mờ kòp Covid-19 bơh lơgar he dê neh geh dunia đơs niam, geh pơn jờng tàm uă pơrjum, anih yal tơngĭt. Tàm tơngai tus, broă sền gròi kòp gơtờp gơrềng uă ngan tàm broă lơh sơnơm vaccine.

Mơya, khà ai sơnơm vaccine blơi bơh lơgar bơdìh gam ờ uă mờ sơnơm vaccine lơh tàm lơgar kờp dŭ pal tus quý 4 nam 2021 lơgar Việt Nam hơ̆ sồng geh. Tềng đăp măt pal pơn jăt tai lơh jăt ală broă rơcang sơndră mờ kòp gơtờp jăt jơnau sồr 5K, do là ală broă rơcang sơndră mờ kòp ƀuơn lơh, di pal mờ geh cồng nha tàm tơngai tŭ do.

Cau mblàng Ndong Brawl