Tàm jơnum làng bol tiah drà Bon Dưng 1, sơnah ƀòn Lang Biang – Dà Làc, ồng Păng Ting Sin, kòn cau K’ Ho (Làc), uă nam do kung gam bơto sùm dròng cing, đơs pơn đik, tamya mờ ală bơta phan uh, phan teh ờs mờng kòn cau dê. Là Bí thư Chi bộ, mờ kung là cau atbồ mpồl dròng cing Bon Dưng dê mờ 15 nă cau, ồng sùm sền broă prăp gàr bơta niam chài là kơnòl bơh să tờm dê gơwèt mờ mpồl bơtiàn: “Di lah mờ he ờ prăp gàr mờ ngui bơhiàn ờs mờng do den rơ̆p roh jơh bơta kwơ niam chài dê. Gơwèt mờ cau jơi bơtiàn ờ gal cau kis tềng jơng bơnơm Lang Biang do, kờñ bơto wơl oh kòn, kòn sao in bè bơta niam chài cing mồng, hơ̆ sồng bè jơnau đơs pơn đik, tamya. Prăp gàr mờ ngui bơta niam chài krơi is bơh cau jơi bơtiàn ờ gal cau kis bơh yau añ dê, bơto wơl rơnàng tơnơ̆ do in”.

Bơh ală cau chài dờng sơnam tàm ală thôn, ƀòn càr Lâm Đồng dê, nùs nhơm gơboh kờñ mờ bơta niam chài ờs mờng gam geh jào wơl nàng ală rơnàng pơn jat tai in. Dờp jơnau jào bơh ală cau chài neh dờng sơnam, mpồl cau kơnòm să tŭ do kung gam pơn jăt tai broă prăp gàr bơta niam chài krơi is.

Bi Kră Jañ Jun Guy, kòn cau K’ Ho (Làc) tàm jơnum làng bol tiah drà Dang Ja, sơnah ƀòn Lang Biang – Dà Làc là cau tàm mpồl cau chài geh 22 nă. Gơwèt mờ bi, pah dơ̆ lòt dròng cing ờ mìng là yal bơta niam chài mờ gam là broă lơh nàng rơnàng kơnòl să in git pơnyờ să bè rài lài do. Bi Kră Jañ Jun Guy pà git: “Ală bơta lơi mờ mò ồng rài lài do he dê lời wơl bè đơs jơnau pơn đik, uh kơmboăt, kung bè tamya xoang ờs mờng… pal geh pơn jăt tai prăp gàr mờ bơto wơl nàng ală rơnàng tơnơ̆ do in. He ờ gơtùi lời roh ală bơta niam chài do jơi bơtiàn he dê”.

Tàm tiah brê bơnơm dờng Lang Biang, săp dròng cing kung gam mpong pah tŭ ƀòn lơgar geh bơyai lơh ñô sa chờ. Tàm ală bơnơ̆ tàñ ồi ờs mờng, tơl che brài kung gam geh tàñ gơs ală bơta phan geh uă nùs nhơm bơh git nđờ rơnàng dê. Mò Bon Jô Liên, Phó Chủ tịch Anih duh broă Mặt trận Dà lơgar Việt Nam, Chủ tịch Mpồl cau ùr sơnah ƀòn Lang Biang – Dà Làc đơs nền: “Ală cau geh bơngă pin dờn tàm sơnah ƀòn Lang Biang – Dà Làc at gơnoar broă kwơ màng ngan. Ală cau do là cau tơrbŏ bal đag Đảng mờ Làng bol bè aală gùng dà broă lơh, ală broă dong kờl bơh Đảng, adăt boh lam bơh Dà lơgar dê nàng bơh tŭ hơ̆ làng bol rềp mờ Đảng rơlao, rềp mờ Dà lơgar rơlao. lài ngan, ală cau do là ală cau lam lài, tơnơ̆ mờ hơ̆, ală cau do mblàng yal nàng ală cau tàm hìu nhă mờ mpồl bơtiàn lơh jăt bal ală gùng dà broă lơh bơh Đảng, adăt boh lam bơh Dà lơgar niam bơnĕ ngan”.

Tàm sàh Đơn Dương, do là sàh làng bol jơi bơtiàn ờ gal cau geh mờr 40% khà kờp làng bol, uă ƀòn lơh broă ờs mờng mờ ală mpồl dròng cing kung gam lơh broă geh cồng nha tài kơnòm bơh broă lơh bal bơh mpồl cau geh bơngă pin dờn dê. Mò Lê Thị Hồng Nhung, Phó Kwang lam bồ cơl dŭ lơh broă Niam chài Mpồl bơtiàn sàh Đơn Dương pà git: “Sàh Đơn Dương geh ờ uă ƀòn lơh broă bè lơh sơnbiăt trà tàm thôn Ha Wai, hơ̆ sồng tàñ sơ̆ tàm thôn Đa Hoa, hơ̆ sồng geh ờ uă Mpồl dròng cing. Ală cau geh bơngă pin dờn pơgồp bal mblàng yal gùng dà broă lơh bơh Đảng dê, kung bè là bơto, ngui ală bơta kwơ niam chài bơh broă lơh ờs mờng tàm ƀòn lơgar dê. Ală cau do pơgồp bal mờ Lam bồ thôn, Bí thư Chi bộ kung bè ală gah, mpồl lơh broă, ală hìu yàng lơh broă bal mờ ƀòn lơgar tàm broă prăp gàr bơhiàn niam chài ờs mờng”.

Bơh ală bơnơ̆ tàñ ồi tàm Dà Huoai, Cát Tiên tus mờ săp dròng cing mpong sùm tàm brê bơnơm Lang Biang dê, gơtùi gŏ bơta niam chài gam geh pơrlai kah jơh mờ bơh alqă mpàng tê mpồl bơtiàn dê. Phan lời wơl geh prăp gàr, bơto mờ pơgồp bal mờ bơtàu tơnguh lòt nhơl kung là broă nàng tam gơl bơta kwơ niam chài gơs bơta pràn bơtàu tơnguh lơh sa, bơ̆t bơtàu càr Lâm Đồng bơtàu tơnguh mhar, kơl jăp.