Bơta tờm bơh Festival dê là broă lơh đơs crih tamya geh rơcang lơh nền nòn ngan mờ bơta tus bal bơh ală cau chài tàm lơgar mờ ală mpồl đơs crih tamya ală lơgar; dơ̆ lơh chờ Carnival, lòt tàm gùng rơndeh bơkàu pơgồp bal mờ bơyai lơh đì mô tô phơng khối dờng mờ oto yau lơh gơlik nùs nhơm duh hồl, krơi is; git nđờ jơt broă lơh niam chài, tàp pràn să jan, lòt nhơl, phan sa neh geh bơyai lơh tàm uă tiah, gơ hòi gơ jà gal ngan làng bol mờ nac lòt nhơl.

Đơs tàm dơ̆ tơn jơh, ồng Nguyễn Long Biên - Phó Chủ tịch Duh broă sùm Anih duh broă Làng bol càr Khánh Hòa, cau lam bồ mpồl bơyai lơh Festival Dà lềng Khánh Hòa 2026 đơs nền, Festival neh cèng tus ù tiah bơ tòm tơrgùm bơh niam chài, đơs crih tamya, tàp pràn să jan mờ lòt nhơl; jờng rơ bơta niam bơh niam chài mờ kòn bơnus Khánh Hòa dê; lơh gơlik nùs nhơm kờñ gơboh mờ bơta pơn yờ să bè dà lềng, bồt bơlàu ƀòn tờm; lơh gơ rề jơnau kờñ pơyua bơtàu tơnguh tơlir, bơtàu tơnguh kơ̆ kơljap jŏ jòng sùm mờ bơta kơp kờñ brồ guh hờ dà lềng dờng: “Añ pin dờn ngan là ală broă sền git niam tàm Festival Dà lềng Khánh Hòa 2026 rơp pơn jat tai lam ală bơyô tàm lơgar mờ ală lơgar tus rềp rlau mờ Khánh Hòa; nàng tơl dơ̆ rê wơl là dùl dơ̆ sền gŏ niam rlau tai bơta niam bơh ù tiah, kòn bơnus, niam chài mờ bơta kơp kờñ bơtàu tơnguh ƀòn tờm bồt dà lềng dê. Khánh Hòa sùm pờ ơnàng guàng tê wă rò ală bơyô làm gùt ală tiah mờ kơp kờñ geh tìp wơl ală bơyô tàm ală dơ̆ lơh Festival Dà lềng pơn jat tai - tiah  mờ dà lềng kung gam tơlir, nùs nhơm kòn bơnus kung gam niam bơnĕ mờ bơta kơp kờñ brồ guh hờ dà lềng dờng rơp pơn jat tai geh cih gơs mờ ală bơta gơklŏ gơcrà pa”.

Bơh ală bơta kuơ lơh geh, Festival pơn jat tai gơ gơs là rbàng tơrbŏ, lơh gơs uă tŭ niam lơh broă bal bè bơcri priă, kă bro phan, niam chài mờ lòt nhơl đah Khánh Hòa mờ ală càr, ƀòn dờng, mpồl lơh broă bal tàm lơgar mờ ală lơgar. Mpồl bơyai lơh kơp kờñ, tơl nă nac lòt nhơl rơp gơ gơs là dùl nă cau ala mat, yal tơnggit rùp să ù tiah, kòn bơnus Khánh Hòa tus mờ gơp bơyô làm gùt ală tiah. Ngui niam cồng nha Festival dà lềng dê, tơngai tus, Khánh Hòa rơp pơn jat tai bơyai lơh uă broă lơh ndrờm pal ală lơgar, tàm hơ̆ geh dar dut ndơl dơ̆ pơrlòng Ùr hàng dunia dơ̆ 37 (Miss World) mờ Ùr hàng Hoàn vũ Miss Cosmo.

Càr Khánh Hòa kung tơlik jơnau kờñ pơn jat tai tam gơl pa tơngume, broă lam lơh nàng Festival Dà lềng gơ gơs là mat sơnđan niam chài dà lềng ndrờm pal ală lơgar, là bơta gơn kơnờm chồl tơnguh bơtàu tơnguh lơh sa, lòt nhơl, gơ hòi gơ jà bơcri priă mờ lam lơh ngan ngồn bơta kơp kơnờm bơtàu tơnguh mhar, kơ̆ kơljap sùm tàm rài pa.