VOV4.K’ho – Mho òr, 9/1, Ủy ban Thường vụ Quốc hội ai jơnau đơs bè ală bơta dờng gam geh jơnau đơs krơi is bơh rơndap adat atbồ kă bro mờ lơgar ndai. Cribơyai tàm pơrjum, uă ngan kuang bàng tàm Ủy ban Thường vụ Quốc hội ringbal mừo jơnau cih, khà tơl đal git phan bơna di mat sơnđan phan bơna ờ ai tac hờ lơgar ndai, ờ ai blơi bơh lơgar ndai, sền gàr bơta kuơ dà lơgar tàm ală gah bè sền gàr dà lơgar, sền gàr ngap lơngai, pràn kơldang să jan, tiah kis, bơhìan, tơl phan sa, phan yau… Ờ uă jơnau đơs đơs là, gơnoar mut ngui ơm ing blơi phan bơh lơgar ndai, ơm ing tac phan hờ lơgar ndai pal jàu Thủ tướng Chính phủ in tài broă do ờ mìng gơ rềng tus gơnoar lơh broă mờ gam là sền gròi dà lơgar dê. Kung tàm mho òr, ai jơnau đơs bè ală bơta dờng gam geh jơnau đơs krơi is bơh rơndap adat dong kờl mpồl lơh sa kă bro dềt mờ dimơ, ală kuang bàng sồr pal kơ lôi sơ nơng nền nòn, tơrgùm dong kờl lài mpồl lơh sa kă bro dềt mờ dimơ nàng lơh gơs bơta pràn pơn jờng bơtàu tơnguh lơh sa. Ngai do, Ủy ban Thường vụ Quốc hội ai jơnau đơs bè ală bơta dờng gam geh jơnau đơs krơi is bơh rơndap adat rơndap ù tiah; rơndap adat atbồ, ngui phan bơna dà lơgar tam gơl; rơndap adat atbồ, ngui phàu crong, phan bơr toh mờ phan dong kờl mờ rơndap adat rơcang gàr lài.

          Cau cih mờ yal tơnggit K’Duẩn