Bơh àng drim gờñ, gal ngan làng bol neh tơrgùm tus tàm ƀòn Hìu niam chài mpồl bơtiàn ƀòn Jarah, sàh Nam Nung, càr Lâm Đông dê nàng tus bal Lơh chờ Tăm Blang Mprang ƀòn. Tàm nùs nhơm chờ hờp bơh săp dròng cing dê, tàm bơta niam phan soh ờs mờng kòn cau, làng bol cau lơi kung tamya jăt săp dròng cing “Wă năc”. Dùl nă klao pơnu kòn cau Mnông yal is: “Añ sơnđan là Y Bằng, ngai do añ tus bal mờ mpồl tàm ƀòn Jarah bơyai lơh chờ “Tăm Blang Mprang ƀòn” tàm ƀòn Jarah nàng răc dan mìu nhàc niam, nàng lơngăp lơngai ờ gơtìp tu kòp lơh aniai, mờ nàng làng bol kis ring lơngai mờ răc dan kàl lơh sa geh tơnhào uă nàng làng bol chờ hờp, làng bol tàm do sùm gàr bơta niam chài ờs mờng bơh rài do tus rài tơnơ̆, bơta niam chài ờs mờng do ờ gơtùi lời roh”.

Tềng đăp hìu niam chài mpồl bơtiàn ƀòn Jarah là tờm gơnơng ờs mờng bơh kòn cau Mnông dê geh bơka nền nòn ngan. tàm do, ală phan pơdơng yàng neh geh làng bol rơcang lài. Phan pơdơng geh 3 drăp tơrnờm, 1 nơm bồ sur, nsồp lơwe, chah pùt mờ đềs, dùl căp che brài kò neh pih mhàm iar, rùp ală phan ròng bè rơpu, kơnrồ, be, iar, ală bơta phan geh lơh bơh broă lơh sa suơn sre bal mờ ală bơta phan sa ờs mờng kòn cau Mnông dê. Mờ dùl bơta phan pal geh tai hơ̆ là tờm Blàng geh ngui nàng pơngàr ƀòn. Tàm bơta ndu gơnrơh hơ̆, cau răc yàng sơn đờm răc: “Ơ ală yàng, yàng dà, yàng brê, yàng bơnơm… ngai do tàm tiah do làng bol ƀòn lơgar dan hòi ală yàng rê nàng sền Lơh yàng duh khoai pơn gàr ƀòn tam chi, dan ală yàng sền gàr tờm chi hòn gơs niam. Bol añ kung dan ală yàng sền gàr rài kis làng bol sùm pràn kơl dang, ờ gơtìp kòp tê jê să. Tàm tiah do, bol añ lơh yàng dan hòi jơh ală yàng tus tàm do nàng ñô sa mờ ƀòn lơgar.

Tơnơ̆ mờ dơ̆ răc yàng, cau răc yàng jà kra ƀòn tiam bồp tơrnờm, mùl màl yal mŭt lơh chờ “Tăm Blang Mprang ƀòn”, mpồl dròng cing mờ ală ùr ơruh tamya xoang lơh gơs dar wil nàng tamya.

Cau răc yàng tàm broă lơh yàng kwơ màng do là mò H’ Đêm, do là cau ùr jăk chài ngan tàm ƀòn Jarah, sàh Nâm Nung dê. Mò pà git “Lơh chờ Tăm Blang Mprang ƀòn” geh bơyai lơh tơnơ̆ mờ tŭ tơn jơh kàl lơh sa. Bơnah broă lơh yàng geh 3 broă tờm, lài ngan là duh khoai mò pàng, pơn jăt mờ hơ̆ là duh khoai kàl lơh sa, bơta pràn kơl dang să jan mờ dŭt ndơl là lơh chờ Tăm Blang Mprang ƀòn. Tŭ duh khoai yàng neh gơs, kra ƀòn lơh ală broă pơn jăt tai bè “kơ̆t che brài tềng ngko tê” nàng kờñ lơngăp lơngai, pràn kơl dang ai làng bol tàm ƀòn bal mờ cau năc tus bal in. tơnơ̆ mờ tŭ tam tờm blang tềng mpồng hìu niam chài mpồl bơtiàn ƀòn Jarah, mò H’ Đêm pà git: “Tàm broă lơh yàng “Tăm Blang Mprang ƀòn”, añ ala măt làng bol ƀòn lơgar tàm ƀòn răc dan mờ yàng sơrbì jơh ală bơta tìs ai làng bol in bal mờ dan mờ yàng sền gàr ƀòn lơgar lơngăp lơngai, pràn kơl dang”.

Cau chài Y Xuyên, kra ƀòn tàm ƀòn Jarah pà git: do là broă lơh yàng neh geh bơh yau kòn cau Mnông dê, ai tơngŏ nùs nhơm chờ hờp tơnơ̆ mờ dùl nam kàl lơh sa geh tơnhào uă, ƀòn lơgar pràn kơl dang, mờ kơ̆p kờñ nam pa niam bơnĕ rơlao. Ồng Y Xuyên pơnyờ să pà git: “Lơh yàng Tăm Blang Mprang ƀòn”pa geh Ƀộ Niam chài Tàp pràn să jan mờ Lòt nhơl dờp là Phan lời wơl niam chài ờ di phan bơna dà lơgar dê. "Bơta kwơ “Tăm Blang Mprang ƀòn” là nàng sền gàr, ờ ai cau ờ niam bơchồt, tam dră mờ bơta lơngăp lơngai ƀòn lơgar dê, mờ kơ̆p kờñ oh kòn, kòn sao ờ gơtìp kòp tê jê să, làng bol pràn kơl dang, gơboh gơbài; Lơh suơn mìr ờ gơtìp phan tàm brê sa aniai mờ cau ờ niam lơh. Do là bơta niam chài ờs mờng kòn cau Mnông bol añ dê”.

Lơh chờ Tăm Blang Mprang ƀòn kòn cau Mnông tàm tiah pôs đồng kăc màng Nâm Nung, càr Lâm Đồng tơn jơh tàm să ntas dròng cing bal mờ nùs nhơm chờ hờp bơh mpồl bơtiàn dê. Bơh broă lơh yàng tus mờ nùs nhơm lơh chờ, jơh ală ai tơngŏ nùs nhơm kơ̆p kờñ bè dùl nam mìu nhàc niam, kàl lơh sa geh tơnhào uă, làng bol ƀòn lơgar lơngăp lơngai, pràn kơl dang, tam klăc bal mờ pơn jăt tai prăp gàr, ngui phan lời wơl niam chài kwơ màng bơh mò pàng lời wơl.