Bồ nhai 7 pa do, dơ̆ pơrlòng Võ thuật bơhiàn yau ală Anih tàp võ Bình Định tàm pơrlòng Cúp Bơtau Quang Trung dơ̆ 8 nam 2026 kung neh geh bơyai lơh mờ bơta tus bal bơh rlau 700 nă cau chài pơlam tàp võ, cau bơsram võ tus bơh 75 anih tàp võ mờ mpồl tàm càr, bơdìh càr. Ồng Bùi Trung Hiếu - Phó Kwang Lam bồ Sờh Niam chài, Tàp pràn să jan mờ Lòt nhơl càr Gia Lai pơn yờ să, võ bơhiàn yau Bình Định là phan lời wơl geh lơh gơs bơh kah yau bơt bơtàu dà lơgar, sền gàr dà lơgar jơi bơtiàn dê:

“Ngai 31/3/2025, Thủ tướng Chính phủ neh ring bal pơyua sră nggal yal UNESCO in sền swì, cih mat Võ bơhiàn yau Bình Định mut tàm Mat phan lời wơl niam chài ờ di phan bơna ala mat kòn bơnus dunia dê. Do là tềl tơnggŏ chờ hờp ngan gơ wèt mờ  Võ bơhiàn yau Bình Định, ờ mìng là bơta pơn yờ să ai phan lời wơl dà lơgar brồ guh ndrờm pal ală lơgar mờ gam pơgồp bơnah tơnguh jơnau git wă, kơnòl mpồl bơtiàn dê tàm broă sền gàr, prap gàr ală bơta kuơ niam chài jơi bơtiàn dê”.

Bơh ngai 26/7 tus ngai 02/8 tus do, Dơ̆ pơrlòng Võ bơhiàn yau ală mpồl ală lơgar rơp geh bơyai lơh tàm Quy Nhơn - Gia Lai mờ mờr 650 nă cau bơsram võ, cau chài võ tàm pơrlòng tàm ală tơngume bơta chài tam lơh mờ tê gời mờ tàm dră bồ. Bơdìh mờ tàm pơrlòng, mpồl bơyai lơh gam rơndap ai ală mpồl tus bal lòt sền An Khê Trường, hìu Phờk Long Phước mờ hìu kuơ̆ Bánh Ít nàng sền niam chài, kah yau mờ phan lời wơl ù tiah Gia Lai dê.

Pơn jat hơ̆, bơh ngai 02 tus ngai 05/8, Pơrlòng ală lơgar Võ bơhiàn yau Việt Nam dơ̆ 9  - Gia Lai 2026 rơp geh lơh tàm sơnah ƀòn Quy Nhơn mờ bàr pe ƀòn lơgar rềp bal mờ tơngume “Võ bơhiàn Việt Nam - Bơta niam àng gơ crà”. Dơ̆ pơrlòng tơrgùm 16 mpồl ală lơgar tus bơh 9 lơgar bal mờ 43 mpồl tàm lơgar mờ 11 mpồl võ thuật ƀòn lơgar.

Bơta tờm bơh pơrlòng dê là dơ̆ bơyai lơh dơ̆ lĕ bal bơh rlau 1 rbô nă cau chài pơlam tàp võ, cau bơsram võ mờ ală jơnau kuơmàng Công pháp mờ Hùng kê quyền - do là jơnau quyền tiơng pơn rơ ngan gơ jat bal mờ ù tiah Tây Sơn, ai tơnggŏ nùs nhơm ki ngàm võ mờ bơta niam chài bơh võ bơhiàn Bình Định dê. Bơta pa bơh dơ̆ pơrlòng nam do dê là broă lơh bơyai lơh dơ̆ lĕ bal dờng ngan, pơgồp bơnah lơh sir sră nggal nàng dan Võ bơhiàn Bình Định yal UNESCO cih mat jờng rơ là phan lời wơl niam chài ờ di phan bơna ala mat kòn bơnus dunia dê.

Jat mò Nguyễn Thị Thanh Lịch - Phó Chủ tịch Anih duh broă Làng bol càr Gia Lai, ƀòn lơgar gam rơhời bơtàu tơnguh broă lơh tơrlòng lài “lơh sa phan lời wơl”, tàm hơ̆ võ bơhiàn geh git nền là dùl tàm ală bơta kuơ tờm nàng bơtàu tơnguh lòt nhơl, niam chài mờ sơlơ tơnguh rlau tai bơta tìp mat lơh kwèng ală lơgar. Bơh pah dơ̆ pơrlòng, ală gah mpồl võ tàm lơgar mờ bơdìh lơgar geh tai tŭ niam tàm tìp, bơsram, đòm jat, sơrlèt gan bơta gơ kòl bè dà đơs mờ dà đơs bal võ thuật dê, bơh hơ̆ sơlơ tơrbŏ kơ̆ nùs nhơm lơh bơyô bal mờ lơh gơ rề nùs nhơm ki ngàm võ Việt Nam:

“Jơnau kờñ bol hi dê bơh dơ̆ pơrlòng là ală mpồl võ tàm lơgar geh tàm cribơyai mờ gơp, mờ is ồn là geh tàm cribơyai ală lơgar, mờ kung yal tơnggit bơta niam chài võ càr dê. Digơlan rơp geh bơta gơ kòl bè niam chài, gơ kòl bè dà đơs, mơya bơh ală dơ̆ tàm cribơyai bè võ thuật den rơp dong sơlơ tơnguh tam bơta tam klac bal. Mờ uă nam do, võ bơhiàn càr dê neh dờp geh bơta sền gròi uă ngan bơh ală mpồl võ tàm dunia. Bơh 9 dơ̆ bơyai lơh neh lơh geh dùl nùs nhơm, bơta sền gròi dờng ngan gơ wèt mờ nac ală lơgar”.

Bơh ală anih tàm pơrlòng duh hồl tus ală dơ̆ bơyai lơh dơ̆ lĕ bal geh git nđờ rbô nă cau, bơh ală dơ̆ tìp mat lơh kwèng niam chài tus bơta kơp kờñ ai phan lời wơl Việt Nam dê brồ guh ndrờm pal ală lơgar, ală broă lơh võ bơhiàn tàm càr Gia Lai gam ai gŏ bơta pràn kis kơ̆ dơn ngan bơh dùl phan lời wơl ờ mìng geh prap gàr tàm ală jơnau quyền dê, mờ gam geh tàm pơrdờn wơl mờ bơta kờñ gơboh, bơta pơn yờ să mờ kơnòl bơh uă rơnàng tŭ do dê.