Tàm ƀòn Sut M’đưng, sàh Quảng Phú, càr Dăk Lăk ală nam pa do, săp ntas cing wơl mpoong sùm tàm ală dơ̆ pơrjum mpồl bơtiàn. Gơ jal tŭ tơngai ru lơh broă sa suơn sre, mpồl đơs crih tam ya bơh yau bơh ƀòn dê gàr sùm broă bơsram tàp, tŭ den dròng cing, tŭ den uh kơl wờk, đơs yal yau. Ờ mìng ràng tơlik ai làng bol tàm ƀòn, tàm sàh in lơm, ală dơ̆ ràng tơlik do gam geh bơyai lơh ai năc lòt nhơl in sền, halà ràng tơlik tàm mpràp ală dơ̆ pơrlòng dê. Jat mò H’ Riết Êban, Lam bồ thôn Sut M’đưng pà gĭt, ờ mìng là săp ntas bơh dơ̆ lơh chờ, cing mồng lơm tŭ do neh gơ gơs dang che tam klăc bal ală rơnàng tàm ƀòn:“Nùs nhơm bơh ală wa cau chài mờ ală oh dê den ngai sơlơ jơh nùs rlau. Mpồl atbồ is ƀòn kung bè là mpồl cau chài den kung lơh ngan dong kờl bal mờ gơ̆p nàng ai ală oh in gŏ geh bơta chờ hờp tŭ bơsram tàp dròng cing, lơh geh nùs nhơm chờ hờp, niam ngan nàng ală oh in ƀuơn gĭt wă rlau”.

Bal mờ ƀòn Sut M’đưng, uă ƀòn tàm càr Dăk Lăk gam hời rơ hời bơtàu tơnguh wơl ù tiah niam chài ờs mờng bơh yau, bơh dròng cing mồng, phan teh jơi bơtiàn, tus lơh niam wơl dơ̆ lơh chờ mờ ală broă lơh mpồl bơtiàn. Jơh gùt càr gàr niam uă broă lơh pơrjum niam chài bơh yau tàm ƀòn lơgar, mờ gĭt nđờ rơhiang dơ̆ cau chài, cau gĭt wă niam chài ờs mờng bơh yau tus bal tơn bơto bơtê ai rơnàng kơnòm să in.

Tàm sàh Ea Súp (gơwèt kơnhoàl tiah nhàr lơgar Ea Sup lài do), mpồl dròng cing mồng ƀòn Ea Súp geh tơnggơs neh rlau 10 nam do. Bơh tiah mìng geh mờr 10 nă cau tàm mpồl bơh sơn rờp lơm, tus tŭ do mpồl neh gơ hòi gơ jà uă ngan làng bol tus bal, tàm hơ̆ geh uă ơruh pơnu kơnòm pa tàu mờ kơnòm dềt. Cau chài Niê Khăm Ta, Cau kong kơnòl mpồl pà gĭt, bal mờ bơta sền gròi bơh ală kấp, gah broă, lơh broă bơto bơtê wơl ngai sơlơ geh gàr niam ngan:“Bơh nam 2024, geh Sờh Niam chài kung bè Cơldŭ lơh broă Niam chài mờ gơnoar atbồ ƀòn lơgar sền gròi pờ ơdŭ bơto bơtê ai ală kơnòm dềt in. Tŭ do, tàm mpồl neh tơmŭt tai ală cau tàm mpồl hơ̆. Khà cau tàm mpồl neh gơguh tus 46 nă, tàm hơ̆, cau dờng sơnam ngan rlau jơh deh nam 1949 mờ cau dềt sơnam ngan rlau jơh deh nam 2015. Is ồn là neh geh dùl mpồl dròng cing kơnòm dềt is ai mpồl in, sùm lam bơyai lơh ală broă lơh dròng cing mồng, niam chài”.

Tàm nam 2025, càr Dăk Lăk neh lơh sir mờ sền sơwì pà 46 sră nggal jờng rơ Cau chài Làng bol, Cau chài jak, bơh hơ̆ đơs nền gơnoar bơh mpồl tờm tàm sền gàr niam chài bơh yau. Càr kung neh bơyai lơh geh cồng nha uă broă lơh niam chài dờng, bè: dơ̆ tàm pơrlòng niam chài cing mồng mờ đờng gòng bơh yau ală jơi bơtiàn; Tơngleh “Tam klăc dờng ală jơi bơtiàn- phan lời wơl niam chài Việt Nam”, Ngai chờ niam chài jơi bơtiàn Mường dơ̆ I”... Bơyai lơh bơt bơtàu wơl mờ lơh tơngŏ wơl ală bơhiàn tàm dơ̆ lơh Yàng duh khoai răc dan cau lơh ka, dơ̆ lơh Yàng guh ơm hìu pa bơh kòn cau Rơđê dê, dơ̆ lơh Yàng gờm chờ kis jŏ bơh kòn cau M’nông dê...

Ồng Nguyễn Lê Vũ, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk đơs là, broă lơh do dong niam chài geh prap gàr tơn tàm ù tiah gam ơm kis, tàm rài kis pah ngai bơh làng bol dê. Mơkung pờ geh gùng lòt pa nàng niam chài in gơ gơs bơta pràn bơtàu tơnguh:“Kung gàr niam broă lơh do bè dùl dơ̆ pơrjum pah dơ̆ pah nam nàng ală cau chài, ală rơnàng rềp bal in gơtùi tìp mat lơh kwèng, tàm bơyai bal, kung bè mblàng lời wơl ală phan lời wơl bơh rơnàng bèp ồng lài do dê, mblàng lời wơl ai rơnàng tơnơ̆ do in. Lơh tơngŏ wơl jơh bal ù tiah niam chài cing mồng nàng ală mpồl in bơsram tàp, ràng tơlik ală broă lơh, bơhiàn kung bè ală broă lơh dròng cing mồng tàm mpồl bơtiàn mờ ală cau chài dê ơm kis tơn”.

Bơh ală broă lơh hơ̆, ồs niam chài geh pơn jat tai lơh duh hồl tus ală rơnàng rềp bal, ală kơnòm dềt tàm ală ƀòn lơgar. Tàm mpồl dròng cing bơh ƀòn Blôk (sàh Quảng Phú), oh Y Rô Lăng Kriêng, 11 sơnam là dùl tàm ală cau tàm mpồl dềt sơnam ngan rlau jơh. Tơnơ̆ tŭ jơh bơsram, oh wơl jat ală cau chài tàp teh đờng, tàp dròng cing. Mờ oh, săp ntas đờng goòng jơi bơtiàn dê neh gơs bơta kờñ ngan bơh gờñ ngan:“Bèp bơto kòn in teh đờng T’rưng, teh đờng goòng, cing gle. Kòn kờñ ngan đờng T’rưng tàm bơnĕ bơnài bal. Kòn kờñ gơ gơs cau chài teh đờng T’rưng den tàng kòn bơsram tàp tơnơ̆ tŭ jơh bơsram tàm hìu bơsram mờ lơh ngan tàp jat bal mờ ală bi”.

Bơh ală broă lơh tàm ƀòn lơgar, niam chài geh sền gàr mờ tàm pơrdờn dùl bă geh is ai rơnàng kơnòm să in. Mờ bơta prap lời wơl bơh mpồl bơtiàn, rơnàng kơnòm să jòi gŏ bơta pơn yờ să tàm phan lời wơl ờs mờng bơh yau mờ pơn jat tai lơh gơrề uă  bơta kwơ niam chài. Do ngan là tơngume nàng niam chài ală jơi bơtiàn tàm càr Dăk Lăk in geh prap gàr mờ bơtàu tơnguh kơnhăp kơ̆.