VOV4.K’ho - Tàm càr Hà Giang, mìu piar neh gơl^k geh tàm tu\ 3 jơ drim ngai 03/4 tàm kơnhoàl Quản Bạ, neh lơh hoàc huơr rơlao 1 rơbô 200 lồ tơngời, biăp mờ phan tam kờ` lơh sơnơm, mờr 800 nơm rơkàng hìu gơtìp bluh, tơrlah, kờp du\ hoàc huơr di pơgăp 10 tơmàn priă. Tàm tiah gơtìp rềs àr, tus 11 jơ ngai òr (03/4), ală plai piar gam geh sùm tơl bă dờng mờ ờ hềt lề jơh, gam đềr tàm ală rơkàng hìu tàm bă ù suơn, ù sre làng bol dê. Bơtoah là ờ gơtìp hoàc huơr bè kòn bơnus, mơya uă broă lơh bal mờ hìu làng bol gơtìp hoàc huơr uă. Kờ` di tu\ tơmù hoàc huơr bơh dơ\ mìu piar, ồng Nguyễn Văn Sơn, kuang atbồ anih duh broă làng bol càr Hà Giang neh tus sền tàm tiah gơtìp mìu piar lơh aniai, sền tơrgùm ing bè hoàc huơr tài mìu piar dờng gơl^k geh, sồr kơnhoàl Quản Bạ gờ` sền wơl, kờp hoàc huơr, yal mờ anih duh broă làng bol càr kờ` geh broă dong kòl làng bol. Mờ hòi jà ală gah, mpồl lơh broă tus dong kờl làng bol mhar tơmù hoàc huơr, gờ` ring niam lơh sa.

Tàm càr Yên Bái, mìu dờng geh bal càl khồm pràn ngan gơbàn tàm tu\ 5 jơ 30 phuk drim ngai òr (03/4) neh lơh tơrlah jơh 13 nơm hìu bơh làng bol dê tàm ală ntum Mường Lai, Minh Xuân, Mai Sơn bơh kơnhoàl Lục Yên, càr Yên Bái dê. Bơdìh hơ\ tai, gam geh 63 nơm hìu ndai gơtìp gơ pồ rkàng, 5 nơm hìu [ềp gơtìp tơrlah tơrlơm mờ bàr pe broă lơh mpồl bơtiàn gơtìp aniai…Tơnơ\ tu\ kơno yal tơn, kuang đơng lam kơnhoàl Lục Yên mờ gơnoar atbồ ală ntum neh tus nàng còp, pơn dờm pơnđiang mờ di tu\ dong kờl làng bol sơrlèt gan bơta aniai bơh trồ tiah, kơ\ kơl jăp rài kis. Tus tu\ do, sền bal ală hìu nhă gơtìp hoàc hươr neh geh anih ơm.

                      Cau cih mờ yal tơng^t Ndong Brawl – Lơmu K’ Yến