Nàng rơcang ai ngai kuơmàng do in, jơh gùt ƀòn H’Ring ndrờm bè ờ bic tơn. Bơh dà mbòr bồ ƀòn tus tơl rơng hìu ndrờm geh pơs wàs sàng goh lơm. Tờm chi gơ nơng jơnhua ngan geh lơh tàm nggùl ƀlàng bal, bè dùl jơnau jà ală brah yàng rê tus bal ngai chờ. Tàm sơlàu ơn phan pơ dơng lơh yàng, ală phan bơkah ngan rlau jơh, niam ngan rlau jơh bơh brê bơnơm dê geh pơdơng: bơh piang prùh tàm ding đơr lơ iang, tơrnờm bơkah tus ka dà croh, poac buh tàm ding gle mờ jơh bal poac đe mờng kwèng ngan. Hơ̆ ờ mìng là phan sa, mờ gam là dà kơl hề, là bơta tơrgùm bơh ù tiah ƀòn lơgar dê tơnơ̆ dùl nam lơh broă glar bòl. Yal bè jơnau gơtha bơh ngai chờ dê, bi H’Luyết ơm tàm ƀòn H’ring, sàh Cư Mgar ngoh rơngac yal: “Nam do phan tam tơnhàu geh uă, giă tac kung jơnhua den tàng làng bol tàm ƀòn cau lơi kung chờ hờp lơm. Nùs nhơm lơh yàng chờ sa piang kòi pa geh lơh chờ hờp, hô hơng. Bơh dơ̆ lơh chờ do, kòn sau geh iat ồng mò, mè bèp yal wơl ală bơhiàn ờs mờng bơh yau mò pàng dê, bơh hơ̆ sơlơ git ki ngàm, kờñ bơhiàn niam bơnĕ jơi bơtiàn he dê”.

Ờ mìng là dơ̆ nàng ưn ngài, dơ̆ lơh yàng chờ sa piang kòi pa gam là tiah nàng bơrkuăt kơ̆ rlau tai bơta tam klac, tiah mờ ală mờng chài lơh sa geh tàm pơ dờn wơl bơh ală rơnàng. Đơs bè jơnau gơtha niam chài bơh bơhiàn lơh yàng do dê, ồng Joang Chả - Ƀí thư Ci ƀộ ƀòn H’ring pà git: “Làng bol kòn cau Sơdàng geh dơ̆ lơh yàng chờ sa piang kòi pa geh bơyai lơh pah nam. Tơnơ̆ 1 nam lơh broă glar bòl, tŭ tus kàl tơnhàu mờ jơh tơnhàu phan tam, làng bol rơp ai kòi pa, ƀŏ gơs phe mờ bơyai lơh yàng chờ sa piang kòi pa. Dơ̆ lơh yàng geh gơtha kờñ hòi dan trồ tiah, brah yàng sền gàr, dong kờl ai nam pa mìu niam càl niam, rài kis bơtuah bơtuài, lơh sa bơtàu tơnguh rlau”.

Bal mờ làng bol ơm kis bơh jŏ tàm ƀòn lơgar, dơ̆ lơh yàng chờ sa piang kòi pa nam do tàm ƀòn H’ring gơ hòi gơ jà gal ngan nac lòt nhơl tus sền. Tàm sap cing mồng mpong ntas làm gùt ù tiah brê bơnơm, bi Lê Thị Long, nac lòt nhơl tus bơh ƀòn dờng Hồ Chí Minh đơs bơta chờ hờp bi dê tŭ do là dơ̆ 2 bi lòt sền dơ̆ lơh yàng do: “Do là dơ̆ 2 añ lòt sền dơ̆ lơh yàng do. Dơ̆ lơh yàng chờ sa piang kòi pa añ gŏ gơ cèng bơta niam chài làng bol kòn cau Sơdàng tiah do dê mờ làng bol tàm do rềp mềr ngan, sơrmah sơrmài tai. Bơdìh mờ dơ̆ lơh chờ cing mồng, añ gam geh sa ală phan sa làng bol tiah do dê tai. Añ dan nting bơr làng bol taih do nam pa pràn kơldang, chờ hờp, kàl lơh sa tơnhàu geh uă”.

Dơ̆ lơh yàng chờ sa piang kòi pa nam 2026 tàm ƀòn H’ring cèng jơnau gơtha kah yau gơ wèt mờ gơnoar atbồ mờ làng bol tàm ƀòn lơgar dê. Do là broă lơh niam chài dờng ngan sơn rờp geh bơyai lơh tơnơ̆ tŭ lam lơh jat jơnau lơh nền tơmut bal, pồ tơl mpồl lơh broă sră pơ àr gơnoar atbồ kâp sàh. Tàm bơta chờ hờp bơh làng bol dê, ồng Nguyễn Tuấn Anh – Phó Củ tịc Anih duh broă Làng bol sàh Cư Mgar pà git: “Tơnơ̆ tŭ tơmut bal, gơnoar atbồ sàh ơn broă prap gàr, ngui niam bơta kuơ niam chài ală jơi bơtiàn là broă kuơmàng. Chờ hờp ngan là jơh ală tơngume kung bè broă bơyai lơh yàng ndrờm bơh làng bol tàm ƀòn dê dờp kơnòl lơh. Gơnoar atbồ mờ kâp ủy mìng dong kờl dùl bơnah priă jền mờ bàr pe bơta pal geh ndai, gam wơl là làng bol ndrờm crăp rơcang lơh is. Bơh dơ̆ lơh chờ do, nùs nhơm tam klac, đềt mềr tàm ƀòn kòn cau Sơdàng kung bè đah ală jơi bơtiàn ơm kis tàm ƀòn rềp bal geh sơlơ tơnguh rlau tai”.

Dơ̆ lơh yàng chờ sa piang kòi pa tơn jơh tàm bơta hô hơng, gơ gơs là dang che tàm bơrkuăt bal mpồl bơtiàn kơ̆ kơljap ngan tàm ngai bồ nam pa. Ală bơngàn tơrnờm bơkah mờ dar tamya xoang chờ hờp bè jơnau đơs nền ai bơta pràn dờng ngan bơh niam chài kòn cau Sơdàng dê tàm ù tiah kơh bơnơm Dăk Lăk. Tơngac ƀòn H’ring, bơta kah kơlôi bè dùl kàl hờm ram mờ nùs nhơm kòn bơnus đềt mềr kung gam gơ ơm sùm bal mờ sap cing mồng tàm ù tiah kơh bơnơm.