Biap pài geh gơm dồ bă nền nòn mờ chài ngan là dùl bơta ờ gơtùi ờ geh tàm rài kis phan sa bơh cau Sơdàng dê, ngan là tàm ală dơ̆ geh broă kuơmàng. Mò Y Num, ơm tàm ƀòn Ea Mao, sàh Tân Tiến, càr Dăk Lăk yal: “Lài mờ tŭ lap bau, bơyai lơh ñô bau kòn sau in, jơh gùt hìu bơnhă, oh mi, ƀòn lơgar ndrờm pơgồp bal dong kờl. Geh cau den lòt koh tờm ju brê, geh cau den lòt pơ̆ ƀang, geh cau den lòt jòi gòl, geh cau den lòt jòi ding kơrla… Cau lơi kung geh broă is he dê lơm, hơ̆ sồng bal mờ gơp gơm biap. Bơhiàn do neh geh bơh rài mò pàng rài yau mờ tus tŭ do kung gam geh sền gàr sơl”.

Bơh ală phan nàng gơm geh is lơm tàm brê bè tờm ju, kơmhồ tờm plai kriang, tờm ƀằng lăng, pơ ò brê… cau Sơdàng neh gơm gơs biap pài bơkah, ƀô thồm ngan, sa gơ lơh bơ sơt dồ êt, lơngàm bơkah ngan. Mò Y Koh ơm tàm ƀòn Cư Drăng pà git, biap pài tồn lah ờ geh bơta lơi mơya hơ̆ là bơta tơrgùm wơl bơh git nđờ rài, is ồn ngan. Dùl glah biap pài ờ mìng lơh hờm ndul, mờ gam lơh ram nùs tai, tài bơta bơkah hơ̆ geh gơm mờ jơh bơta kờñ gơboh bal mờ bơta đềt mềr: “Nàng gơm biap pài bơkah den bol hi rơ wah phe thồm tàm mìr, ƀŏ mờ mpal dơm chi. Tàm tŭ hơ̆, làng bol lòt tàm brê jòi tờm ju, plồ kơmhồ, ƀŏ lề mờ bùh chu bơh kơmhồ tờm ƀằng lăng, tờm plai kriang.. Tŭ neh geh tơl phan nàng gơm den hơ̆ sồng he sơn đờm gơm biap. Tờm ju ƀŏ lề geh gơm lài, tŭ neh sin den hơ̆ sồng ơn phe ƀŏ, sơ wài ring nàng ờ gơ klac, hơ̆ sồng tĕ tai poac, ka halà ntìng, gơ jat tàm bơta kờñ he dê. Dilah geh poac ƀa cỉ den chàng tơngi gơ in ƀô thồm, tơnơ̆ hơ̆ den hơ̆ sồng tĕ dà, tờm ju, dut ndơl là tĕ phe ƀŏ”.

Mò Y Rum, ơm tàm ƀòn Cư Drăng, sàh Tân Tiến, càr Dăk Lăk pà git tai: “Nàng biap pài gơ in bơkah den tơnơ̆ tŭ tram phe kòi mìr 2, 3 jơt phuk, bol he bañ măi mờ măi mờ pal ƀŏ mờ tê mờ mpal dơm chi, hơ̆ sồng biap pài gơ kơt, dà biap pài lơ ngồt, pal gơm dà duh lài den hơ̆ sồng tĕ poac halà ntìng, tŭ dà biaơ pài rơ gŏ den hơ̆ sồng rơ sìh phe ƀŏ rơ lĕ tàm glah biaơ, biap pài rơp bơkah, ờ gơtìp rơ ồ”.

Ñchi bơh taì biap pài tờm ju bơh cau Sơdàng dê gơ cèng bơta bơkah is ồn taih. Mò Y Hrưp ơm tàm ƀòn Kon Wang, sàh Tân Tiến, càr Dăk Lăk mblàng: “Phan nàng gơm biap pài geh jòi tàm brê den tàng sàng goh ngan, ờ geh sơnơm gơt tu, ờ geh bơta sơnơm tơmba lơi. Sa biap brê, plai brê den làng bol ờ rơngòt bơta lơi. Kờñ gàr bơta ris, bơkah hơ̆ den bơta lài ngan là bañ mus kơl brê. Tŭ pik den pik tơl gời, nàng tờm chi in gơs tơlir, kàl tơnơ̆ he rơp geh tai biap, plai sàng goh nàng sa”.

Ờ mìng là phan sa pah ngai, biap pài tờm ju brê gam geh gơm tàm ală dơ̆ hìu bơnhă geh broă dờng, kuơmàng bè wă nac, lap bau, ñô bau, tòm nam deh kòn, mut hìu pa. Ồng A Jon ơm tàm ƀòn Ea Mao, sàh Tân Tiến, càr Dăk Lăk pà git: “Tàm ngai lap bau, kòn sau, oh mi, jơi nòi tơrgùm rê wil tơl. Tơl nă cau dong dồ êt, bal mờ gơp gơm biap pài mờ uă phan sa ờs mờng ndai. Tài là ngai chờ hờp, tài bơta tam klac bal, bol hi pơgồp bal bơta pràn nàng sơlàu piang sơlơ bơkah rlau, cèng bơta krơi is ù tiah brê bơnơm Tây Nguyên dê”.

Tàm hìu dềt, bơnhă ồs hơng, tơl bơngàn biap pài duh geh jun tê cau kra, oh dềt in. sap đơs, sap ñŏ chờ hờp, gơ bơrlŭ bal mờ bơta bơkah bơh brê bơnơm dê. Tơl bơngàn biap pài ờ mìng lơh ram nùs, hờm ndul mờ gam pơyua nùs nhơm, bơta tam pà mờ tam klac bal ƀòn lơgar dê tai.