VOV4.K’ho – Jơnau yal bơh Cơldu\ lơh broă Mpồl duh broă te\ khà dà lơgar dê: Kờp tus 5 jiơ mho ngai òr 22/5, jat jơnau yal bơh 63 càr mờ [òn dờng tàm gùt lơgar dê pơyua tus Cơldu\ lơh broă Mpồl duh broă te\ khà dà lơgar in, neh geh 51 tơlak 593 rbô 536 nă cau te\ khà lòt đùh sră, geh khà 80,51%, tàm hơ\ geh 11.975 mpồl te\ khà geh 100% cau te\ khà neh lòt đùh sră. Jat jơnau đơs bơh Mpồl duh broă te\ khà dà lơgar dê, cau te\ khà tàm gùt lơgar neh `hap `har, lơh niam gơnoar cau làng bol tàm lơgar bơh he dê nàng sac rwah kuang bàng Gơnoar ala mat dà lơgar kơnă 14 mờ kuang bàng Mpồl duh broă ala mat làng bol ală kơnă tơngai lơh broă bơh nam 2016- 2021. Gơtùi sền go\, dơ\ te\ khà neh lơh di mờ adat boh lam, ờdo ờdă, khà cau te\ khà lòt te\ khà uă mờ ngan ngồn gơ gơs là ngai chờ dờng bơh jơh tơl nă làng bol dê. Tàm ală tiah, jơh ală khà cau te\ khà lòt te\ khà neh geh rlau 90%. Uă tiah geh khà lòt te\ khà geh rlau 99%. Hơ\ là ală càr: Thừa Thiên- Huế, Cao Bằng, Hoà Bình, Hậu Giang, Lai Châu, Quảng Ngãi, Tuyên Quang, Phú Thọ, Quảng Trị. Mpồl duh broă te\ khà dà lơgar, pà gi\t: Jat jơnau đơs bơh làng bol [òn lơgar dê, do là dơ\ te\ khà làng bol lơh tờm, tam gơl pa, ngan ngồn lơh uă gơnoar lơh tờm bơh làng bol dê. Cau te\ khà neh tơngo\ geh kơnòl mờ gơnoar bơh he dê tàm broă kơlôi sơnơng nền, sac rwah ală kuang bàng dipal ala mat ai he in nàng pồ lơh kuang bàng Gơnoar ala mat dà lơgar, kuang bàng Mpồl duh broă ala mat làng bol ală kơnă, mờ làng bol kung sùm pin dờn tàm bơta lơh geh cồng nha bal bơh dơ\ te\ khà dê.

Cau cih mờ yal tơngi\t- Lơ Mu K’ Yến