Bơh lài do, kis bơnĕ bơnài bal mờ brê bơnơm geh is den bơta hòi mờ bơtăng là bơta sac rơwah bơh kòn cau Rơđê dê nàng gơ dờp mờ tiah ơm kis. Djam ƀlê là dùl bơta biăp mờng kwèng ngan gơwèt mờ kòn cau Rơđê dê, là phan sa bơkah pơn rơ mờ kung là dùl phan lơh sơnơm kwơ.

Tàm kàl prang Djam ƀlê sùm hòn uă ngan gơ gơs mpung tàm ală tiah kềng gah brê. Tàm kàl mìu den bơta bơkah bơh Djam ƀlê dê ờ gam ƀô bơkah tai. Nàng trŭ gơm phan sa bơh biăp brê do, kòn cau Rơđê mìng pĭc nha lơbơn, cồng mơda rê rào goh mờ trŭ gơm jat jơnau kờñ sa bơh tơl nă cau dê. Djam ƀlê geh bơta bơtang, ƀô bơkah ngan. Bi H’Lip Kƀuôr, ơm tàm ƀòn Yao, xã Ea Tul, kơnhoàl Cư̆ M’gar, càr Dăk Lăk pà gĭt, Djam ƀlê là phan sa rềp mềl ngan mờ kòn cau Rơđê dê: “Tơnơ̆ tŭ pĭc añ pơr tàm bơnhă ồs, den hơ̆ dờñ nha, cồng ơn tàm prèng. Tơnơ̆ hơ̆ den añ ƀŏ mrĕ, ƀoh, ƀòk ngòk, hàñ kòn cau tàm bơr lŭ bal mờ Djam ƀlê. Tàm kàl do, Djam ƀlê ờ tŭ lơi ờ geh tàm dơ̆ sào sa piang tàm mìr”.  

Kòn cau Rơđê sùm trŭ gơm Djam ƀlê krơi is, sa ris halà chàng, hồl... Ală rơnàng kơnòm să den sùm kờñ gơm ală phan sa mhar bè tàm bơr lŭ bal mờ ală phan tĕ, halà hồl cĭk mờ dà màn, chàng bal mờ ka hấp, ka ro... Ai ală cau dờng sơnam den sùm gơm ală phan sa do mờ uă bơta kal ke rlau, bè gơm biăp pài, halà tàm bơrlŭ bal mờ ală phan tĕ is geh bơh kòn cau Rơđê dê nàng trŭ gơm nha Djam blê. Mò H’Dluê Êban, ơm tàm ƀòn Hra B, xã Ea Tul, kơnhoàl Cư Mgar, càr Dăk Lăk pà gĭt: “Tŭ gơm phan sa do, tŭ dà rơngŏ, den hơ̆ sồng tuh dà kơmbuh chu bơh nha prìt halà kơmhò khoah. Tơnơ̆ hơ̆ he tĕ tai ală phan tĕ. Tŭ dà rơngŏ den ơn nha Djam ƀlê, tĕ dùl ết khoah phồng sin, tĕ dùl ết hàñ kòn cau. Bơh lài do, kòn cau Rơđê neh gĭt sa phan do rau, broă lơh do ờ hoan geh cau trŭ. Uă cau kờñ sa ris halà chàng...”.

Ai gơwèt mờ bi H’Zen Ayun, ơm tàm ƀòn Pơr, xã Ea Tul, kơnhoàl Cư̆ Mgar, càr Dăk Lăk den ala mờ gơm biăp dà, bi chàng Djam ƀlê bal mờ ngkòñ mờ tĕ tai ală phan tĕ ờs ngui pah ngai lơh phan sa in sơlơ bơkah mờ kờñ sa ngan. Bi đơs là ală phan sa bơh Djam ƀlê do ờ mìng lơh bơkah ai ală dơ̆ sào sa tàm hìu bơnhă dê lơm, mờ gam là dùl tàm ală phan sa bơkah pơn rơ geh trŭ gơm nàng wă năc tàm mpồl bơtiàn. Bi H’Zen Ayun đơs: “Añ chàng Djam ƀlê mờ bal mờ blơn sùt kòn cau, ngkòñ, tĕ tai ală phan tĕ bè ƀoh, ƀòk ngòk, mrĕ uă halà dùl ết jat tơl nă cau kờñ sa dê. Djam ƀlê sùm bơkah ngan rlau jơh tàm kàl prang, tàm kàl mìu kung geh bơta bơtang sơl gơsràng sơl mơya ờ gam ƀô thồm tai. Phan sa do geh bơta bơtang, ƀô thồm. Do là phan sa bơkah pơn rơ bơh kòn cau Rơđê dê”.

Tŭ do sơlơ geh uă cau kờñ ngan sa mờ jòi Djam ƀlê nàng gơm ală phan sa pah ngai in tài bơh do biăp, ƀô bơkah mờ pràn să jan ngan. Bulah trŭ gơm bè lơi den Djam ƀlê kung gam gàr bè ờs sơl bơta bơtang lơh bơkah ngan tiah brê bơnơm dê. Kòn cau Rơđê pin dờn là ală cau kờñ sa ală biăp, plai brê geh bơta bơtang là ală cau pràn kơl dang, tryang tryồng lơh broă. Ală cau lơi neh sa dùl dơ̆ phan sa geh bơta bơtang ƀô bơkah do rơ̆p kah sùm.