Biăp pài ƀòk tơngời (Trau pai) bơh kòn cau M’nông ơm tàm Buôn Đôn geh trŭ gơm bơh ală phan geh lài tàm brê bơnờm. Nàng gơm biăp pài tơngời bơkah, ờ mìng là rcang tơl ală phan gơm tơl làm, mờ gam geh broă trŭ gơm bơh tơl nă cau dê. Phan gơm tờm ngan, tàm hơ̆ geh: ƀăng sràt, hàn kòn cau, ƀòk tơngời, ƀòk phe mờ ală phan tĕ bè boh, ƀòk ngòk, hạt nêm. Ƀăng geh lơh sràt lài, ƀòk tơngời là phan gơm ờ gơtùi ờ geh tŭ gơm biăp do. Cau ùr M’nông ƀŏ phe gơ gơs ƀòk nàng lơh dùl tàm ală phan gờm biăp pài. 

 Sơn rờp, khi tram phe tàm dà bơh 30 phuk tus 1 jiơ. Tŭ phe neh lơbơn tă ơn rơsơh dà, ơn tàm mpal ƀŏ lề. Tŭ do gơtùi cèng phe măy gơ gơs ƀòk, mơya pal ƀŏ is ƀòk phe hơ̆ sồng bơkah, lơngồt. Bi H’Nụ Budam, ơm tàm ƀòn Ea Rông, xã Krông Na, kơnhoàl Ƀuôn Đôn, càr Dăk Lăk pà gĭt, broă gơm biăp pài bơkah den kwơ màng ngan tŭ gơm biăp do là broă tuh dà ƀòk phe tàm glah pal xoài ring tê nàng lơh geh bơta gơ đềt ai biăp pài in mờ sing ồs hơng di pal nàng biăp pài in sin ring bal.

Bi H’Nụ Budam đơs: “Biăp pài ƀòk tơngời bơkah mờ ƀuơn ngan gơm là phan sa kwơ màng tàm ƀòn lơgar bol añ dê, tài bơh geh gơm bơh ală phan bè, ƀăng, tơngời, hàñ kòn cau geh rcang lài. Biăp do lài ngan gơm ƀăng bal mờ tơngời lài nàng gơ in sin lài, tơnơ̆ hơ̆ ƀŏ ƀòk phe neh tram lài den hơ̆ sồng ai ƀòk jồr geh nàng ai bơnah dà ƀòk dê gơm sin tơnơ̆ hơ̆ tĕ tai phan tĕ ai gơ in gơdờp jơh bal mờ 3 rơnàng cau tàm hìu bơnhă, cau kra, cau kơnòm, ồng mò, tơl bơta pràn bơkah mờ tơl dơ̆ sa ai tàm hìu bơnhă in”.  

 Tŭ sa biăp do geh bơta ƀô thồm mờ bơta bơkah ngan. Biăp do gơtùi sa ala piang halà sa bal mờ piang. Uă cau kờñ sa biăp do tài bơh bơta lơngồt, lơbơn bơh tơngời, bơta sràt bơh ƀăng sràt tàm bơrlŭ bal mờ piang lơbơn sa bơkah ngan. Biăp do pràn bơkah mờ ƀuơn ngan ai gùng tơrlề phan sa in den cau kra, cau kơnòm ndrờm kờñ sa ngan.

Uă cau M’nông gĭt gơm mờ sền do là dùl tàm ală phan sa bơkah pơn rơ bơh jơi bơtiàn he dê. Do là dùl phan sa ờ gơtùi ờ geh tàm ală dơ̆ sa chờ hờp, tam bau, tàm dơ̆ chơ̆t ƀồc tàm ƀòn lơgar, geh làng bol gơm tàm ală dơ̆ lơh chờ wă nò ală năc bơh tiah ngài tus mờ bơta niam chài phan sa bơh kòn cau M’nông dê. Bi H’Nụ Budam, ơm tàm ƀòn Ea Rong, xã Krông Na, kơnhoàl Ƀuôn Đôn, càr Dăk Lăk pà gĭt: “Tàm do bol añ ngui pah ngai phan sa do halà geh dơ̆ lơh chờ, pơn yơu bè tàm dơ̆ tam bau, lùp bau, hìu bơnhă geh cau chơ̆t den biăp pài là dùl phan sa tờm bơh kòn cau M’nông dê. Biăp pài do geh ngui pah ngai tàm hìu bơnhă mờ kung geh gơm nàng wă năc tàm mpồl bơtiàn”.

Tŭ do, rài kis bơh kòn cau M’nông neh tơl làm rlau mơya phan sa biăp pài ƀòk tơngời bơh yau ờ gơtùi ờ geh tàm ală dơ̆ sa pah ngai. Dùl phan sa trŭ gơm ờ gŏ kal ke mơya cèng wơl bơta bơkah gơ lời wơl, rềp mềl lơh ală cau lơi tus mờ phan sa kòn cau M’nông tàm Buôn Đôn dê rơ̆p sơlơ kờñ ngan bơhiàn niam bơnĕ niam chài mờ kòn bơnus tiah do dê.