Hìu bơnhă oh mi mò Liêng Hót K’Hiên (cau K’Ho Cil) ơm tàm thôn Srê Đăng, sàh Tân Hội, càr Lâm Đồng geh tơl nă cau tàm ƀòn gĭt là hìu bơnhă geh bơhiàn ờs mờng bơh yau lơh ƀañ, tàm hơ̆ geh ƀañ tơngời, cau K’Ho Cil hòi là ƀan mbô neh gơgơs “măt phan kă bro” pơneh ngan tàm ƀòn. Tŭ mò Liêng Hót K’Hiên dờng sơnam, mò neh bơto yal wơl jơh ală bơta chài lơh ƀañ ai ală oh kòn, kòn sau ùr tàm hìu bơnhă in, den tàng gơtùi hòi hơ̆ là ƀañ tơngời hìu bơnhă dê lời wơl.

Bi Liêng Hót Zi Jăk hòi mò Liêng Hót K’Hiên là mơi êt. Tơnơ̆ tŭ jơh bơsram trung kâp sơnơm tơm ba, bi ờ lòt lơh broă jăt gah he neh bơsram mờ ngui jak chài neh bơsram geh nàng lơh gơlik ală phan sa “ƀañ tơngời lời wơl bơh yau” hìu bơnhă he dê sơlơ bơkah sơlơ pràn rlau. Bi Liêng Hót Zi Jăk, đơs:  “Ƀañ tơngời bơkah den dờng màng ngan là sơntìl tơngời. Mờ ƀañ bơkah ngan rlau jơh là ƀañ geh lơh bơh sơntìl tơngời lơiang bơh kòn cau he dê bơh yau he tam is. Mờ tơngời nàng ngui lơh ƀañ den ờ gŏ di kràñ ir, tài bơh kràñ ir den bañ dà halà kơndang, ờ gŏ lơbơn”.

Cau K’Ho sùm ngui sơntìl tơngời mbar bò geh tiah hòi là tơngời lơiang bò. Sơntìl tơngời do lơiang lơbơn, bơkah, cồng nha lơh geh uă rlau mờ tơngai gơ ai sa gờñ rlau pơndrờm mờ tơngời rơmĭt bơh yau ƀòn lơgar dê. Jăt mờng chài bơh làng bol dê, ală tơngời neh tơl ngai nàng lơh ƀañ den lòt gơ jàr tàm tŭ àng drim gờñ nàng tơngời geh bơkah ngan rlau jơh. Tơngời tơnơ̆ tŭ plồ bơh sươn rê, geh tì ngkàr mờ phàc tơn nàng ờ gơ in roh bơta bơkah lơngồt bơh tơngời dê. Ngkàr tơngời kung geh ngui sơl nàng klơm ƀañ. Bi Liêng Hót Zi Jăk yal tai:  “Tơnơ̆ tŭ neh lòt klơh tơngời bơh sươn rê, he tì kơltau, tơnơ̆ hơ̆ rơ̆p phàč mờ ơn tàm măy mờ măy, ơn dồ êt sơdàng mờ dà toh, tài bơh dilah ơn uă ir sơdàng halà dà toh den rơ̆p lơh roh tĕ bơta lơngồt bơkah geh is bơh tơngời dê. Tơnơ̆ hơ̆ rơ̆p ai kơltau tơngời nàng klơm bañ mờ cèng lòt gơm di 2 jiơ là sin tơn, ƀươn soh ngan”.

Ƀañ tơngời lơh ƀươn soh ngan, ndrờm bè tàm ƀòn lơgar, cau ùr K’Ho ndrờm gĭt lơm lơh ƀañ tơngời. Tài bơh broă lơh ờ lơm pah, ờ geh tŭ jiơ nàng lơh is, tàm tŭ pah ngai kung gam geh sơl jơnau kờñ sa ƀañ tơngời gơm bè dùl phan sa ờs mờng. Bơh hơ̆, ƀañ tơngời gơm gơgơs phan kă bro, là phan sa bơkah bơh yau, ờ mìng tăc mờ làng bol tàm ƀòn lơgar in lơm mờ gam pơnđàng tàm internet mpồl bơtiàn tăc mờ ală cau tàm ƀòn ndai tai, geh cau sa kờñ ngan. Bi Liêng Hót Rebeca là kòn ùr tơnhoa (gam geh hòi là bơnŭ) mò Liêng Hót K’Hiên dê. Bi là dùl nă pơgru bơto kơnòm, mơya bi kung gam lơh sùm broă lơh “ƀañ lời wơl bơh yau” hìu bơnhă dê.

“Bulah añ là dồ nă cau pơgru ờ ru ngan mờ broă bơto bol kơnòm mơya, añ ngui tŭ ru nàng lơh piang lă tăc mờ ală oh mi tàm ƀòn lơgar in, tài bơh ờ mìng geh tai priă jền nàng ngui tàm rài kis mơya bơta dờng màng ngan rlau jơh là bol hi là ală rơnàng oh kòn, kòn sau gen tàng pal prăp gàr wơl ală broă lơh ờs mờng bơh yau hìu bơnhă bol hi dê”. 

Bi Lơ Mu Liviơ là dùl nă cau mờng blơi ƀañ bơh hìu bơnhă mò Liêng Hót K’Hiên dê, đơs bè do: "Ƀañ tơngời là phan sa bơkah ờs mờng bơh yau bơh jơi bơtiàn bol hi dê, cau lơi kung gĭt lơh lơm. Mơya lơh ƀañ tơngời gơm mờ tăc den tàm ƀòn do mìng geh dùl hìu bơnhă bi Rebeca dê lơm lơh. Hìu bơnhă bi hơ̆ dê lơh ƀañ bơkah ngan sơl, mờ sàng goh tai, añ gŏ gơlơh chờ hờp tài tàm ƀòn lơgar geh hìu bơnhă đòm jăt tàm pơdờn mờ prăp gàr broă lơh ƀañ ờs mờng bơh yau bơh jơi bơtiàn he dê nàng broă lơh do ờ gơtìp hŭi roh tĕ mờ rlau mờ hơ̆ tai lơh geh tai priă jền nàng ngui sa tàm rài kis hìu bơnhă, añ gơlơh chờ hờp ngan ală cau ùr K’Ho ngăc ngar jak chài kung bè gĭt đòm jăt mờ sền gàr broă lơh ờs mờng bơh yau jơi bơtiàn he dê, tàm hơ̆ geh broă lơh ƀañ tơngời do”.

Ƀañ tơngời gơm bơh hìu bơnhă mò Liêng Hót K’Hiên dê lơh neh tăc mờ năc tàm làm gùt càr Lâm Đồng dê. Bơdìh hơ̆ tai, ƀañ tơngời kung geh tăc mờ cau năc mờng kwèng bơdìh càr in. Pah dơ̆ lơh rlau 200 nơm, dùl nơm 20 rbô đong…do là  phan lơh geh priă jền bulah ờ hềt uă ngan mơya kung dong ai cau ùr K’Ho in bè hìu bơnhă mò Liêng Hót K’Hiên gŏ gơlơh chờ hờp ngan tài bơh neh gĭt prăp gàr mờ bơtàu tơngguh broă lơh ƀañ ờs mờng bơh yau hìu bơnhă he dê, is ồn là ƀañ tơngời gơm.