Ồng Liêng Hót Ha Chong (kòn cau K’Ho) nam do neh rlau 95 sơnam, ơm tàm thôn Dà Kao 2, sàh Dam Rong 4, càr Lâm Đồng yal wơl bè do, mò pàng ồng dê neh lòt ntrờn bơh càr Dăk Lăk tus Lâm Đồng jòi ù tơnggơs ƀòn bơh rlau dồ rơhiang nam lài. Bơta tàm bơrlŭ bal niam chài jŏ rài dong làng bol ơm kis tàm tiah do chài đơs jơh bal pe dà đơs kòn cau: Rơđê, K’Ho mờ M’Nông. Lơh jăt jơnau lơh nền bơh Đảng mờ Dà lơgar dê, cau K’Ho Cil neh tơn jơh rài kis ơm kis ntrờn làm bă tiah jòi ù lơh sa bơh jŏ. Tơl hìu bơnhă, jơi nòi sùm sền gròi tus broă săc rwah bă ù nàng lơh hìu, ơm kis kơ̆, lơh sa kơ̆ dồ bă tiah. Tŭ jòi geh bă ù dipal nàng lơh hìu, hìu bơnhă rơ̆p jơh nùs răc dan:

“Ơ ală Yàng Ù, Yàng Mìu, Yàng Càl, Yàng Dà sền gŏ bal mờ ai lơngai bă ù bơkah lơngồt do ală gar kòi, gar tơngời hờm ram wil tơl, dan bă ù do ai bơta ring lơngai, bañ lời hìu bơnhă ƀòn lơgar kòp jê, dan ai bơta pràn ai hìu bơnhă, ai làng bol ƀòn lơgar in…”.

Lài mờ tŭ lơh hìu, cau tờm hìu rơcăng phan lơh yàng geh dồ nơm iar mờ dồ drăp yăng tơrnờm dềt nàng lơh yàng dan gơnoar mờ Yàng Ù. Mò Bon Krong K’Ang ơm tàm thôn Dà Nhinh 1, sàh Dam Rong 4 pà gĭt, rài kis đah hwềng bơh cau K’Ho dê sùm geh ală yàng jơm glòm, sền gàr, lơh hìu là broă dờng màng den tàng pal răc dan ală yàng.

 “Dan Yàng bơnơm, Yàng brê, Yàng ù, Yàng ƀòn dê sền gŏ bal ai hìu bơnhă in ngai do dan gơnoar geh lơh hìu…Do là jơnau răc dan tàm broă lơh yàng mŭt ơm hìu pa bơh mò pàng bol hi dê lời wơl ờ gŏ geh gơnoar lời tĕ mờ rơnàng oh kòn kòn sau pal geh kơnòl prăp gàr ală bơhiàn niam bơnĕ bơh yau do”.

Tơnơ̆ tŭ hìu geh lơh sir, hìu bơnhă pơn jăt tai lơh yàng mŭt ơm hìu pa tàm bơnhă hìu bơnhă. Phan lơh yàng pal geh jăt bơhiàn mò pàng dê bơh yau là dồ nơm so mờ dồ nơm ada. Mhàm bơh bàr phan do dê prih gùt dar hìu bal mờ bơta pin dờn tơn roh jơh ală bơta brêng bơta ờ niam ờ bơtuah bơtàu, răn dan mò pàng mờ ală cau neh chơ̆t ai lơngai ai bă ù pa in geh lơngăp lơngai gơboh gơbài.

Tŭ broă lơh yàng đah hwềng neh lơh sir jơh, hìu pa ngan ngồn dờp rò ală săp ntas nggồr chờ bơh sơnrờp. Hìu bơnhă rơ̆p dròng cing chờ nàng yal mờ cau tàm ƀòn in. Kơno săp dròng cing, làng bol tàm ƀòn rơndăp broă rơcăng tŭ jiơ tus chờ hờp bal mờ hìu bơnhă. Lơh yàng mŭt ơm hìu pa rài yau bơh cau K’Ho Cil dê gơcèng bơta mpồl bơtiàn uă ngan. Gơ jăt tàm rài kis hìu bơnhă, cau pas geh phan bơna uă den sa rơpu, sa kơnrồ, sa sur; ai dilah cau lơi ờ geh den mìng sa iar gời lơm. Bơta tờm bơh ngai chờ dê ờ di là broă ñô sa bơñul lơm bè ờ, mờ bơta tam klăc bal: bơh cau kra tus cau kơnòm, bơh klau pơnu tus ùr ơruh tàm tê bal mŭt bal tàm dar tam ya ờs mờng bơh yau bơnĕ bơnài ngan. Kah wơl bè bơta niam do, mò Rơ Yam K’ Jang ơm tàm thôn Dà Nhinh 1, sàh Dam Rong 4, yal wơl:

 “Bol hi tàm ală dơ̆ bè do kung ndrờm bè lơh yàng sa piang kòi pa sơl, bol hi rơ̆p đơs tòng, đơs tam pơ̆t nàng chờ hờp bal mờ hìu bơnhă, hìu lơi geh rơpu den sa rơpu, geh kơnrồ den sa kơnrồ…tŭ hơ cau kra, cau kơnòm, cau ùr, cau klau ñô sa chờ hờp bal đơs crih tam ya mờ lơh tam klăc bal mờ gơ̆p bơh ală jơnau tam ya…hơ̆ là bơhiàn niam bơh mò pàng bol hi dê lời wơl ờ gơtùi sang tĕ, pal prăp gàr mờ ngui niam”.

Broă lơh yàng hìu pa mờ ngai chờ mŭt ơm hìu pa bơh cau K’Ho Cil dê tàm càr Lâm Đồng ờ mìng ƀươn soh lơm là broă jòi tiah ơm kơnhăp lơm mờ gam là jơnau tơnggŏ loh làng ngan ai dang che tàm bơrkuăt bal mpồl bơtiàn mờ nùs ki ngàm kah ưn ngài gơ wèt mờ brê bơnơm dờng, mò pàng. Hơ̆ ngan là bơta niam chài tờm ngan, là bơhiàn niam đah hwềng mờ nùs gơboh bal cau tàm ƀòn kơ̆ kơl jăp dong bơhiàn niam chài krơi is bơh cau K’Ho Cil dê kis sùm bal mờ tŭ tơngai.