Trồ neh mho tàm ƀòn Kon H’Ring, sàh Cư Mgar, càr Dăk Lăk, mò Nŏ Đi, 68 sơnam nggui kềng bơnhă ồs hìt (hơng) gam rơcang trŭ gơm phan sa mang hìu bơnhă in. Ngai do, mò gơm biap bơh gòl ju brê. Nŏ Đi pà git, gơ wèt mờ cau Sơdàng, tơl bơta phan bơh tờm ju dê ndrờm geh kuơ lơm. Bơnah gòl tờm ju brê dê là phan nàng gơm gơs ală biap sa bơkah, geh kuơ să jan in mờ cèng bơta ƀô bơkah krơi is tiah brê bơnơm dê.

Gòl ju brê bơkah ngan rlau jơh là tàm kàl prang. Làng bol lòt tam brê jòi ală tờm ju di mat, koh mờ plồ tơl tap kràñ nàng ai gòl kò cèng rê gơm biap sa. Nŏ Đi đơs là, nàng biap gòl ju brê ƀô thồm krơi is den pal tĕ tai ƀòk tờm sồi dê, kờñ biap kơt den pal tĕ tai phe ƀŏ:

“Tơnơ̆ tŭ ai tơl gòl ju brê den he tah dềt hơ̆ sồng ai ƀòk tờm sồi dê neh rơcang bơh lài bơrlŭ bal mờ gòl ju pơnda he neh tah dềt, hơ̆ sồng ƀŏ bal. Tơnơ̆ tŭ ƀŏ den ơn tàm glah, tuh dà gơ bam jơh phan hơ̆ sồng ìs, pràng dùl ngai. Rài yau den làng bol mờng ơn tàm ding gle nàng pràng dùl ngai.

Tŭ neh pràng jơh den ai gòl ju brê pơn da, păt dà gơ in rơ sơh den pơn jat tai bơrlŭ bal mờ ƀòk phe hơ̆ sồng ƀŏ bal. Bơnah dà păt bơh gòl ju brê pơn dà he ơn tàm glah, hơ̆ sồng gơm gơ in rơng gŏ, tŭ dà neh rơng gŏ den he tĕ phan gơm. Dilah geh ka ti, ka… he gir bơh dà croh halà poac phan brê den he gơm bal. Tĕ tai ală phan bè mrĕ, nha é, nha ƀô den sơlơ bơkah rlau tai, gơm ndang, sơ wài ndang nàng biap ờ gơtìp gơ klac mờ rơ ồ. Tŭ lơi sền gŏ ƀòk phe sin den biap gòl ju brê pơnda neh sin mờ he gơtùi sa rau”.

Gơ wèt mờ cau Sơdàng, biap gòl ju brê ờ mìng là dùl biap sa hìu bơnhă dê in. Tài broă gơm biap pal lơh uă bơnah, bơh broă rơcang phan gơm, tus broă gơm kờñ pal geh tŭ jơ, biap do gam ai tơnggŏ nùs nhơm tàm bơrkuăt bal bơh hìu bơnhă, mpồl bơtiàn dê.

Ồng A Hvâng, 71 sơnam ơm tàm ƀòn Kon Hring pà git, ki ngàm ală bơta lơi mờ brê bơnơm ai pà, làng bol kòn cau Sơdàng git bơta chài koh kơl dipal tờm ju brê, mìng koh tơl nàng sa, nàng chi che in pơn jat tai hòn gơs. Tàm ală dơ̆ lơh chờ cau Sơdàng dê ờ gơtùi ờ geh biap gòl ju brê:

“Pah dơ̆ tàm ƀòn bơyai lơh yàng chờ sa piang kòi pa, biap gòl ju brê ờ gơtùi ờ geh, sa gơ bơkah ngan, ngan là tŭ gơm mờ ka ti, ñờp, ka gir tàm dà croh, cau lơi kung gơ dan sa lơm. Làng bol ñô tơrnờm bơkah bal mờ sa biap bơkah bơh gòl ju brê là di gùng di dà ngan tơn. Hìu bơnhă añ den gơm sùm biap do, làng bol gùt dar gŏ ƀô thồm den khi kung dan nàng sàu piang”.

Kung sùm gơm biap do sơl, mò H’Chel, 68 sơnam ơm tàm ƀòn Kon Hring, sàh Cư Mgar, càr Dăk Lăk pà git, tơl nă cau gơm biap gòl ju brê rơp tĕ tai ală phan geh is nàng biap gơ in bơkah, ƀô thồm rlau:

“Tàm ală ngai tơ wès kòi, gờm chờ mut hìu pa, ñô bau bol hi sùm gơm biap bơh gòl ju brê pơn da. Do là biap sa mờng kwèng mơya bơkah ngan, nàng gơm biap bơkah den pal geh tai phan tĕ geh is bè mrĕ, nha ƀô,…”.

Biap gòl ju brê cau Sơdàng dê lơh gơ kờñ cau sa tài bơh bơta bơkah krơi is mờ jơnau yal bè rài kis mpồl bơtiàn gơ rờm bal mờ brê bơnơm, bè bơta tryăng tryồng lơh broă. Tàm rài kis pa tŭ do, biap sa do kung sùm geh mat tàm tơl dơ̆ sàu sa hìu bơnhă, tàm ală dơ̆ lơh chờ mpồl bơtiàn kung bè mờng kwèng kis pơn dềt să mơya bềng lìu nùs nhơm niam làng bol kòn cau Sơdàng dê tàm ù tiah brê bơnơm Tây Nguyên.